ސްޓެލްކޯ މިއަހަރު ނިންމާނީ 120 މިލިއަން ރުފިޔާގެ ފައިދާއާއެކު

ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) މިއަހަރު ނިންމާނީ 120 މިލިއަން ރުފިޔާގެ ފައިދާއާއެކު ކަމަށް އެ ކުންފުނީގެ މެނޭޖިންގ ޑިރެކްޓަރު ހުސައިން ފަހުމީ ވިދާޅުވެއްޖެއެވެ.

ސަރުކާރަށް 52 ހަފްތާ ފުރުމާ ގުޅިގެން ޕީއެސްއެމް ނިއުސްއަށް ދެއްވި ޚާއްސަ އިންޓަވިއުއެއްގައި ފަހުމީ ވިދާޅުވީ، 2023 ވަނަ އަހަރަކީ ސްޓެލްކޯއަށް 20 މިލިއަން ރުފިޔާގެ ގެއްލުން ލިބުނު އަހަރެއް ނަމަވެސް، 2024 ވަނަ އަހަރު ނިމިގެންދާނީ 120 މިލިއަން ރުފިޔާގެ ފައިދާއަކާއެކު ކަމަށެވެ.

އަޅުގަނޑުމެންގެ ނަތީޖާ ވަރަށް ވެސް ރަނގަޅު. މަގާމާ ހަވާލުވިއިރު ކުންފުނީގައި ވަރަށް ގިނަ ގޮންޖެހުންތައް ހުރި. ކަސްޓަމަރުންގެ ރައްޔިތުންގެ ކަންބޮޑުވުންތައް ހުރި. އަދި މުވައްޒަފުންގެ ކަންބޮޑުވުންތައް ހުރި

ފަހުމީ ވިދާޅުވިއެވެ.

ކުންފުންޏާ ހަވާލުވިއިރު އެންމެ ބޮޑު ގޮންޖެހުމަކަށް ދިމާވީ މުވައްޒަފުންގެ ނުތަނަވަސްކަން ކަމަށް ފާހަގަކުރައްވައި، އެ ނުތަނަވަސްކަން ފިލުވާދީފައިވާ ކަމަށް ފަހުމީ ވިދާޅުވިއެވެ. އެގޮތުން 1 އަހަރު ނިމިގެންދިޔައިރުވެސް އެއްވެސް މުވައްޒަފަކު ވަޒީފާއިން ވަކި ނުކުރާކަން އެމްޑީ ފާހަގަކުރެއްވިއެވެ.

ފަހުމީ އިތުރަށް ވިދާޅުވީ، އަންނަ އަހަރު ނިމުމުގެ ކުރިން ސްޓެލްކޯގެ ހުރިހާ ކަސްޓަމަރުންނަށް ސްމާޓް މީޓަރގެ ޚިދުމަތް ފޯރުކޮށްދޭނެ ކަމަށެވެ. މިއަހަރު ނިމުމުގެ ކުރިން ހުޅުމާލޭ 2 ވަނަ ފިޔަވަހީގައި ސްމާޓް މީޓަރ ހަރުކުރުމުގެ މަސައްކަތް ފަށާނެ ކަމަށްވެސް އޭނާ ވިދާޅުވިއެވެ.

ސްމާޓް މީޓަރ ޕްރޮޖެކްޓާއެކު ކަރަންޓު ބިލު ބޮޑުވެގެން ކަސްޓަމަރުންގެ ފަރާތުން އަންނަ ކަންބޮޑުވުންތަކަށް ހައްލު ލިބިގެންދާނެ ކަމަށް ސްޓެލްކޯގެ މެނޭޖިންގ ޑިރެކްޓަރު ހުސައިން ފަހުމީ ވިދާޅުވިއެވެ.