އިޒްރޭލުން ގުދުސްގައި ވަޒަންވެރިވެފައިވާ ޔަހޫދީން ހަތިޔާރު ގެންގުޅުމުގެ ޙުއްދައިގެ ދާއިރާ އިތުރަށް ފުޅާކޮށްފި

އިޒްރޭލުން ހިފާފައިވާ ގުދުސްގައި ވަޒަންވެރިވެފައިވާ ޔަހޫދީންނަށް އަމިއްލަ ބޭނުމަށް ބަޑި ގެންގުޅުމުގެ ޙުއްދަ ދޫކުރުމުގެ ދާއިރާ އިތުރަށް ފުޅާކޮށްފައިވާކަމަށް އެ ޤައުމުގެ ނޭޝަނަލް ސެކިއުރިޓީ މިނިސްޓަރު، އިތަމާރު ބެން-ގްވީރު އިޢުލާން ކުރައްވައިފިއެވެ.

މި ނިންމުމުގެ ދަށުން އިތުރު 300,000 އަށް ވުރެ ގިނަ ޔަހޫދީ ވަޒަންވެރިންނަށް ހަތިޔާރު ގެންގުޅުމުގެ ޝަރުތު ހަމަވާނެއެވެ.

އިޒްރޭލުގެ ހަރުކަށި ފިކުރުގެ އޮޓްޒްމާ ޔެހޫދިތު، ޕާޓީގެ ލީޑަރު ބެން-ގްވީރު އެކްސްގައި ކުރި ޕޯސްޓެއްގައި ބުނީ، 2022 ވަނަ އަހަރު އޭނާ މަގާމާ ހަވާލުވި ފަހުން މިހާތަނަށް 240,000 އިޒްރޭލު މީހުންނަށް ބަޑި ގެންގުޅުމުގެ ޙުއްދަ ދޫކޮށްފައިވާ ކަމަށެވެ. މި އައު ބަދަލާއެކު 41 އާ ސެޓްލްމަންޓަކާއި 1,600 މަގު ހިމެނޭ ސަރަޙައްދުތަކުގައި ދިރިއުޅޭ މީހުންނަށް ހަތިޔާރު ގެންގުޅުމުގެ ފުރުސަތު ލިބިގެންދާނެއެވެ.

ބެން-ގްވީރު ދައުވާކުރާ ގޮތުގައި މި ފިޔަވަޅަކީ "ޓެރަރިސްޓް ހާދިސާތަކާ ކުރިމަތިލުމަށް" ވަޒަންވެރިން ތައްޔާރުކުރުމަށާއި އަމިއްލަ ރައްކާތެރިކަން ވަރުގަދަކުރުމަށް އެޅި ފިޔަވަޅެކެވެ. ނަމަވެސް، އިންސާނީ ހައްގުތަކަށް މަސައްކަތްކުރާ ޖަމާއަތްތަކުން މިކަން ކުށްވެރިކޮށް ބުނެފައިވަނީ، މިއީ ފަލަސްތީނުގެ އަސްލު ރައްޔިތުންނާ ދެކޮޅަށް ހިންގާ އަނިޔާވެރިކަން އިތުރުވެ، ހިފާފައިވާ ސަރަހައްދުތަކުގެ މަސްލަހަތު އިތުރަށް ގޯސްވާނެ ކަމެއް ކަމަށެވެ.

ޣައްޒާގައި އިޒްރޭލުން ހިންގަމުންދާ ގަތުލުއާންމު ފެށުނު ފަހުން ހުޅަނގު އައްސޭރީގައި އިޒްރޭލު ސިފައިންނާއި ވަޒަންވެރިން ދެމުންދާ ހަމަލާތައް ވަނީ ވަރަށް ބޮޑަށް އިތުރުވެފައެވެ. ރަސްމީ ތަފާސްހިސާބުތަކުން ދައްކާ ގޮތުގައި މި މުއްދަތުގެ ތެރޭގައި 1,125 ފަލަސްތީނު މީހުން ޝަހީދުކޮށްލާފައިވާއިރު، 11,700 އެއްހާ މީހުން ޒަހަމްކޮށް، ގާތްގަނޑަކަށް 22,000 މީހުން ވަނީ ހައްޔަރުކޮށްފައެވެ.

މީގެ އިތުރުން، ފަލަސްތީނު މީހުންގެ ގެދޮރާއި އިންފްރާސްޓްރަކްޗަރު ހަލާކުކުރުމާއި، މަޖުބޫރުން މީހުން ބޭރުކުރުމާއި، ބައިނަލްއަގުވާމީ މުޖުތަމައުން ގަބޫލުކުރާ ހިފާފައިވާ ބިންތަކުގައި ޔަހޫދީ އާބާދީތައް ފުޅާކުރުން ވަނީ އިތުރުވެފައެވެ. ހާއާރެޓްޒް ނޫހުން ރިޕޯޓްކޮށްފައިވާ ގޮތުގައި، ވޭތުވެދިޔަ އަހަރު އެކަނިވެސް ހުޅަނގު އައްސޭރީގައި ޔަހޫދީ ވަޒަންވެރިން ފަލަސްތީނު މީހުންނަށް ދޭ ހަމަލާތައް 25 އިންސައްތަ ވަނީ އިތުރުވެފައެވެ.