ސްޓެލްކޯއިން މާލޭގެ މަގުތަކުގެ ލައިޓްތައް ސްމާޓްކުރުމުގެ މަސައްކަތް ފަށައިފި

ސްޓެލްކޯއިން މާލޭގެ މަގުތަކުގައި ހަރުކޮށްފައިވާ ލައިޓްތައް ދިއްލާ ނިއްވޭގޮތް ހެދުމުގެ މަސައްކަތް ފަށައިފިއެވެ. މިކަން ހާމަކުރެއްވީ ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީއެވެ.

ސަރުކާރަށް 52 ހަފްތާ ފުރުމާ ގުޅިގެން ޕީއެސްއެމް ނިއުސްއަށް ދެއްވި ޚާއްސަ އިންޓަވިއުއެއްގައި ފަހުމީ ވިދާޅުވީ، މިއީ އެ ކުންފުނިން ސްމާޓް ވުމާއި ދިމާލަށް ކުރާ ދަތުރުގައި ކުރުމަށް ނިންމާފައިވާ ކަމެއް ކަމަށެވެ. އަދި މިކަމަކީ ޚަރަދު ކުޑަކުރުމަށް ކުންފުނިން ކުރަމުންދާ ގިނަ މަސައްކަތްތަކުގެ ތެރެއިން އެއް މަސައްކަތް ކަމުގައިވެސް  ފާހަގަކުރެއްވިއެވެ.

ފަހުމީ ވިދާޅުވި ގޮތުގައި، މިހާރު މަގުމަތީގައި ހުރި ލައިޓްތައް އޮޓޯމެޓިކްކޮށް ނިވި ދިއްލޭތީ ގާތްގަނޑަކަށް ކޮންމެ ދުވަހަކު 40 މިނެޓް ބޭކާރުވެއެވެ. މިއީ ވަރަށް ބޮޑު ޚަރަދެއް ކަމަށް ފާހަގަކުރައްވައި، މިހާރު މަސައްކަތްކުރަމުންދަނީ ސްޓެލްކޯއަށް އަމިއްލައަށް ލައިޓްތައް ޖައްސާ ނިއްވާލެވޭގޮތަށް ހެދުމަށް ކަމަށް އޭނާ ވިދާޅުވިއެވެ.

"ސްމާޓް މީޓަރ ސިސްޓަމްގެ ތެރެއިން އަޅުގަނޑުމެން ވިސްނާފައި ހުރީ މަގުމަތީގައި މިހުރި ލައިޓްތައް އަޅުގަނޑުމެން އޮންކޮށް އޮފްކޮށް ޖައްސާގޮތަށް ހެދުން. ސަބަބަކީ މިހާރު މިއިންނަނީ ޓައިމަރއެއް ލާފައި. އެ އެއްޗެހިތައް ބައިގަޑިއިރު ކުރިން އެބަ ދިއްލޭ. އަހަރު ދުވަހަށް ބަލަންޏާ ވަރަށް ބޮޑު ހޭދައެއް އެކުރެވެނީ," ފަހުމީ ވިދާޅުވިއެވެ.

މީގެ އިތުރުން، ގޭބީސީތަކުގައި ސްމާޓް މީޓަރ ހަރުކުރުމުގެ މަސައްކަތްވެސް ވަރަށް ޚާއްސަ އިސްކަމެއްދީގެން ކުރަމުން އަންނަ ކަމަށާއި، އަންނަ އަހަރު ނިމުމުގެ ކުރިން ސްޓެލްކޯގެ ހުރިހާ ކަސްޓަމަރުންނަށް ސްމާޓް މީޓަރގެ ޚިދުމަތް ފޯރުކޮށްދޭނެ ކަމަށް ފަހުމީ ވިދާޅުވިއެވެ. އަދި މިއަހަރު ނިމުމުގެ ކުރިން ހުޅުމާލޭ 2 ވަނަ ފިޔަވަހީގައި ސްމާޓް މީޓަރ ހަރުކުރުމުގެ މަސައްކަތް ފަށާނެ ކަމަށްވެސް ހާމަކުރެއްވިއެވެ.

ސްމާޓް މީޓަރ ޕްރޮޖެކްޓާއެކު ކަރަންޓް ބިލް ބޮޑުވެގެން ކަސްޓަމަރުންގެ ފަރާތުން އަންނަ ކަންބޮޑުވުންތަކަށް ހައްލު ލިބިގެންދާނެ ކަމަށް ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވިއެވެ.