މީޑިއާ ކޮންޓްރޯލް ކުރުމުގެ ބިލް އަނބުރާ ގެންދަން ހުށަހަޅައިފި

ސަރުކާރަށް މީޑިއާތައް ކޮންޓްރޯލް ކުރެވޭ ގޮތަށް ރައްޔިތުންގެ މަޖިލީހަށް ހުށަހެޅުއްވި ބިލަށް ސަރުކާރު ހިންގާ ޕާޓީ ޕީއެންސީގެ ތާއިދު ނުލިބޭނެތީ، އަނބުރާ ގެންދަން ހުށަހަޅުއްވާފައިވާ ކަމަށް ތުޅާދޫ ދާއިރާގެ އަމިއްލަ މެމްބަރު އަބްދުލްހަންނާނު އަބޫބަކުރު މިއަދު ވިދާޅުވެއްޖެ އެވެ.

ހަންނާން ވިދާޅުވީ، މީޑިއާ އެންޑް ބްރޯޑްކާސްޓިން ކޮމިޝަންގެ ބިލް އަނބުރާ ނަގަން މަޖިލިހުގައި އެދިވަޑައިގަތީ އެއީ ސަރުކާރުގެ ސިޔާސަތު ނޫން ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވާތީ ކަމަށެވެ.

ސަރުކާރު ހިންގާ ޕީއެންސީގައި 75 މެންބަރުން މި ތިބެނީ. ދެން ތިބެނީ 14 ވަރަކަށް މެންބަރުން. އެހެންވީމާ ސަރުކާރު މެންބަރުންގެ ތާއިދާ ނުލައި މިއީ ކުރިއަށް ގެންދެވޭނެ ބިލަކަށް ނުވާތީ އަނބުރާ ނަގަން ނިންމީ

ހަންނާން ވިދާޅުވި އެވެ.

މި ބިލަކީ މީޑިއާތަކުގެ މިނިވަންކަމަށް ނުރައްކާވެދާނެ ކަމަށް ބުނެ ނޫސްވެރިންގެ ފަރާތުން ބޮޑެތި ކަންބޮޑުވުންތަކެއް ފާޅުކޮށްފައިވާ ބިލެކެވެ. މީޑިއާތަކުގެ ކަންބޮޑުވުންތަކުގެ ތެރޭގައި، ކޮމިޝަނުގެ މެންބަރުން އައްޔަންކުރުމުގެ ބާރު ސަރުކާރަށް ލިބިދިނުމާއި، މީޑިއާތަކާއި ނޫސްވެރިންނަށް ބޮޑެތި ޖޫރިމަނާތައް ކުރެވޭނެ ގޮތް ހަމަޖެހިފައި އޮތުން ހިމެނެއެވެ.

ސަރުކާރަށް އެއް އަހަރު ފުރުން ފާހަގަކުރުމަށް ބޭއްވި ޖަލްސާގައި ރައީސް މުއިއްޒު ވިދާޅުވެފައިވަނީ މި ބިލަކީ އެ މަނިކުފާނު ގަބޫލުފުޅު ކުރައްވާ ސިޔާސަތެއް ނޫން ކަމަށެވެ. އަދި މީޑިއާތައް ކޮންޓްރޯލް ކުރާ ހިތްޕުޅު ނުވާ ކަމަށާއި ބޭނުންފުޅުވަނީ މީޑިއާތަކަށް މިހާރަށް ވުރެ ބޮޑަށް މިނިވަންކަން ދޭން ކަމަށް ވެސް ވިދާޅުވި އެވެ.

މި ބިލާ ދެކޮޅަށް ނޫސްވެރިންގެ ޖަމިއްޔާ އެމްޖޭއޭ އިން "ހަތެއްގެ ހައްގުގައި" ގެ ނަމުގައި ކަމްޕެއިނެއް ފަށައި، 100 އަށް ވުރެ ގިނަ ނޫސްވެރިން ސޮއިކޮށްފައިވާ ޕެޓިޝަނެއް ވެސް ތައްޔާރުކޮށްފައިވެއެވެ. އަދި އިދިކޮޅު އެމްޑީޕީން ވެސް މި ބިލް އަނބުރާ ގެންދަން ގޮވާލާފައިވެއެވެ.

މިހާރު މި ބިލް އޮތީ ފުރަތަމަ ކިޔުން އިއްވައި، އިބްތިދާއީ ބަހުސް ފެށުމުގެ މަރުހަލާގައެވެ. ނަމަވެސް، ސަރުކާރު ހިންގާ ޕާޓީގެ ތާއީދު ނުލިބުމާއެކު، މި ބިލް އަނބުރާ ގެންދިއުމަށް ވަނީ ހުށައަޅާފައެވެ.