އަމިއްލަ ހޮސްޕިޓަލުތަކުގެ އަގުތައް ބޮޑުކަމަށް އާސަންދައިން ފާހަގަކޮށްފި

އަމިއްލަ ހޮސްޕިޓަލުތަކުން ހުށަހަޅާ އަގުތަކަކީ ފުދޭވަރަކަށް ބޮޑު އަގުތަކެއްކަމަށް އާސަންދަ ކުންފުނީގެ ސީއީއޯ އާމިނަތު ޒީނިޔާ ވިދާޅުވެއްޖެއެވެ. މި ވާހަކަ ޒީނިޔާ ވިދާޅުވީ އިއްޔެ ބޭއްވުނު ރައްޔިތުންގެ މަޖިލީހުގެ އިޖުތިމާޢީ ކޮމިޓީގެ ބައްދަލުވުމުގައެވެ.

ޒީނިޔާ ވިދާޅުވިގޮތުގައި، އާސަންދައިގެ ޚިދުމަތް ރައްޔިތުންނަށް ފޯރުކޮށްދިނުމަށްޓަކައި ރާއްޖޭގައި ޚިދުމަތްދޭ ބޮޑެތި އަމިއްލަ ހޮސްޕިޓަލުތަކާ މަޝްވަރާކުރެވިފައިވެއެވެ. ނަމަވެސް އެ ހޮސްޕިޓަލުތަކުން ހުށަހަޅާ އަގުތަކަކީ ފުދޭވަރަކަށް ބޮޑު އަގުތަކެކެވެ. މި ހޮސްޕިޓަލުތަކުން އަގުތައް ހަދާފައި ހުންނަނީ ބަލިމީހާ ހޮސްޕިޓަލަށް ވަންނަ ހިސާބުން ފެށިގެން ދެވޭ ކޮންމެ ޚިދުމަތަކަށް ވަކިން އަގު ހަދައިގެންކަމަށް ޒީނިޔާ ފާހަގަކުރެއްވިއެވެ.

ރާއްޖެއިން ބޭރަށް ބަލި މީހުން ފޮނުވައިގެން ކުރާ ހޭދައަށްވުރެވެސް ޚަރަދު ބޮޑުއެބަވޭ މިހެން. އެއަގުތަކަށް ބަލާފަ އަޅުގަނޑުމެން ކޮމްޕެރިޒަންސްތަކެއް ހަދާފަ އަޅުގަނޑުމެން ނެގޯޝިއޭޓްކުރަން އެ އަގު ތިރިކުރުމަށްވެސް

ޒީނިޔާ ވިދާޅުވިއެވެ.

މީގެއިތުރުން، ކުރިން އާސަންދައިން ކަވަރުނުކުރާ ބައެއް ޚިދުމަތްތަކަށްވެސް މިހާރު އާސަންދަ ލިބޭނެކަމަށް ޒީނިޔާ ވިދާޅުވިއެވެ. މީގެ ތެރޭގައި އައިވީއެފްއާއި ތެލަސީމިއާގެ ޚިދުމަތްތައް ހިމެނެއެވެ. އަދި މިހާރު މަސައްކަތްކުރަމުންދަނީ ހޮސްޕިޓަލުތަކުން ދޭ ޚިދުމަތްތައް ޕެކޭޖްކުރުމުގެ މަސައްކަތްކަމަށްވެސް އޭނާ ވިދާޅުވިއެވެ.

މި ބައްދަލުވުމުގައި ނޭޝަނަލް ސޯޝަލް ޕްރޮޓެކްޝަން އޭޖެންސީގެ ސީއީއޯ ހީނާ ވަލީދު ވިދާޅުވީ، އާސަންދަ ނިޒާމަކީ ވޭތުވެދިޔަ ހުރިހާ ދައުރެއްގައިވެސް ސިޔާސީ ބޭނުމަށް ބޭނުންކުރަމުން ދިޔަ އެއްޗެއްކަމަށެވެ. އަދި ދިވެހިރާއްޖޭގައި ބޭހުގެ އަގުތައް ހުރީ ބޭރުގެ ޤައުމުތަކާ އަޅާބަލާއިރު 15 ގުނަ މަތީގައިކަމަށް ހީނާ ފާހަގަކުރެއްވިއެވެ.

މި ބައްދަލުވުމުގައި އާސަންދައާ ގުޅިގެން ރައްޔިތުންގެ ހުރި ކަންބޮޑުވުންތަކާ ގުޅޭގޮތުން އާސަންދައިގެ އިސްވެރިންނާ ސުވާލުކުރެވުނެވެ.