އީރާނުގެ ޑްރޯންތަކުން ދިފާއުވުމަށް އެހީތެރިވުމަށް ޔޫކްރޭނުގެ 201 އަސްކަރީ މާހިރުން ގަލްފް ސަރަހައްދަށް ފޮނުވައިފި

އީރާނުން އުފައްދާފައިވާ ޑްރޯން ހަމަލާތަކުން ދިފާއުވުމަށް އެހީތެރިވުމުގެ ގޮތުން ޔޫކްރޭނުގެ 200 އަށްވުރެ ގިނަ އަސްކަރީ މާހިރުން ގަލްފް ސަރަހައްދާއި މެދުއިރުމަތީގެ ގައުމުތަކުގައި މިހާރު ހަރަކާތްތެރިވަމުންދާ ކަމަށް ޔޫކްރޭނުގެ ރައީސް ވޮލޮޑިމީރް ޒެލެންސްކީ ވިދާޅުވެއްޖެއެވެ. 

އިނގިރޭސިވިލާތުގެ ޕާލަމެންޓުގެ މެންބަރުންނާ މުހާތަބު ކުރައްވައި ވާހަކަދައްކަވަމުން ޒެލެންސްކީ ވިދާޅުވީ، ޑްރޯންތަކުން ދިފާއުވުމަށް ހާއްސަ 201 މާހިރުން މިހާރު އެ ސަރަހައްދުގައި އެބަތިބި ކަމަށާއި، އިތުރު 34 މީހަކު ފޮނުވުމަށް ތައްޔާރުވެފައިވާ ކަމަށެވެ.

އީރާނުގެ 'ޝާހިދު' ޑްރޯންތަކާ ދެކޮޅަށް މަސައްކަތްކުރުން
ޒެލެންސްކީ ވިދާޅުވި ގޮތުގައި މި މާހިރުންނަކީ އީރާނުން ފަރުމާކޮށްފައިވާ "ޝާހިދު" ކަމިކާޒޭ ޑްރޯންތަކުން ދިފާއުވާނެ ގޮތުގެ ފުރިހަމަ ތަމްރީނާއި ތަޖުރިބާ ލިބިފައިވާ ފަރާތްތަކެކެވެ. ރަޝިޔާއިން 2022 ވަނަ އަހަރުން ފެށިގެން ޔޫކްރޭނާ ދެކޮޅަށް ކުރަމުންދާ ހަނގުރާމައިގައި މި ވައްތަރުގެ ޑްރޯންތައް ދަނީ ބޭނުންކުރަމުންނެވެ. "އަޅުގަނޑުމެންގެ ޓީމުތައް މިހާރު ތިބީ އެމިރޭޓްސް، ގަތަރު، ސައުދީ އަރަބިއްޔާގައި. އަދި ކުވެއިތަށް ދިއުމުގެ މަގުމަތީގައި،" ޒެލެންސްކީ ވިދާޅުވިއެވެ.

ޔޫކްރޭނުގެ ރައީސް ފާހަގަކުރެއްވި ގޮތުގައި އީރާނުން ވަނީ ރަޝިޔާއަށް ޝާހިދު-136 ވައްތަރުގެ ޑްރޯންތައް ފޯރުކޮށްދީ، އެ ތަކެތި އުފައްދާނެ ޓެކްނޮލޮޖީވެސް ދީފައެވެ. އަދި މިހާރު މެދުއިރުމަތީގައި ބޭނުންކުރާ އީރާނުގެ ޑްރޯންތަކުގައި ރަޝިޔާގެ އުފެއްދުންތައް ހިމެނޭ ކަމުގެ ހެކި ލިބިފައިވާ ކަމަށްވެސް އޭނާ ވިދާޅުވިއެވެ. ޒެލެންސްކީ ސިފަކުރެއްވި ގޮތުގައި ރަޝިޔާ އާއި އީރާނަކީ "ނަފްރަތުގެ ބައިވެރިން" ކަމަށާއި، އެހެންކަމުން އެ ދެ ގައުމަކީ ހަތިޔާރުގެ ބައިވެރިންނެވެ.

ޔޫކްރޭނުން މިހާރު ދަނީ ދުވާލަކު މަދުވެގެން 2,000 ޑްރޯން އިންޓަސެޕްޓަރު އުފައްދަމުންނެވެ. މީގެ ތެރެއިން ދެބައިކުޅަ އެއްބައި ޔޫކްރޭނުގެ ދިފާއަށް ބޭނުންކުރާއިރު، ބާކީ ބައި އެކުވެރި ގައުމުތަކަށް ފޯރުކޮށްދިނުމުގެ ގާބިލުކަން ހުރި ކަމަށް ޒެލެންސްކީ ވިދާޅުވިއެވެ. "އެމިރޭޓްސް ނުވަތަ ޔޫރަޕްގައި ޝާހިދު ޑްރޯންއެއް ހުއްޓުވަން ޖެހިއްޖެނަމަ، އެކަން ކުރުމުގެ ގާބިލުކަން އަޅުގަނޑުމެންގެ ކިބައިގައި އެބަހުރި،" އޭނާ ވިދާޅުވިއެވެ.

މި ދަތުރުފުޅުގައި ޒެލެންސްކީ ވަނީ އިނގިރޭސި ބޮޑުވަޒީރު ކިއަރ ސްޓާމާ އަދި ނޭޓޯގެ ވެރިޔާ މާކް ރޫޓާއާ ބައްދަލުކުރައްވާފައެވެ. ބޮޑުވަޒީރު ސްޓާމާ ވިދާޅުވީ އީރާނުގެ މައްސަލައިގެ ފައިދާ ރަޝިޔާގެ ރައީސް ލަޑީމިއަރ ޕޫޓިންއަށް ނެގުމުގެ ފުރުސަތު ދީގެން ނުވާނެ ކަމަށެވެ.