އީރާނަށް ޓްރަމްޕް ދެއްވި އިންޒާރާއެކު އޭޝިއާގެ ހިއްސާގެ ބާޒާރުތައް ވަރަށް ބޮޑަށް ވެއްޓިއްޖެ

އީރާނުން ސްޓްރެއިޓް އޮފް ހޯމޫޒް އަލުން ހުޅުވާލުމަށް ނުވަތަ އެ ގައުމުގެ ހަކަތައިގެ އިންފްރާސްޓްރަކްޗާ ސުންނާފަތިކޮށްލާނެ ކަމަށް ބުނެ އެމެރިކާގެ ރައީސް ޑޮނަލްޑް ޓްރަމްޕް ދެއްވި އިންޒާރާ ގުޅިގެން، އޭޝިއާ ޕެސިފިކް ސަރަހައްދުގެ ހިއްސާގެ ބާޒާރުތައް މިއަދު ވަރަށް ބޮޑަށް ދަށަށް ގޮސްފިއެވެ.

ހޯމަ ދުވަހުގެ ހެނދުނުގެ ވިޔަފާރި ފެށުނުއިރު، ޖަޕާނުގެ ބެންޗްމާކް ނިކޭ 225 އިންޑެކްސް 4 އިންސައްތަ ދަށަށް ގޮސްފައިވާއިރު، ދެކުނު ކޮރެއާގެ ކޮސްޕީ ވަނީ 4.5 އިންސައްތަ ދަށަށް ގޮސްފައެވެ. މީގެ އިތުރުން ހޮންކޮންގުގެ ހޭންގް ސެންގް އިންޑެކްސް 2 އިންސައްތަ، އޮސްޓްރޭލިއާގެ އޭއެސްއެކްސް 200 ގާތްގަނޑަކަށް 1.6 އިންސައްތަ އަދި ނިއުޒީލެންޑުގެ އެންޒެޑްއެކްސް 50 ވަނީ 1.3 އިންސައްތަ ދަށަށް ގޮސްފައެވެ.

ރައީސް ޓްރަމްޕް ހޮނިހިރު ދުވަހު އިންޒާރު ދެއްވާފައިވަނީ، ދުނިޔޭގެ ތެލާއި ގޭހުގެ އެކްސްޕޯޓުގެ ފަސްބައިކުޅަ އެއްބައި ދަތުރުކުރާ ސްޓްރެއިޓް އޮފް ހޯމޫޒް ބަންދުކޮށްފައި އޮތް އޮތުން 48 ގަޑިއިރުގެ ތެރޭގައި ނިމުމަކަށް ނުގެނެސްފިނަމަ، އީރާނުގެ އިންޖީނުގެތައް "ފުނޑުފުނޑުކޮށްލާނެ" ކަމަށެވެ. ޓްރަމްޕްގެ މި އިންޒާރުގެ މުހުލަތު ހަމަވާނީ ގްރީނިޗް މީން ޓައިމުން މިރޭ 23:44 ގައެވެ.

މި ނުތަނަވަސްކަމާ ގުޅިގެން ތެލުގެ ބާޒާރަށް ވެސް ވަނީ ބޮޑެތި ލޮޅުންތަކެއް އަރާފައެވެ. ބްރެންޓް ކްރޫޑް ތެޔޮ ފީފާއެއްގެ އަގު 1.5 އިންސައްތަ މައްޗަށް ގޮސް 114 ޑޮލަރަށް އެރިއެވެ. އެމެރިކާއާއި އިސްރާއީލުން އީރާނާ ދެކޮޅަށް ފެށި ހަނގުރާމައަށް މަހެއްވާން ކައިރިވެފައިވާއިރު، ހަނގުރާމަ ފެށުނު ފަހުން ތެލުގެ އަގު ވަނީ 50 އިންސައްތައަށް ވުރެ ބޮޑަށް އުފުލިފައެވެ. މާހިރުން ލަފާކުރާ ގޮތުގައި މި މަގު ބަންދުވެފައި އޮންނަނަމަ ތެޔޮ ފީފާއެއްގެ އަގު 150 ނުވަތަ 200 ޑޮލަރަށް އެރުން އެކަށީގެންވެއެވެ.

އީރާނުން ބުނެފައިވަނީ ޓްރަމްޕްގެ އިންޒާރާ އެއްގޮތަށް އަމަލުކޮށްފިނަމަ، އެ ސަރަހައްދުގެ ހަކަތައާއި ފެނުގެ ނިޒާމުތަކަށް ރައްދު ހަމަލާދީ، މުޅި ކަނޑުގެ މަގު އެއްކޮށް ބަންދުކުރާނެ ކަމަށެވެ. މިހާރު އެ މަގުން ދަތުރުކުރަނީ ހަމައެކަނި ޗައިނާ، އިންޑިއާ އަދި ޕާކިސްތާނުގެ ދިދަ ޖަހާފައިވާ މަދު އުޅަނދުތަކެކެވެ.

މި މައްސަލައިގައި ޓްރަމްޕް ވަނީ އިނގިރޭސި ބޮޑުވަޒީރު ކިއަރ ސްޓާމާއާ ފޯނުން ގުޅުއްވައި މަޝްވަރާ ކުރައްވާފައެވެ. ދުނިޔޭގެ ހަކަތައިގެ ބާޒާރު ހަމައަކަށް އެޅުވުމަށްޓަކައި ސްޓްރެއިޓް އޮފް ހޯމޫޒް ހުޅުވާލުމަކީ "ކޮންމެހެން ކުރަންޖެހޭ ކަމެއް" ކަމަށް ދެ ބޭފުޅުން އެއްބަސްވެވަޑައިގެންފައިވާ ކަމަށް ބޮޑުވަޒީރުގެ އޮފީހުން ބުނެފައިވެއެވެ.