ޣައްޒާގައި އދ ގެ އެހީގެ ލޮރީތަކުން ވައްކަންކޮށްފި

ޣައްޒާގައި އދ ގެ ފަލަސްޠީނު ރެފިއުޖީންނަށް އެހީވާ އޭޖެންސީ (އަންރުވާ) އިން ބުނެފައިވަނީ ހޮނިހިރު ދުވަހު ކާބޯތަކެތި އުފުލަމުންދިޔަ އދ ގެ 109 އެހީގެ ލޮރީއަކުން ވައްކަން ކޮށްފައިވާ ކަމަށެވެ. މިއީ މިފަދަ އެންމެ ނުރައްކާތެރި ހާދިސާތަކުގެ ތެރެއިން އެއް ހާދިސާ ކަމަށް ބެލެވެއެވެ.

ލޮރީތައް އިސްރާއީލުގެ ބާރުގެ ދަށުގައިވާ ކެރެމް ޝަލޯމް ކްރޮސިންގ މެދުވެރިކޮށް ދެކުނު ޣައްޒާއަށް ވަނުމަށްފަހު، 97 ލޮރީ ގެއްލި، ޑްރައިވަރުންނަށް ބަޑިން ބިރުދައްކައި އެހީތައް ބާލަން މަޖުބޫރުކުރި ކަމަށް ވަނީ ބުނެފައެވެ. މަންޒަރު ލޮލަށް ފެނުނު މީހުން ބުނާ ގޮތުގައި މޫނު ނިވާކޮށްގެން ތިބި ބަޔަކު ގްރެނޭޑު އުކައިގެން މި ޤާފިލާއަށް ހަމަލާދީފައިވެއެވެ.

އަންރުވާގެ ކޮމިޝަނަރ ޖެނެރަލް ފިލިޕް ލަޒަރީނީ ވަނީ މި ޢަމަލު ހިންގި ފަރާތްތައް ފާހަގަނުކުރެވޭ ކަމަށާއި، ނަމަވެސް ޣައްޒާގައި "މަދަނީ އިންތިޒާމުތައް މުޅިން ނެތިގޮސްފައިވާތީ" އެތަނުގައި މަސައްކަތްކުރުމަކީ "ނުކުރެވޭނެ ކަމަކަށް" ވެފައިވާ ކަމަށް ވިދާޅުވެފައެވެ.

އަންރުވާއިން ބުނާ ގޮތުގައި ވަގުތުން ފިޔަވަޅު ނޭޅިއްޖެނަމަ، އިންސާނީ އެހީއަށް ބަރޯސާވެފައިވާ 2 މިލިއަން މީހުންނަށް ކާބޯތަކެތީގެ ދަތިކަން އިތުރަށް ގޯސްވާނެއެވެ. އދ ގެ އެހީގައި ކުރެވުނު ދިރާސާއަކުން މި މަހުގެ ކުރީކޮޅު އިންޒާރުދީފައިވަނީ "އުތުރު ޣައްޒާގެ ސަރަޙައްދުތަކުގައި ބަނޑުހައިހޫނުކަން ފެތުރުމުގެ ވަރަށް ބޮޑު ފުރުޞަތެއް" އޮތް ކަމަށެވެ.

މި ހާދިސާ ހިނގާފައިވަނީ އިސްރާއީލުގެ ބާރީލުގެ ބާރުތަކުން އުތުރުގައި ބޮޑު ހަނގުރާމައެއް ފެށުމަށްފަހު، އަދި 2023 ގެ އޮކްޓޯބަރުގައި އިސްރާއީލާއި ހަމާސްއާ ދެމެދު ހަނގުރާމަ ފެށުނު ފަހުން އެއްވެސް މަހަކާ އަޅާބަލާއިރު އެންމެ މަދު އެހީގެ ލޮރީތަކެއް ޣައްޒާއަށް ވަދެފައިވާކަމަށް އދ އިން ބުނުމަށްފަހުގައެވެ.

ހޮނިހިރު ދުވަހުގެ މި ހާދިސާއާ ގުޅިގެން ޣައްޒާގެ ހަމާސް ހިންގާ އިންޓީރިއަރ މިނިސްޓްރީން ބުނެފައިވަނީ އެ ތަނުގެ ސެކިއުރިޓީ މުވައްޒަފުން "ގަބީލާތަކުގެ ކޮމިޓީތަކާ" ގުޅިގެން ހިންގި އޮޕަރޭޝަނެއްގައި "އެހީގެ ޓްރަކުތައް ވަގަށް ނެގުމުގައި ބައިވެރިވި ގޭންގުތަކުގެ 20 އަށްވުރެ ގިނަ މެންބަރުން" މަރާލާފައިވާ ކަމަށެވެ.