މެދުއިރުމަތީގެ ހަނގުރާމައާ ގުޅިގެން ތެލުގެ ދަތިކަން ކުރިމަތިވެ ބަންގްލަދޭޝްގެ ޔުނިވާސިޓީތައް ބަންދުކޮށްފި

މެދުއިރުމަތީގައި ހިނގަމުންދާ ހަނގުރާމައާ ގުޅިގެން ކުރިމަތިވެފައިވާ ހަކަތައިގެ ދަތިކަމުގެ ސަބަބުން، ބަންގްލަދޭޝްގެ ހުރިހާ ޔުނިވާސިޓީތަކެއް ބަންދުކޮށް ތެޔޮ ވިއްކުން ކޮންޓްރޯލް ކުރަން އެ ގައުމުގެ ސަރުކާރުން ނިންމައިފިއެވެ.

މި ނިންމުމުގެ ދަށުން މިދިޔަ ހޯމަ ދުވަހުން ފެށިގެން ސަރުކާރާއި އަމިއްލަ ހުރިހާ ޔުނިވާސިޓީތަކެއް ބަންދުކޮށް، އީދު ބަންދު ވަނީ އަވަސްކޮށްފައެވެ.

ބަންގްލަދޭޝްގެ މިނިސްޓްރީ އޮފް އެޑިއުކޭޝަނުން ނެރުނު އަމުރެއްގައި ބުނެފައިވަނީ، މި ނިންމުމަކީ ދުނިޔޭގެ މިހާރުގެ ހާލަތަށް ރިއާޔަތްކޮށް، ކަރަންޓާއި ތެޔޮ ބޭނުންކުރާ މިންވަރު މަދުކުރުމަށް އެޅި ފިޔަވަޅެއް ކަމަށެވެ. ޔުނިވާސިޓީތަކުގެ ކްލާސްރޫމްތަކާއި، ލެބޯޓްރީތަކާއި އަދި ދަނާލުތަކަކީ ގިނަ އަދަދަކަށް ކަރަންޓު ބޭނުންކުރާ ތަންތަނަށް ވުމުން، މި ފިޔަވަޅުގެ ސަބަބުން ގައުމުގެ ކަރަންޓުގެ ނިޒާމަށް ބާރުބޮޑުވުން ކުޑަވާނެ ކަމަށް އޮފިޝަލުން ވިދާޅުވެއެވެ.

އިގްތިސާދީ ގޮތުން އަޅަމުންދާ ހަރުކަށި ފިޔަވަޅުތަކުގެ ދަށުން، ބަންގްލަދޭޝް ސަރުކާރުން ވަނީ ބޭރުގެ މަންހަޖުތަކަށް ކިޔަވައިދޭ ސްކޫލްތަކާއި ޕްރައިވެޓް ކޯޗިން ސެންޓަރުތައް ވެސް މި މުއްދަތުގައި ބަންދުކުރުމަށް އަންގާފައެވެ. ރަމަޟާން މަހަށް ސަރުކާރުގެ ސްކޫލްތައް މިހާރުވެސް ބަންދުކޮށްފައި އޮތުމާއެކު، މި އާ ނިންމުމާއެކު މުޅި ގައުމުގެ ގާތްގަނޑަކަށް ހުރިހާ ތައުލީމީ މުއައްސަސާއެއް މިވަނީ ބަންދުވެފައެވެ.

ބަންގްލަދޭޝްއަކީ ބޭނުންވާ ހަކަތައިގެ 95 އިންސައްތަ އިމްޕޯޓްކުރާ ގައުމަކަށް ވާއިރު، އިޒްރޭލާއި އީރާނާ ދެމެދު ހިނގަމުންދާ ހަމަނުޖެހުންތަކުގެ ސަބަބުން ތެލާއި ގޭސް ލިބުމަށް ވަނީ ބޮޑެތި ހުރަސްތަކެއް ކުރިމަތިވެފައެވެ. މިކަމުގެ ސަބަބުން ތެޔޮ ގަތުމަށް އާންމުން ކިއޫ ހަދަން ފެށުމާ ގުޅިގެން، މިދިޔަ ހުކުރު ދުވަހުން ފެށިގެން ތެޔޮ ވިއްކާ މިންވަރު ވެސް ވަނީ ލިމިޓްކޮށްފައެވެ.

ގޭހުގެ ދަތިކަން ބޮޑުވުމުގެ ސަބަބުން ބަންގްލަދޭޝްގެ ސަރުކާރުން ހިންގާ ފަސް ފާޓިލައިޒާ ފެކްޓްރީގެ ތެރެއިން ހަތަރު ފެކްޓްރީއެއްގެ މަސައްކަތް މިހާރު ވަނީ ހުއްޓާލާފައެވެ. މި ފެކްޓްރީތަކަށް ދޫކުރާ ގޭސް މިހާރު ބޭނުންކުރަމުންދަނީ ކަރަންޓު އުފައްދާ ޕްލާންޓްތައް ހިންގުމަށެވެ. 170 މިލިއަން މީހުންގެ އާބާދީއެއް އޮތް ބަންގްލަދޭޝްއިން ދަނީ އަގުބޮޑުކޮށް އެލް.އެން.ޖީ ގަނެގެން ހަކަތައިގެ ދަތިކަން ހައްލުކުރަން މަސައްކަތް ކުރަމުންނެވެ.

ކަމާބެހޭ މާހިރުން ވިދާޅުވާ ގޮތުގައި މި ފިޔަވަޅުތަކުގެ ސަބަބުން ކުރު މުއްދަތަކަށް ހަކަތައިގެ ދާއިރާއަށް ލުޔެއް ލިބުނު ނަމަވެސް، މި ހާލަތު ދިގުލައިގެން ގޮސްފިނަމަ ދަރިވަރުންގެ ކިޔެވުމަށް ބޮޑެތި ގޮންޖެހުންތަކެއް ކުރިމަތިވާނެއެވެ. މި މުއައްސަސާތައް އަލުން ހުޅުވާނެ ވަކި ތާރީޚެއް ސަރުކާރުން އަދި ހާމަކޮށްފައެއް ނުވެއެވެ.