“ހޯޕް އައިލެންޑް” ގެ މަސައްކަތް މިއަހަރު ނިމުމުގެ ކުރިން ފަށަނީ

 “ހޯޕް އައިލެންޑް” ގެ މަސައްކަތް މިއަހަރު ނިމުމުގެ ކުރިން ފެށޭތޯ މަސައްކަތް ކުރަމުންދާ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ. 

ވަޒީރު އިޙްސާން މިހެން ވިދާޅުވީ މިސަރުކާރަށް އެއްއަހަރު ފުރުމާ ގުޅިގެން “ސަންގު” ޓީވީ އަށް ދެއްވި ޚާއްސަ ބަސްދީގަތުމެއްގައެވެ. 

ވަޒީރު އިޙްސާން ވިދާޅުވީ، ހޯޕް އައިލެންޑަކީ ކުށުގެ މައްސަލަތަކަށް ވަރަށް ބޮޑު ހައްލެއް ގެންނާނެ ޕްރޮޖެކްޓެއް ކަމަށެވެ.  މި ކަމަށްޓަކައި، ދ.ވާނީ ހަމަޖައްސައި، ޑިޒައިންގެ މަސައްކަތް ނިންމާފައިވާކަމަށްވެސް އެމަނިކުފާނު ވިދާޅުވިއެވެ. 

އަދި މިއަހަރު ނިމުމުގެ ކުރިން އެތަން ކްރޮސް ސަބްސިޑީގެ އުސޫލުން އިންވެސްޓް ކުރާ ފަރާތެއް ހޯދާ، އެ ފަރާތަކަށް ޕްރޮޖެކްޓް އެވޯޑްކޮށް މި މަސައްކަތް ފަށަން އަމާޒުކުރައްވާކަން ވަޒީރު އިޙްސާން ވަނީ ވިދާޅުވެފައެވެ.

ވަޒީރު އިޙްސާން ވިދާޅުވީ ގިނަ ރައްޔިތިންގެ އުންމީދާއި ގުޅިފައި އޮތް މި ޕރޮޖެކްޓް ރައީސް ޑރ މުޙައްމަދު މުޢިއްޒުގެ މި ދައުރުތެރޭގައި ނިންމާ ރައްޔިތުންގެ އުންމީދު ފުރިހަމަ ކޮށްދެއްވާނެ ކަމަށެވެ.

“ހޯޕް އައިލެންޑް” އަކީ ކުށްކުރާ ކުޑަކުދިން އިސްލާޙުކޮށް މުޖުތަމައުއަށް އަނބުރާ ގެނައުމަށް ސަރުކާރުން ޤާއިމުކުރަން ނިންމާފައިވާ ރަށެކެވެ. ކުށްތަކަށް އަރައިގަންނަ ކުދިން ދައުލަތުގެ ބެލުމުގެދަށަށް ގެނެސް، އެކުދިން ރިހިބިލިޓޭޓް ކުރުމަށް ޚާއްސަ ފެސިލިޓީއެއް ވަކި ރަށެއްގައި ހެދުމަށް ނިންމާފައިވާކަން ވަޒީރު އިޙްސާން ހާމަކުރެއްވީ މިއަހަރުގެ އޭޕްރީލް މަހުގެ 6 ވަނަ ދުވަހުގައެވެ.

އެގޮތުން، އިޙްސާން ވިދާޅުވީ، ދިގު މުއްދަތަށް ދައުލަތު ބެލުމުގެ ދަށަށް ކުދިން ނެގޭނީ، ޤާނޫނުގެ ދަށުން، ކޯޓު ޙުކުމެއްގެ ތެރެއިން ކަމަށެވެ. ހޯޕް އައިލެންޑުގެ ގޮތުގައި ދ. ވާނީ ހަމަޖައްސާފައިވާއިރު، އެއްފަހަރާ 400 ކުދިން މިތަނުގައި ބައިތިއްބައިގެން ރިހެބިލިޓޭޓް ކުރެވޭނެއެވެ.

ކޮންމެ ދުވަހެއްގެ ފަތިސް ނަމާދުން ފެށިގެން، ދީނުގައި މަޖުބޫރުކުރާ ހުރިހާ ކަމެއް އެ ކުދިން ލައްވައި ކުރުވައި، ރަސްމީ ތަޢުލީމާއި ކަސްރަތު ކުރުން އަދި އެކި ހުނަރުތައް ދަސްކޮށްދިނުމުގެ ޕްރޮގްރާމްތައް ހިންގުމަށް ނިންމާފައިވާ ކަމަށްވެސް ވަޒީރު އިޙްސާން ވަނީ ވިދާޅުވެފައެެވެ. 

މީގެ އިތުރުން އެތަނުގައި ދިރިއުޅޭ ކުދިން 18 އަހަރު ވަންދެން އެތަނުގައިއުޅޭނެ ކަމަށާއި އެއަށްފަހު ދިވެހި ފުލުހުން ނުވަތަ ދިވެހި ސަފައިންގެ ޚިދުމަތުންކުރެ ތަނެއްގައި ވަކި މުއްދަތެއް ވަންދެން އެކުދިން ޚިދުމަތް ކުރަންޖެހޭ ގޮތަށް ސަރުކާރުން ނިންމާފައިވާކަމަށް ވަޒީރު އިޙްސާން ވިދާޅުވިއެވެ.