ބޭހުގެ އަގު ހެޔޮކުރުމަށް ގެނައި ބަދަލަށް ބައެއް ފާމަސީތަކުން ދެކޮޅު: ހީނާ ވަލީދު

ސަރުކާރުން ބޭހުގެ އަގު ހެޔޮކުރުމަށް ގެނައި ބަދަލަށް ބައެއް ފާމަސީތަކުން ދެކޮޅުހަދަމުންދާކަމަށް އެންސްޕާގެ ސީއީއޯ އަދި ރައީސުލްޖުމްހޫރިއްޔާގެ އޮފީހުގެ ތަރުޖަމާނު ހީނާ ވަލީދު ވިދާޅުވެއްޖެއެވެ. މި މަޢުލޫމާތު ހީނާ ހާމަކުރެއްވީ އިއްޔެ ބޭއްވުނު ރައްޔިތުންގެ މަޖިލީހުގެ އިޖުތިމާޢީ ކޮމިޓީގެ ބައްދަލުވުމެއްގައެވެ.

ހީނާ ވިދާޅުވިގޮތުގައި، ސަރުކާރުން ބޭސް އަގުހެޔޮކުރުމަށް ބޭހުގެ ލިސްޓަށް ގެނައި ބަދަލު ގިނަ ފާމަސީތަކަކުން ބަލައިގަނެ، ޢަމަލުކުރަމުންދާއިރު، އަދިވެސް ދެތިން ފާމަސީއަކުން މި ބަދަލަށް އިއުތިރާޒުކުރަމުންދާކަން ފާހަގަކުރެވެއެވެ. އެހެންނަމަވެސް، އާސަންދަ މެދުވެރިކޮށް މި އަގުހެޔޮ ބޭސްތައް އެސްޓީއޯގެ ހުރިހާ ފާމަސީއަކުންވެސް ލިބެން ހުންނާނެކަމަށް އޭނާ ވިދާޅުވިއެވެ.

މިހާރު ބޭސް ލިސްޓުގެ ދަށުން އަގުހެޔޮކޮށް 10 ބޭހެއް ރާއްޖެ އެތެރެކޮށް ދައުރުކުރަން ފަށާފައިވާކަމަށް ހީނާ ހާމަކުރެއްވިއެވެ. އަދި ރާއްޖޭގައި ބޭހުގެ އަގުތައް ހުރީ ރައްޔިތުންގެ އަތް ނުފޯރާ ފަށުގައިކަމަށާއި، ސަރަހައްދީ ޤައުމުތަކާ އަޅާބަލާއިރު 15 ގުނަ ރާއްޖޭގައި ބޭހުގެ އަގު ބޮޑުކޮށް ވިއްކަމުންދާކަމަށް ވިދާޅުވިއެވެ. މީގެ އިތުރުން، 300 އިންސައްތައާއި 4000 އިންސައްތައިގެ ފައިދާ ލާފައި ބޭސް ވިއްކަމުންދާކަންވެސް ހީނާ ފާހަގަކުރެއްވިއެވެ.

ރާއްޖޭގައި ޢާއްމުކޮށް ބޭނުންކުރާ ބޭސްތަކާއި ދުނިޔޭގެ ސިއްޙަތު ޖަމްޢިއްޔާއިން ރާއްޖެއަށް ކަނޑައަޅާފައިވާ ބޭހުގެ ޚާއްޞަ ލިސްޓެއްގައި ހިމެނޭ ބޭސްތައް ބަލްކް ޕްރޮކިއުމަންޓް އުސޫލުން ގެނައުމުގެ މަސައްކަތް ސަރުކާރުން ފަށާފައިވާކަމަށާއި، މި މަސައްކަތް ކުރިއަށްދަނީ ޔޫއެންޑީޕީއާ ގުޅިގެންކަމަށްވެސް ހީނާ ވިދާޅުވިއެވެ.