އައްޑޫ ސިޓީގައި ބޮޑުވި ފެންގަނޑު އެމްއެންޑީއެފްއިން ހިންދައިފި

އައްޑޫ ސިޓީއަށް ބޯކޮށް ވާރޭ ވެހި ފެން ބޮޑުވި ސަރަހައްދުތަކުން ފެން ހިންދުމުގައި އެމްއެންޑީއެފް ސަދަން އޭރިއާ ކޮމާންޑުގެ ސިފައިން ހަރަކާތްތެރިވެއްޖެއެވެ.
 
ބޯކޮށް ވާރޭ ވެހި އައްޑޫ ސިޓީ ފޭދޫ މަގުތަކުގައި ފެންބޮޑުވުމުން، ރޭ 23:25 ހާއިރުން ފެށިގެން އެމްއެންޑީއެފް ސަދަން އޭރިއާ ކޮމާންޑް، ހިތަދޫ ފަޔަރ ސްޓޭޝަނުގެ ފަޔަރ ފައިޓަރުން ވަނީ ޕަންޕު ބަހައްޓައިގެން ފެން ހިންދުމުގެ މަސައްކަތް ކޮށްފައެވެ. ފޭދޫ މަގުތަކުގައި ބޮޑުވި ފެންގަނޑު ހިންދާލެވުނީ މިއަދު ހެނދުނު 09:25 ހާއިރުއެވެ.
 
މީގެއިތުރުން، ބޯކޮށް ވާރޭ ވެހި، އައްޑޫ ސިޓީ ހުޅުމީދޫގައި ހުންނަ ސީނު އަތޮޅު މަދަރުސާ ގޯތިތެރޭގައި ފެންބޮޑުވުމުން، މިއަދު ހެނދުނު 07:25 އިން ފެށިގެން އެމްއެންޑީއެފް ސަދަން އޭރިއާ ކޮމާންޑް، ހުޅުމީދޫ ފަޔަރ ސްޓޭޝަނުގެ ފަޔަރ ފައިޓަރުން ވަނީ ފެން ހިންދުމުގެ މަސައްކަތް ކޮށްފައެވެ. ސ. އަތޮޅު މަދަރުސާ ގޯތިތެރޭގައި ބޮޑުވި ފެންގަނޑު ހިންދާލެވުނީ މިއަދު 09:20 ހާއިރުއެވެ.