ޚަބަރު
ޕާޓީ ބަދަލުކޮށްފިނަމަ އިސްތިއުފާދޭން ޖެހޭ ޤާނޫނުގެ މާއްދާތަކެއް ބަދަލުކުރުމަށް ހައިކޯޓަށް ހުށައަޅައިފި
ދިވެހިރާއްޖޭގެ ހައިކޯޓް. ފޮޓޯ:ރާއްޖެ އެމްވީ
ސިޔާސީ ޕާޓީ ބަދަލުކޮށްފިނަމަ މެމްބަރުކަމުން އިސްތިއުފާދޭން ޖެހޭ ޤާނޫނު، އެންޓި ޑިފެކްޝަން ޤާނޫނުގެ މާއްދާތަކެއް ބަދަލުކުރުމަށް ހައިކޯޓަށް ހުށައަޅައިފިއެވެ.
މިކަމާއި ގުޅޭ ގޮތުން ހައިކޯޓުން ބުނެފައިވަނީ މިމައްސަލަ އެކޯޓަށް ހުށަައެޅައިފައިވަނީ އަމިއްލަ ފަރާތަކުން ކަމަށެވެ. އޭނާ ބަދަލުކުރަން ހުށައެޅި މާއްދާތައް ސާފުވެފައިނުވިނަމަވެސް މިކަން ހައިކޯޓުން ވަނީ މީޑިއާއަށް ޔަޤީންކޮށްދީފައެވެ.
އެންޓި ޑިފެކްޝަން ބިލް ރައްޔިތުންގެ މަޖިލީހުން ފާސްކޮށްފައިވަނީ، މިއަހަރުގެ އޭޕްރިލްމަހުގެ އެއްވަނަ ދުވަހުއެވެ. އެ ޤާނޫނުގައި ބުނާ ގޮތުން އިންތިޚާބުވި ޕާޓީން އަމިއްލައަށް ވަކިވެ، އެހެން ޕާޓީއަކަށް ބަދަލުވެއްޖެނަމަ ނުވަތަ އަމިއްލަ ގޮތުން އިންތިޚާބުވި މެންބަރަކު އެއްވެސް ސިޔާސީ ޕާޓީއެއްގެ މެންބަރަކަށްވާ ހާލަތުގައި މެންބަރަކު ހަތް ދުވަސް ތެރޭގައި އިސްތިއުފާ ދޭން ޖެހޭނެ އެވެ.
ނަމަވެސް އެ މުއްދަތުގައި އިސްތިއުފާ ނުދީފި ނަމަ ވާނެ ގޮތެއް ނުވަތަ އެޅޭނެ ފިޔަވަޅެއް އެ ޤާނޫނުގައި ބަޔާންކޮށްފައެއް ނެތެވެ.
މަޖިލިސް މެންބަރުންގެ އިތުރުން ރަށު ކައުންސިލްތަކާއި ސިޓީ ކައުންސިލްތަކުގެ އިތުރުން އަތޮޅު ކައުންސިލްތަކުގެ މެމްބަރުންގެ މައްޗަށް އެ ޤާނޫނުގެ އުސޫލު ހިނގާނެ ކަމަށް އެ ޤާނޫނުގައި ބުނެފައިވެ އެވެ.
