ނިލަންދޫ ނަރުދަމާ ނިޒާމުގެ މަސައްކަތް އެމްޑަބްލިއުއެސްސީއާ ހަވާލުކޮށްފި

ފ. ނިލަންދޫގެ ނަރުދަމާ ނިޒާމު ޑިޒައިންކުރުމާއި އެ ޕްރޮޖެކްޓުގެ ޢަމަލީ މަސައްކަތް ކުރުމަށް ސަރުކާރުން އެމްޑަބްލިއުއެސްސީއާ ހަވާލުކޮށްފިއެވެ.

އިމާރާތްކުރުމާއި ބިނާރާ ބެހޭ ވުޒާރާއިން ވިދާޅުވީ ނިލަންދޫގެ ނަރުދަމާ ނިޒާމު ޑިޒައިންކުރުމާއި އަމަލީ މަސައްކަތް ކުރިއަށް ގެންދިއުމުގެ އެއްބަސްވުމުގައި އެމްޑަބްލިއުއެސްސީއާއެކު ސޮއިކޮށްފައިވާ ކަމަށެވެ. މި އެއްބަސްވުމުގައި އެ ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރު އިބްރާހިމް ތާއާމް މުޙައްމަދެވެ. އެމްޑަބްލިއުއެސްސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަބްދުލް މަތީން މުހައްމަދެވެ.

މި މަޝްރޫޢަކީ 180 ދުވަހުގެ މުއްދަތަކަށް 2023 ވަނަ އަހަރު ފެނަކައާ ހަވާލުކުރެވިގެން ހިންގުނު މަޝްރޫއެއް ކަމަށެވެ. މި މަޝްރޫއުގެ ދަށުން މިހާރު ބޭނުންކުރަމުންދާ ވެކިއުމް ނިޒާމުގެ ސަބަބުން ރައްޔިތުންނަށް ދިމާވަމުންދާ ދަތިތައް ހައްލުކުރުމަށްޓަކައި، މިހާރު ހުރި ނަރުދަމާ ނިޒާމު ގްރެވިޓީ ނިޒާމަކަށް ބަދަލުކުރެވޭނެ ކަމަށް އެ ވުޒާރާއިން ވިދާޅުވެއެވެ.

އެ މަޝްރޫއު ނިމި ޙިދުމަތް ދޭން ފެށުމާއެކު އެރަށުގެ ރައްޔިތުންނަށް ފަސޭހަކަމާއެކު ނަރުދަމާގެ ޚިދުމަތްތައް ލިބިގެންދާނެއެވެ.