ރާއްޖެ އެތެރެކުރަން އުޅުނު 99,000 ސިނގިރޭޓު ކަސްޓަމްސްއިން އަތުލައިގެންފި

ކަނޑުމަގުން ރާއްޖެއަށް ސިއްރުން އެތެރެކުރަން އުޅުނު 99,000 ސިނގިރޭޓު މޯލްޑިވްސް ކަސްޓަމްސް ސާވިސްއިން އަތުލައިގެންފިއެވެ.

 ކަސްޓަމްސްއިން މައުލޫމާތު ދީފައިވާ ގޮތުގައި މި ތަކެތި އަތުލައިގަނެފައިވަނީ މި މަހުގެ ފަސްވަނަ ދުވަހު މާލޭ ކޮމާޝަލް ހާބަރުންނެވެ.

މި މައްސަލައާ ގުޅޭގޮތުން ކަސްޓަމްސްއިން އެކްސްގައި ކުރި ޕޯސްޓެއްގައި ބުނީ، ރާއްޖެއަށް ސިއްރުން އެތެރެކުރަން އުޅުނު ގިނަ އަދަދެއްގެ ސިނގިރޭޓު އަތުލައިގަނެފައިވަނީ ކަސްޓަމްސްއިން ކުރިއަށްގެންދާ ޚާއްޞަ އޮޕަރޭޝަންތަކުގެ ތެރެއިން ކަމަށެވެ. މިއީ ރާއްޖެއަށް މަނާ ތަކެތި އެތެރެކުރުން ހުއްޓުވުމަށް ސަރުކާރުން ކުރަމުންދާ މަސައްކަތުގެ ތެރެއިން ހޯދުނު ކާމިޔާބީއެއްގެ ގޮތުގައި އެ އިދާރާއިން ފާހަގަކުރެއެވެ.

ރާއްޖެއަށް މަނާ ތަކެތި އެތެރެކުރުން ހުއްޓުވުމަށް ކުރަމުންދާ މަސައްކަތްތަކާ ގުޅޭގޮތުން ދާޚިލީ ސަލާމަތާ ފަންނިއްޔާތާ ބެހޭ ވަޒީރު ޢަލީ އިޙުސާން ދާދިފަހުން ވިދާޅުވެފައިވަނީ، ވޭތުވެދިޔަ ދޮޅުމަހެއްހާ ދުވަހުގެ ތެރޭގައި 7,000 ވޭޕް ސްޓިކާއި ދެ މިލިއަން ސިނގިރޭޓު އަތުލައިގަނެވިފައިވާ ކަމަށެވެ. މިއީ ދުންފަތުގެ ބާވަތްތައް ވަގަށް އެތެރެކުރުން ހުއްޓުވުމަށް ސަރުކާރުން ދޭ ސަމާލުކަން ހާމަކޮށްދޭ ކަމެއް ކަމަށް ވަޒީރު ފާހަގަކުރެއްވިއެވެ.

ދުންފަތުގެ ގާނޫނު ހަރުކަށި ކުރުމާ ގުޅިގެން، ވަގަށް ސިނގިރޭޓާއި އެހެނިހެން ދުންފަތުގެ ބާވަތްތައް އެތެރެކުރަން އުޅޭ ފަރާތްތައް ހުއްޓުވުމަށް ސަރުކާރުން ދަނީ ހަރުދަނާ ފިޔަވަޅުތަކެއް އަޅަމުންނެވެ. މިގޮތުން މިހާރުވެސް އެފަދަ ބޮޑެތި އެތައް މައްސަލަތަކެއް ކަމާބެހޭ އިދާރާތަކުން ދަނީ ތަހުޤީޤު ކުރަމުންނެވެ.

ސަރުކާރުން ބުނެފައިވަނީ ޤާނޫނާ ޚިލާފު މިފަދަ އަމަލުތައް ހިންގާ ފަރާތްތަކާމެދު، ވަކި މީހަކަށް ބެލުމެއް ނެތި ޤާނޫނު ތަންފީޒު ކުރަމުންދާނެ ކަމަށެވެ. އަދި ރާއްޖޭގެ ބޯޑަރުތަކުގެ ސަލާމަތާއި ރައްކާތެރިކަން ކަށަވަރުކުރުމަށް ކަސްޓަމްސް އާއި އެހެނިހެން ސަލާމަތީ ބާރުތަކުން ގުޅިގެން މަސައްކަތް ކުރަމުންދާނެ ކަމަށްވެސް ސަރުކާރުން ވަނީ ހާމަކޮށްފައެވެ.