ޙިޒްބުﷲ އިން އިޒްރާއިލަށް ވަރުގަދަ ހަމަލާތަކެއް ދީފި

ހިޒްބުالله ޖަމާއަތުން "އަލް-އަސްފުލް މައުކޫލް" ގެ ނަމުގައި އާ އަސްކަރީ އޮޕަރޭޝަނެއް ފަށައި، އިޒްރޭލުގެ އުތުރާއި މެދުތެރޭގެ ސަރަހައްދުތަކަށް 150 އަށްވުރެ ގިނަ ރޮކެޓް ފޮނުވާލައިފިއެވެ. މިއީ އެމެރިކާ އާއި އިޒްރޭލުން އީރާނާ ދެކޮޅަށް ފެށި ހަނގުރާމައިގައި މިހާތަނަށް ދިން އެންމެ ވަރުގަދަ ރޮކެޓް ހަމަލާތަކެވެ.

އިޒްރޭލުގެ މީޑިއާތަކުން ރިޕޯޓްކޮށްފައިވާ ގޮތުގައި، ހިޒްބުالله އިން ވަނީ އެއްފަހަރާ 60 އަށްވުރެ ގިނަ ރޮކެޓް އިޒްރޭލުގެ އުތުރުގެ ވަޒަންވެރިން އުޅޭ ސަރަހައްދުތަކަށް ފޮނުވާލާފައެވެ. މި ހަމަލާތަކާ ގުޅިގެން އިޒްރޭލުގެ ބޮޑު ސަރަހައްދެއްގައި އިންޒާރުގެ ސައިރަން އަޅައި، ގާތްގަނޑަކަށް އެއް މިލިއަން މީހުން ރައްކާތެރި ބިންގަރާސްތަކަށް ވަނުމަށް ވަނީ އަންގާފައެވެ.

މި ހަމަލާތަކާ އެކު، އީރާނުން ވެސް ވަނީ އިޒްރޭލަށް އަމާޒުކޮށް މިސައިލް ހަމަލާތަކެއް ދީފައެވެ. އިޒްރޭލުގެ ސަލާމަތީ އޮފިޝަލުންނާ ހަވާލާދީ މީޑިއާތަކުން ބުނާ ގޮތުގައި، މިއީ ހިޒްބުالله އާއި އީރާނުން ގުޅިގެން ދިން ފުރަތަމަ ކޯޑިނޭޓެޑް ހަމަލާއެވެ. ހިޒްބުالله އިން ބުނެފައިވަނީ މި ހަމަލާތަކަކީ އީރާނުގެ ރޫހާނީ ލީޑަރު އަލީ ޚާމަނާއީ އަވަހާރަކޮށްލުމުގެ ބަދަލުހިފުމެއް ކަމަށެވެ.

އެމެރިކާ އާއި އިޒްރޭލުން ފެބްރުއަރީ 28 ގައި ފެށި މި ހަނގުރާމައަށް މިހާރު 12 ދުވަސް ވެފައިވާއިރު، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ އީރާނުގައި ދެން ހަމަލާދޭނެ މާ ގިނަ އަމާޒުތަކެއް ނެތް ކަމަށާއި ހަނގުރާމަ ވަރަށް އަވަހަށް ނިމިދާނެ ކަމަށެވެ. ނަމަވެސް އެމެރިކާގެ ސެންޓްރަލް ކޮމާންޑުން ބުނާ ގޮތުގައި މިހާތަނަށް އީރާނުގެ 5,500 އަށްވުރެ ގިނަ ތަނަކަށް ވަނީ ހަމަލާދީފައެވެ.

އިޒްރޭލުން މިހާރު ދަނީ ލުބުނާނުގެ ތެރޭގައި އަސްކަރީ އޮޕަރޭޝަންތައް އިތުރަށް ފުޅާކުރުމަށް ތައްޔާރުވަމުންނެވެ. އިޒްރޭލުގެ އަސްކަރިއްޔާއިން ވަނީ ރޮކެޓްތައް ވެއްޓުނު ތަންތަނާއި ލިބުނު ގެއްލުންތަކުގެ މައުލޫމާތު ހާމަނުކުރުމަށް ހަރުކަށި ފިޔަވަޅުތަކެއް އަޅާފައެވެ.