އަލަށް ޢިމާރާތްކުރެވޭ ކައުންސިލުތަކުގައި ޖާގަ ތަނަވަސްވެ، ޒަމާނީ ފެންވަރަށް އަޕްގްރޭޑް ކުރެވިފައިވާނެ: ވަޒީރު އާދަމް ޝަރީފް

ކޮންޓްރެކްޓަރ ފައިނޭންސް އުޞޫލުން އަލަށް ޢިމާރާތްކުރެވޭ ކައުންސިލުތަކުގައި ޖާގަ ތަނަވަސްވެ، ޒަމާނީ ފެންވަރަށް އަޕްގްރޭޑް ކުރެވިފައިވާނެކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި މިޑީއާތަކަށް މަޢުލޫމާތު ދެއްވަމުން ވަޒީރު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރަށްރަށުގެ ކައުންސިލްތަކަށް ވެވަޑައިގެންފައިވާ ވަޢުދުފުޅާ އެއްގޮތަށް، ރައްޔިތުންނަށް ދޭ ޚިދުމަތްތައް ފުޅާކުރުމަށް ހިންގާ މަޝްރޫޢުގެ ދަށުން 54 ރަށުގައި ކައުންސިލް ޢިމާރާތްކުރުމުގެ ޢަމަލީ މަސައްކަތް ކުރެވެމުންދާ ކަމަށެވެ.

ވަޒީރު ވިދާޅުވީ، ބައެއް ރަށްރަށުގައި މިހާރު ވަނީ ހިޔާކުރުމާ ހިސާބަށް މަސައްކަތް ގެންދެވިފައި ކަމަށެވެ. އަދި މަސައްކަތް ނުފެށި އޮތް ރަށުގެ މަސައްކަތް ފެށުމުގެ ތައްޔާރީތައް ވެފައިވާ ކަމަށް އެމަނިކުފާނު ވިދާޅުވިއެވެ. މީގެ އިތުރުން، ވަޒީރު ވިދާޅުވީ އެ ތަންތަން ކައުންސިލްތަކާ ޙަވާލުކުރާނީ ފުލީ-ފާނިޝްޑް ތަންތަނުގެ ގޮތުގައި، ބޭނުންވާ ހުރިހާ މޭޒާއި ގޮނޑި އަދި ކައުންޓަރުތަކާއެކުގައި ކަމަށާއި، މިއީ ޓާރންކީ ޕްރޮޖެކްޓެއް ކަމަށެވެ.

ކޮންޓްރެކްޓަރ ފައިނޭންސް އުޞޫލުން ޢިމާރާތްކުރުމަށް ހަމަޖެހިފައިވާ 55 ކައުންސިލް އިދާރާގެ މަސައްކަތްތައް މި އަހަރުގެ ޖޫން މަހުގެ ނިޔަލަށް ނިންމާލެވޭނެކަމަށް ވަޒީރު ވިދާޅުވިއެވެ.