އަވަށްޓެރި ގައުމުތަކުން ހަމަލާ ނުދޭނަމަ އެ ގައުމުތަކަށް ހަމަލާދިނުން ހުއްޓާލުމަށް އީރާނުން ނިންމައިފި

އީރާނުގެ ރައީސް މަސްއޫދު ޕެޒެޝްކިއަން ވިދާޅުވީ، އަވަށްޓެރި ގައުމުތަކުން އީރާނަށް ހަމަލާއެއް ނުފޮނުވާހާ ހިނދަކު، އެ ގައުމުތަކަށް އަމާޒުކޮށް ދެން ހަމަލާ ނުދޭނެ ކަމަށެވެ.

މި ނިންމުން ނިންމާފައިވަނީ އެމެރިކާ އާއި އިސްރާއީލުން ފެށި ހަނގުރާމައަށް ދެ ހަފުތާވެ، އީރާނުން ގަލްފް ސަރަހައްދާއި އެނޫންވެސް ސަރަހައްދުތަކަށް ބަދަލުހިފުމުގެ ހަމަލާތައް ދެމުންދާ ދަނޑިވަޅެއްގައެވެ.

އީރާނުގެ ވަގުތީ ލީޑަރޝިޕް ކައުންސިލުން މި ނިންމުން ފާސްކޮށްފައިވާކަން ހާމަކުރައްވަމުން، ރައީސް ޕެޒެޝްކިއަން ވަނީ ފާއިތުވި ދުވަސްތަކުގައި ދެވުނު ހަމަލާތަކަށް އަވަށްޓެރި ގައުމުތަކުގެ ކިބައިން މައާފަށް އެދިވަޑައިގެންފައެވެ. ނަމަވެސް، ފަހުން އެކްސްގައި ކުރެއްވި ޕޯސްޓެއްގައި އެމަނިކުފާނު ސާފުކޮށްދެއްވީ އީރާނުން އަވަށްޓެރި އެއްވެސް ގައުމަކަށް ހަމަލާދީފައި ނުވާނެ ކަމަށާއި، އަމާޒުކުރީ ހަމައެކަނި އެމެރިކާގެ އަސްކަރީ މަރުކަޒުތަކަށް ކަމަށެވެ.

މި ދަނޑިވަޅުގައި އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނަށް ވަރުގަދަ އިންޒާރުތަކެއް ދެއްވާފައެވެ. ޓްރަމްޕްގެ ސޯޝަލް މީޑިއާ ޕްލެޓްފޯމް 'ޓްރުތް ސޯޝަލް' ގައި ވިދާޅުވީ އީރާނަށް ވަރަށް ވަރުގަދަ ހަމަލާތަކެއް މިއަދު ދޭނެ ކަމަށެވެ. އަދި އީރާނުގެ "ގޯސް އަމަލުތަކުގެ" ސަބަބުން، ކުރިން ހަމަލާދިނުމަށް ކަނޑައަޅާފައި ނުވާ ތަންތަނާއި މީހުންނަށް އަމާޒުކޮށް، މުޅިން ހަލާކުކޮށްލުމުގެ ވިސްނުން ގެންގުޅޭ ކަމަށްވެސް ޓްރަމްޕް ވިދާޅުވިއެވެ.

ޓްރަމްޕް އިތުރަށް ދައުވާ ކުރެއްވި ގޮތުގައި، ފާއިތުވި ތިން ދުވަސް ތެރޭގައި އެމެރިކާއިން ވަނީ އީރާނުގެ 42 ހަނގުރާމަމަތީ އުޅަނދު ނައްތާލާފައެވެ. މިއަށް ރައްދުދެމުން އީރާނުގެ އަސްކަރިއްޔާގެ ތަރުޖަމާނު ވިދާޅުވީ، ގަލްފަށް ވަންނަ "ދުޝްމަނުންގެ" ކޮންމެ އުޅަނދެއްގެ ނިމުން އޮތީ ކަނޑުގެ އަޑީގައި ކަމަށެވެ.

އެމެރިކާއިން އީރާނަށް "ޝަރުތެއް ނެތި އަމާންދިނުމަށް" ގޮވާލި ގޮވާލުމަށް ރައީސް ޕެޒެޝްކިއަން ވަނީ ވަރަށް ބޮޑަށް ފާޑުވިދާޅުވެފައެވެ. "ޝަރުތެއް ނެތި އަހަރެމެން އަމާންދިނުމަކީ އެމީހުން ކަށްވަޅަށް ދާއިރުވެސް ދެކޭނެ ހުވަފެނެއް. އަހަރެމެން ތަބާވަނީ ބައިނަލްއަގުވާމީ ގާނޫނުތަކާއި އިންސާނީ އޮނިގަނޑުތަކަށް،" އޭނާ ވިދާޅުވިއެވެ.

އީރާނުގެ ރިވޮލިއުޝަނަރީ ގާޑްސް (އައި.އާރް.ޖީ.ސީ) އިން ނެރުނު ބަޔާނެއްގައި ބުނެފައިވަނީ، އަވަށްޓެރި ގައުމުތަކުގެ އިސްތިގުލާލަށް އިހުތިރާމް ކުރާ ކަމަށެވެ. ނަމަވެސް، އެމެރިކާ އާއި އިސްރާއީލުން ހަމަލާތައް ކުރިއަށް ގެންދާނަމަ، ސަރަހައްދުގައި ހުރި އެމެރިކާގެ ހުރިހާ އަސްކަރީ މަރުކަޒުތަކާއި މަސްލަހަތުތަކަކީ އީރާނުގެ ވަރުގަދަ ހަމަލާތަކުގެ މައިގަނޑު އަމާޒަށް ވާނެ ކަމަށްވެސް އެ ބަޔާނުގައި އިންޒާރު ދީފައިވެއެވެ.