ސައުދީގައި އުފެދުމުގައި ގުޅިފައިވާ އެއްމާބަނޑު ދެބެން ވަކިކުރުމުގެ އޮޕަރޭޝަނެއް ކާމިޔާބުކަމާއެކު ކޮށްފި

ސައުދީ އަރަބިއްޔާގެ ރިޔާޒުގައި ހުންނަ ކިންގް އަބްދުﷲ ސްޕެޝަލިސްޓް ޗިލްޑްރަންސް ހޮސްޕިޓަލުގައި، ސޯމާލިއާއަށް ނިސްބަތްވާ އެއްމާބަނޑު ދެބެން ވަކިކުރުމުގެ ނާޒުކު އޮޕަރޭޝަނެއް ބުރާސްފަތި ދުވަހު ކާމިޔާބުކަމާއެކު ނިންމާލައިފިއެވެ.

މި އޮޕަރޭޝަން ކުރެވުނީ ހަށިގަނޑުގެ ތިރީބައި ގުޅިފައި އުފަންވި ރަހުމާ އަދި ރަމްލާ ނަމަކަށް ކިޔާ ދެބެން ވަކިކުރުމަށެވެ. ޖުމްލަ 12 ގަޑިއިރަށް ދެމިގެންދިޔަ މި އޮޕަރޭޝަން ކުރިއަށް ގެންދިޔައީ އަށް މަރުހަލާއަކަށް ބަހާލައިގެންނެވެ. މި މަސައްކަތުގައި ތަފާތު ދާއިރާތަކުން ޖުމްލަ 36 މާހިރުންގެ ޓީމެއް ބައިވެރިވިއެވެ. އޭގެ ތެރޭގައި ހާއްސަ ސާޖަނުންނާއި، ކޮންސަލްޓަންޓުންނާއި ޓެކްނިކަލް ނާސިންގް ސްޓާފުން ހިމެނެއެވެ.

ކިންގް ސަލްމާން ހިއުމެނިޓޭރިއަން އެއިޑް އެންޑް ރިލީފް ސެންޓަރު  ގެ ސުޕަވައިޒަރ ޖެނެރަލް އަދި މެޑިކަލް ޓީމުގެ އިސްވެރިޔާ ޑރ. އަބްދުﷲ ބިން އަބްދުލްއަޒީޒް އަލް-ރާބިއާ ވިދާޅުވި ގޮތުގައި، މިއީ ސައުދީ ކޮންޖޮއިންޑް ޓްވިންސް ޕްރޮގްރާމުގެ ދަށުން ކާމިޔާބުކަމާއެކު ކުރެވުނު 68 ވަނަ އޮޕަރޭޝަނެވެ.

ވޭތުވެދިޔަ 35 އަހަރު ދުވަހުގެ ތެރޭގައި، ސަރުކާރުން ހަރަދުކުރާ މި ޕްރޮގްރާމުގެ ދަށުން 28 ގައުމަކުން 156 އެއްމާބަނޑު ދެބެންގެ ކޭސްތައް ބަލައި، އިންސާނީ އެހީގެ ގޮތުގައި ހިލޭ ފަރުވާ ދީފައިވެއެވެ.

ކުދިންގެ މައިންބަފައިން ވަނީ މި ފުރުސަތު ދެއްވިކަމަށްޓަކައި ސައުދީ ރަސްގެފާނު ސަލްމާން ބިން އަބްދުލްއަޒީޒް އަލް ސައުދު އަދި ވަލީއަހުދު މުހައްމަދު ބިން ސަލްމާނަށް އިޚްލާޞްތެރިކަމާއެކު ޝުކުރު އަދާކޮށް، އުފާވެރިކަން ފާޅުކޮށްފައެވެ.

މިހާރު މި ދެބެން ވަނީ ކުޑަކުދިންގެ އިންޓެންސިވް ކެއާ ޔުނިޓް  އަށް ބަދަލުކުރެވިފައެވެ. ޑޮކްޓަރުން ބުނާ ގޮތުގައި ކުދިންގެ ހާލަތު މިހާރު ވަނީ ސްޓޭބަލްވެފައެވެ. އަދި ދެ ކުދިންވެސް ފުރިހަމައަށް ރަނގަޅުވާނެ ކަމުގެ އުންމީދު ބޮޑު ކަމަށް މެޑިކަލް ޓީމުން މައުލޫމާތު ދެއެވެ.