އަރަބި ކަނޑާއި ރަތް ކަނޑުގައި ފަރަންސޭސިވިލާތުގެ 60 އަށްވުރެ ގިނަ އުޅަނދު ތާށިވެއްޖެ

އަރަބި ކަނޑާއި ރަތް ކަނޑުގެ ސަލާމަތީ ކަންކަން ވަރުގަދަ ކުރުމަށް ފަރަންސޭސިވިލާތުން ބައިނަލްއަގުވާމީ އެހީތެރިކަމަށް އެދެމުންދާ ދަނޑިވަޅެއްގައި، އެ ސަރަހައްދުގައި އެ ގައުމުގެ ގިނަ އަދަދެއްގެ އުޅަނދުތަކެއް ތާށިވެފައިވާކަން ހާމަކޮށްފިއެވެ.

ފަރަންސޭސިވިލާތުގެ ޓްރާންސްޕޯޓް މިނިސްޓަރު ފިލިޕް ތަބަރޯޓް ވިދާޅުވި ގޮތުގައި، އަރަބި ކަނޑުގެ ގަލްފް ސަރަހައްދުގައި އެ ގައުމުގެ 52 އުޅަނދެއް މިވަގުތު އޮތީ ކުރިއަށް ނުދެވި ހުއްޓިފައެވެ. އަދި މީގެ އިތުރުން ރަތް ކަނޑުގެ ސަރަހައްދުގައިވެސް ފަރަންސޭސިވިލާތުގެ އަށް އުޅަނދެއް ތާށިވެފައިވާ ކަމަށް އޭނާ ފާހަގަކުރެއްވިއެވެ.

ފަރަންސޭސި މީޑިއާއަކަށް ދެއްވި ބަސްދީގަތުމެއްގައި މިނިސްޓަރު ވިދާޅުވީ، އެ އުޅަނދުތަކުގައި ފަރަންސޭސި ފަޅުވެރިންވެސް އެބަތިބި ކަމަށާއި، އެމީހުންގެ ހާލަތު ސަރުކާރުން ވަރަށް ގާތުން ބަލަމުންދާ ކަމަށެވެ. "އަޅުގަނޑުމެން މިދަނީ އެ އުޅަނދުތަކުގެ ފަޅުވެރިންނާ މެދުނުކެނޑި ގުޅަމުން. އޭގެ ތެރެއިން ގިނަ އުޅަނދުތަކުގައި ފަރަންސޭސި ރައްޔިތުން މަސައްކަތް ކުރަމުންދޭ،" ތަބަރޯޓް ވިދާޅުވިއެވެ.

މި ހާލަތާ ގުޅިގެން، ކަނޑުދަތުރުފަތުރުގެ ރައްކާތެރިކަން ކަށަވަރުކުރުމަށްޓަކައި ގައުމުތަކުގެ މެދުގައި ކޯލިޝަނެއް އުފެއްދުމަށް ފަރަންސޭސިވިލާތުން ދަނީ މަސައްކަތް ކުރަމުންނެވެ. މި މަސައްކަތުގެ މައިގަނޑު ބޭނުމަކީ ސަރަހައްދީ ހަމަނުޖެހުންތަކުގެ ސަބަބުން ވިޔަފާރި އުޅަނދުފަހަރަށް ކުރިމަތިވަމުންދާ ނުރައްކާތަކުން ސަލާމަތްވެ، ދަތުރުފަތުރުގެ މަގުތައް އަމާންކުރުމެވެ.