ތިނަދޫ ސިޓީގައި 50 ހައުސިން ޔުނިޓު ތަރައްޤީކުރުމާއި މަގު ހެދުމުގެ ތިންވަނަ ފިޔަވަހީގެ މަސައްކަތް ފަށައިފި

ތިނަދޫ ސިޓީގައި 50 ހައުސިން ޔުނިޓު ތަރައްޤީކުރުމާއި، އެ ސިޓީގެ މަގު ހެދުމުގެ ތިންވަނަ ފިޔަވަހީގެ މަސައްކަތް މިއަދު ރަސްމީކޮށް ފަށައިފިއެވެ. 

މި ދެ މަޝްރޫޢުގެ މަސައްކަތް ރަސްމީކޮށް ފައްޓަވައިދެއްވީ އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑޮކްޓަރ ޢަބްދުﷲ މުއްޠަލިބެވެ. ވަޒީރުގެ އިތުރުން  ރަސްމިއްޔާތުތަކުގައި ތިނަދޫ ދެކުނު ދާއިރާގެ މަޖިލިސް މެންބަރު މުހައްމަދު އަލްސަން އަހްމަދު، ތިނަދޫ އުތުރު ދާއިރާގެ މަޖިލިސް މެންބަރު ސައުދުﷲ ހިލްމީ އާއި އާރްޑީސީގެ މެނޭޖިން ޑިރެކްޓަރ އިބްރާހީމް ނަޡީމް ވެސް ބައިވެރިވެވަޑައިގަތެވެ.

ތިނަދޫ ސިޓީގެ މަގު ހެދުމުގެ މަސައްކަތް ހަވާލުކޮށްފައި ވަނީ ރޯޑު ޑިވެލޮޕްމެންޓް ކޯޕަރޭޝަނާއެވެ. އެ މަޝްރުޢުގެ ތެރެއިން ތިނަދޫ ސިޓީގެ 50 މަގެއް ތަރައްޤީ ކުރުމަށް ވަނީ ހަމަޖެހިފައެވެ. މި މަސައްކަތުގެ ތެރޭގައި މަގުތަކުގައި ތާރުއެޅުމާއި ފެން ހިންދާ ނިޒާމު ޤާއިމުކުރުން ވެސް ހިމެނެއެވެ. 

ގދ. ތިނަދޫ މަގުތައް ޒަމާނީ ފެންވަރަށް ތަރައްޤީ ކުރުމުގެ މަޝްރޫއުގެ ތިންވަނަ ފިޔަވަހީގެ އަމަލީ މަސައްކަތް ފަށައިފިއެވެ. އަމަލީ މަސައްކަތް ފައްޓަވައިދެއްވީ މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ޑރ. ޢަބްދުﷲ މުއްޠަލިބް އެވެ. އަދި އަރިހުގައި ތިނަދޫ… pic.twitter.com/aTSNANQsyr

— Road Development Corporation Ltd (@rdcmaldives) March 23, 2026

މި މަސައްކަތް އާރުޑީސީއާ ހަވާލުކޮށްފައި ވަނީ ފެބުރުވަރީ މަހުގެ 25 ވަނަ ދުވަހުއެވެ. މިއީ 1440 ދުވަސްތެރޭ ނިންމާ ގޮތަށް، 341 މިލިއަން ރުފިޔާއަށް އާރުޑީސީއާ ހަވާލުކޮށްފައިވާ މަޝްރޫއެކެވެ.

ތިނަދޫ ސިޓީގައި ހިންގާ ހައުސިން މަޝްރޫޢަކީ ކޮންޓްރެކްޓަރ ފައިނޭންސިން އުސޫލުން ހިންގާ މަޝްރޫޢެކެވެ. މި މަޝްރޫޢުގެ ކޮންޓްރެކްޓަރަކީ ސްވިފްޓް އިންޖިއަރިންގް ޕްރައިވެޓް ލިމިޓެޑެވެ. 

މި މަޝްރޫޢުގެ ދަށުން ތަރައްޤީ ކުރާނީ 3 ކޮޓަރީގެ 50 ހައުސިން ޔުނިޓެވެ. މި މަސައްކަތް ނިންމުމަށް ވަނީ 450 ދުވަހުގެ މުއްދަތެއް ދީފައެވެ.