ހަ ކިލޯއަށް ވުރެ ގިނަ މަސްތުވާތަކެތި އެތެރެކުރި ތިން މީހަކު ހައްޔަރުކޮށްފި

ހަ ކިލޯއަށް ވުރެ ގިނަ މަސްތުވާތަކެތި އެތެރެކުރިކަމުގެ ތުހުމަތުގައި ތިން މީހަކު ހައްޔަރުކޮށްފިއެވެ. 

މި މައްސަލައިގެ ތުހުމަތުގައި ހައްޔަރުކޮށްފައި ވަނީ ދިވެއްސަކާއި ދެ ބިދޭސީންނެވެ. މި މީހުން ހައްޔަރުކުރީ ވެލާނާ އިންޓަނޭޝަނަލް އެއާރޕޯޓުންނެވެ.

މި މައްސަލައާ ގުޅިގެން ހައްޔަރުކޮށްފައި ވަނީ ގދ. ގައްދޫ / ހިތިލާގެ، އުމުރުން 28 އަހަރުގެ ޢަލީ ޢިރުފާނު އާއި އިންޑިއާއަށް ނިސްބަތްވާ އުމުރުން 19 އަހަރުގެ ދަނޫޝްކާނދަން ގޯޕާލް އާއި 21 އަހަރުގެ ކަތިރިވިލް މަނިމަރަންއެވެ.

މި ތިން މީހުންނަކީ ވެސް މި މަހުގެ 3ވަނަ ދުވަހު މޯލްޑިވްސް ކަސްޓަމްސް ސާރވިސްއިން ހިފަހައްޓައި ފުލުހުންނާ ހަވާލުކުރި ތިން މީހުންނެވެ.

މި މައްސަލައާ އެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ޢަލީ ޢިރުފާނު ޝަރީއަތް ނިމެންދެން އަދި އަނެއް ދެ މީހުން ފަސް ދުވަހަށް ބަންދުކުރުމަށް ވަނީ އަމުރުކޮށްފައެވެ.

މި މައްސަލަ ފުލުހުން ދަނީ ތަޙުޤީޤު ކުރަމުންނެވެ.