ބްރޯޑްކޮމްގެ މެމްބަރުކަމަށް ކުރިމަތިލުމަށް ހުޅުވާލައިފި

މޯލްޑިވްސް ބްރޯޑްކާސްޓިންގ ކޮމިޝަންގެ މެމްބަރުކަމަށް ކުރިމަތިލުމަށް ރައީސުލްޖުމްހޫރިއްޔާގެ އޮފީހުން ހުޅުވާލައިފިއެވެ.

ބްރޮޑްކޮމްގެ މެމްބަރުކަމަށް ކުރިމަތިލުމަށް ހުޅުވާލައިފައިމިވަނީ މިއަދުއެވެ. މިމަހުގެ 26 އާއި ހަމައަށް އެކޮމިޝަންގެ މެމްބަރުކަމަށް ކުރިމަތިލުމުގެ ފުރުސަތު އޮތީ ހުޅުވާލައިފައެވެ.

އެކޮމިޝަންގެ މެމްބަރުކަމަށް ކުރިމަތިލުމަށް ހުޅުވާލައިފައި މިވަނީ އެކޮމިޝަންގެ ދެމެމްބަރެއްގެ މަޤާމުގެ މުއްދަތު ހަމަވުމަށް ގާތްވެފައިވާތީއެވެ.

ބްރޯޑްކޮމްގެ މެންބަރު ކަމަށް ކުރިމަތިލާ މީހުންގެ ޝަރުޠުތަކެއް ކަނޑައަޅައިފައިވާއިރު އެޝަރުޠު ތަކަކީ، އުމުރުން 18 އަހަރުވެފައިވާ ދިވެއްސަކަށް ވުން، އިސްލާމް ދީނުގައި ހައްދެއް ކަނޑައެޅިފައިވާ ކުށެއް ނުވަތަ ޚިޔާނާތުގެ ކުށެއް ކުރިން ކަން ވޭތުވެދިޔަ ފަސް އަހަރު ދުވަހުގެ ތެރޭގައި ޝަރީއަތަށް ސާބިތުވެފައިވާ ނުވާ މީހަކަށް ވުން ހިމެނެއެވެ.

މީގެ އިތުރުން ސިވިލް ސާވިސް ނުވަތަ ސަރުކާރު ޚިއްސާވާ ކުންފުންޏެއްގެ ވަޒީފާއެއް އަދާކުރާ މީހުންނަށާއި ކޮމިއުނިކޭޝަނާއި ބްރޯޑްކާސްޓް ކުރުމުގެ ދާއިރާގައި މާލީ މަޞްލަޙަތެއް އޮތް މީހަކު ކަމުގައި ނުވުން ހިމެނެއެވެ.