މަސްތުވާތަކެތި އެތެރެކުރާ މީހުންނަށް މަރުގެ އަދަބު ދޭ ގޮތަށް ޤާނޫނަށް ގެނައި އިސްލާޙަށް ޢަމަލުކުރަން ފަށައިފި

ރާއްޖެއަށް މަސްތުވާތަކެތި އެތެރެކުރާ މީހުންނަށް މަރުގެ އަދަބު ދޭ ގޮތަށް މަސްތުވާތަކެއްޗާ ބެހޭ ޤާނޫނަށް ގެނައި މުހިންމު އިސްލާޙަށް މިއަދު އަމަލުކުރަން ފަށައިފިއެވެ.

މި ބިލަކީ މިދިޔަ ޑިސެމްބަރު މަހުގެ 3 ވަނަ ދުވަހު ރައްޔިތުންގެ މަޖިލީހުން ފާސްކޮށް، މިދިޔަ މަހުގެ 6 ވަނަ ދުވަހު ރައީސުލްޖުމްހޫރިއްޔާ ތަސްދީޤު ކުރައްވާފައިވާ ބިލެކެވެ.

މިއަދު އަމަލުކުރަން ފެށި އިސްލާޙުގައިވާ ގޮތުން، ވަކި މިންވަރަކަށްވުރެ ގިނައިން މަސްތުވާތަކެތި އެތެރެކުރާ މީހުންނަށް މަރުގެ އަދަބު ކަނޑައެޅޭނެއެވެ. އެގޮތުން 350 ގްރާމަށްވުރެ އިތުރު ކެނެބިސް، 250 ގްރާމަށްވުރެ އިތުރު ޑައިފޯމިން އަދި އެ ނޫން ބާވަތެއްގެ މަސްތުވާތަކެތި ނަމަ 100 ގްރާމަށްވުރެ އިތުރުނަމަ މަރުގެ އަދަބު ދެވޭނެއެވެ. އަދި އެ މީހަކު ރާއްޖެއަށް އެތެރެވާއިރު މަސްތުވާތަކެތި އެތެރެކުރުމުންވެސް މި އަދަބު ދެވޭނެއެވެ.

މި އިސްލާޙުގައި ބަޔާންކޮށްފައިވާ ގޮތުން މަސްތުވާތަކެތި އެތެރެކުރާ މީހަކަށް މަރުގެ އަދަބު ދެވޭނީ، ސުޕްރީމް ކޯޓުގެ މައްސަލަ ބަލާ ފަނޑިޔާރުންގެ ބެންޗުގެ އިއްތިފާޤުން ޙުކުމް ކުރުމުންނެވެ. އިއްތިފާޤުން މަރުގެ ޙުކުމް ކަނޑަނާޅުއްވާނަމަ، އެ މީހަކު އުމުރަށް ޖަލަށްލުމާއެކު 100,000 ރުފިޔާއާއި 10,000,000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ. މީގެ އިތުރުން މަރުގެ އަދަބު ނުވަތަ އުމުރު ދުވަހުގެ ޖަލު ޙުކުމެއް އިއްވާ މީހަކަށް އަދަބު މަޢާފުކޮށް ނުވަތަ ލުއިކޮށް ނުދެވޭނެ ކަމަށާއި، ޕެރޯލްގެ ދަށުން ދޫނުކުރެވޭނެ ކަމަށްވެސް ވަނީ ކަނޑައަޅާފައެވެ.

ޤާނޫނަށް ގެނައި އިސްލާޙުގެ ދަށުން މަސްތުވާތަކެތީގެ ކުށްތަކުގައި ހޯދާ މުދަލާއި ފައިސާ ދައުލަތަށް ނެގޭނެ ނިޒާމު ވަނީ ހަރުދަނާކޮށްފައެވެ. އެގޮތުން ކުށް ކުރުމަށް ބޭނުންކުރި ފައިސާއާއި މުދާ، ކުށް ކޮށްގެން ހޯދާ މުދާ ނުވަތަ އެފަދަ މުދަލުން ހޯދާ ފައިސާ، އަދި ކުށް ކޮށްގެން ހޯދަން އުޅޭ ފައިސާއާއި މުދާ ދައުލަތަށް ނެގުމަށް ކޯޓުން އަމުރު ކުރަންޖެހޭނެއެވެ. އަދި މަސްތުވާތަކެތި ޓްރެފިކް ކުރުމުގެ ކުށެއްގެ ޝަރީއަތުގައި ދަޢުވާ ލިބޭ ފަރާތުގެ މައްޗަށް ކުށް ސާބިތު ނުވިޔަސް، ވަކި ޝަރުތެއް ފުރިހަމަވާނަމަ އެ ކުށަކާ ގުޅިފައިވާ ފައިސާ ނުވަތަ މުދާ ދައުލަތަށް ނެގުމަށް ކޯޓުން އަމުރު ކުރަންޖެހެއެވެ.

މި ބަދަލުތަކާއެކު، ރާއްޖެއަށް ވައިގެ މަގުންނާއި ކަނޑުމަގުން މަސްތުވާތަކެތި އެތެރެކުރުން ހުއްޓުވުމަށް ކަސްޓަމްސް އޮފިސަރުންނާއި ފުލުހުންނަށް ލިބިދޭ ބާރުތައްވެސް ވަނީ އިތުރުކޮށް ހަރުކަށިކޮށްފައެވެ. މިއީ ރާއްޖޭގައި މަސްތުވާތަކެތީގެ ވިޔަފާރި ފުޅާވެ، އެއާ ގުޅުންހުރި ކުށްތައް އިތުރުވަމުންދާތީ އެކަންކަން ހުއްޓުވުމަށްޓަކައި ގެނައި މުހިންމު އިސްލާޙުތަކެކެވެ.