ތިނަދޫ ކޯލްޑް ސްޓޯރޭޖުގެ މަސައްކަތް އަލުން ފެށި، 2025 ގައި ނިންމުމަށް އަމާޒުކޮށްފި

ގދ. ތިނަދޫ ސިޓީގައި ބިނާކުރަން ފަށާފައިވާ 1000 ޓަނުގެ ކޯލްޑް ސްޓޯރޭޖުގެ މަސައްކަތް ހުއްޓިފައި އޮތްއޮތުން ނިމުމަކަށް ގެނެސް، އެ ފެސިލިޓީ ނިންމުމުގެ މަސައްކަތް ސަރުކާރުން ވަނީ އަލުން ފަށާފައެވެ. މި މަޝްރޫޢުގެ އަމާޒަކީ މި އަންނަ އަހަރު މި ފެސިލިޓީ ނިންމާ ބޭނުން ކުރަން ފެށުމެވެ. މިއީ ހުވަދު އަތޮޅު ދެކުނުބުރީގައި އެންމެ އަވަހަށް އޮޕަރޭޝަނަށް ގެނެވޭ ކޯލްޑް ސްޓޯރޭޖަކަށް ވެގެންދާނެއެވެ.

19 ނޮވެންބަރު 2019 ގައި ގދ. ތިނަދޫގައި މަސް ރައްކާކުރާ ފެސިލިޓީތައް ގާއިމުކުރަން އިޢުލާނު ކުރެވުނު ނަމަވެސް، މި ކޯލްޑް ސްޓޯރޭޖުގެ ޢަމަލީ މަސައްކަތް ފެށިފައިވަނީ 12 ޖުލައި 2023 ގައެވެ. މިފްކޯއިން މި ސްޓޯރޭޖު އެޅުމުގެ މަސައްކަތް ހަވާލުކޮށްފައިވަނީ އެމްޓީސީސީއާއެވެ.

ތިނަދޫ ކޯލްޑް ސްޓޯރޭޖްގެ މަސައްކަތް ހުއްޓިފައިވަނިކޮށް، އެ ތަނުގެ މަސައްކަތް އަވަސްކުރުމަށް މަސްވެރި ވުޒާރާއިން މަޞްލަޙަތުވެރިންނާ މަޝްވަރާކޮށް، ދިމާވެފައިވާ ގޮންޖެހުންތަކަށް ޙައްލު ހޯދުމަށް މަސައްކަތްކޮށްފައިވެއެވެ.

މިއަހަރުގެ ސެޕްޓެންބަރު މަހު، މަސްވެރިކަމާބެހޭ ވަޒީރު އަޙްމަދު ޝިޔާމް ވަނީ ތިނަދޫއަށް ޒިޔާރަތްކޮށް، ކޯލްޑް ސްޓޯރޭޖްގެ މަސައްކަތް ކުރިއަށްދާގޮތް ބައްލަވާފައެވެ. ވަޒީރު ޝިޔާމް ވިދާޅުވެފައިވަނީ، ތިނަދޫގެ ކޯލްޑް ސްޓޯރޭޖްގެ މަސައްކަތް 2025 ވަނަ އަހަވަނަ އަހަރު ނިންމައި މަސްގަންނަން ފެށުމަށް ރައީސް ޑރ. މުޙައްމަދު މުޢިއްޒު ބޭނުންފުޅުވާ ކަމަށާއި، އެކަމަށްޓަކައި ވުޒާރާއިން މަސައްކަތް އަވަސްކުރުމަށް ކުރެވެންހުރި ކަންކަން ކުރަމުންދާ ކަމަށެވެ.

މީގެއިތުރުން، އިންޑިއާގެ އެގްޒިމް ބޭންކުގެ އެލް.އޯ.ސީގެ ދަށުން ކުރިއަށް ގެންދާ ފެލިވަރު ކޯލްޑް ސްޓޯރޭޖް އިތުރުކުރުމުގެ މަޝްރޫޢު 2025 އަށް ނިންމާލެވޭނެ ކަމަށް ބެލެވެއެވެ. މި މަޝްރޫޢު ނިމުމުން، މިހާރު ފެލިވަރުގައި ރައްކާކުރެވޭ 750 ޓަނުގެ ގަނޑުމަސް، 2025 ވަނަ އަހަރުގެ އޭޕްރީލް މަހު ނިމޭއިރު ޖުމްލަ 4750 ޓަނަށް އިތުރުވެގެންދާނެއެވެ. މިއީ އުތުރުގައި މަސްކިރުވުމުގައި މިހާރު ދިމާވާ ދަތިތައް ވަރަށް ބޮޑަށް ޙައްލުވެގެންދާނެ މަޝްރޫޢެއް ކަމަށް ބެލެވެއެވެ.