ޕާޓީ ބަދަލުކުރާ މެންބަރުން މަޖިލީހުން ވަކިކުރުމަށް ޤާނޫނުއަސާސީއަށް އިސްލާހެއް

ރައްޔިތުންގެ މަޖިލީހަށް އިންތިޚާބުވި މެންބަރަކު ސިޔާސީ ޕާޓީ ބަދަލުކޮށްފިނަމަ ނުވަތަ އެ މެންބަރަކު ޕާޓީން ވަކިކޮށްފިނަމަ މެންބަރުކަން ގެއްލޭގޮތަށް ޤާނޫނުއަސާސީއަށް އިސްލާޙެއް ހުށައަޅައިފިއެވެ. މި އިސްލާޙު ހުށަހެޅުއްވީ ސަރުކާރުގެ ފަރާތުން ހުޅުދޫ ދާއިރާގެ މެންބަރު މުޙައްމަދު ޝާހިދުއެވެ.

މި ބިލުގެ ފުރަތަމަ ކިޔުން މިހާރު ވަނީ މަޖިލީހަށް އިއްވާފައެވެ. ހުށައެޅުއްވި އިސްލާޙުގައިވާ ގޮތުން، ވަކި ސިޔާސީ ޕާޓީއެއްގެ ފަރާތުން ވާދަކޮށްގެން ރައްޔިތުންގެ މަޖިލީހަށް އިންތިޚާބުވުމަށްފަހު އެ މެންބަރަކު ތަމްސީލްކުރާ ސިޔާސީ ޕާޓީން އަމިއްލައަށް ވަކިވެއްޖެނަމަ މަޖިލީހުގެ މެންބަރުކަމުން ވަކިވާނެއެވެ. މީގެ އިތުރުން، މަޖިލީހަށް މެންބަރު އިންތިޚާބުވި ސިޔާސީ ޕާޓީގެ ފަރާތުން އޭނާ ވަކިކުރުމާއި އެ މެންބަރަކު ތަމްސީލްކުރާ ޕާޓީ ނޫން އެހެން ޕާޓީއެއްގެ މެންބަރަކަށްވެއްޖެނަމަވެސް މެންބަރުކަމުން ވަކިވާނެކަމަށް ބިލުގައި ބަޔާންކޮށްފައިވެއެވެ.

މި އިސްލާޙު ފާސްވެއްޖެނަމަ، މިހާރު ސިޔާސީ ޕާޓީތަކުގައި ތިއްބެވި މެންބަރުންގެ މައްޗަށްވެސް މިދެންނެވި ކަންކަން ތަންފީޒްވާނެއެވެ. އަދި އަމިއްލަ ގޮތުން ވާދަކޮށްގެން މަޖިލީހަށް އިންތިޚާބުވާ މެންބަރަކު، މަޖިލީހުގެ ޢުމުރުގެ ތެރޭގައި ސިޔާސީ ޕާޓީއެއްގެ މެންބަރަކަށްވެއްޖެނަމަ މެންބަރުކަމުން ވަކިވާނެކަމަށްވެސް އައު އިސްލާޙުގައި ބަޔާންކޮށްފައިވެއެވެ.

މި އިސްލާޙު ހުށަހެޅުމުގެ މަޤްޞަދަކީ މަޖިލީހުގެ މެންބަރުން ޕާޓީ ބަދަލުކުރުމުގެ ސަބަބުން ދިމާވާ ސިޔާސީ ހަމަނުޖެހުންތައް ހުއްޓުވުމާއި، ވޯޓުދިން ރައްޔިތުންގެ އިރާދައާ އެއްގޮތަށް މެންބަރުން ޢަމަލުކުރުވުމެވެ. ނަމަވެސް، މި އިސްލާޙާ ގުޅޭގޮތުން ބައެއް ފަރާތްތަކުން ކަންބޮޑުވުން ފާޅުކޮށްފައިވެއެވެ.

މި އިސްލާޙު ހުށަހެޅިފައިވަނީ ނިމިދިޔަ އެމްޑީޕީގެ މެޖޯރިޓީ އޮތް މަޖިލީހުން އެންޓި ޑިފެކްޝަންގެ ޤާނޫނަށް ގެނައި އިސްލާޙަށްފަހުގައެވެ. އެ އިސްލާޙުގައި ބަޔާންކޮށްފައިވަނީ ޕާޓީ ބަދަލުކޮށްފިނަމަ، އެ މެންބަރަކު އަމިއްލައަށް އިސްތިއުފާ ދޭންޖެހޭނެ ކަމަށެވެ. ނަމަވެސް އިސްތިއުފާ ނުދީފިނަމަ ދެން މެންބަރާމެދު ޢަމަލުކުރެވޭނެ ގޮތެއް ބަޔާންކޮށްފައެއް ނުވެއެވެ.

މި  އިސްލާޙު ފާސްވެއްޖެނަމަ، ރާއްޖޭގެ ސިޔާސީ މަޝްރަޙަށް ބޮޑު ބަދަލެއް އަންނާނެކަމަށް ސިޔާސީ ދާއިރާގެ ތަޖުރިބާކާރުން ދެކެއެވެ. މި އިސްލާޙުގެ ސަބަބުން މަޖިލީހުގެ މެންބަރުންނަށް އެމީހުންގެ ޕާޓީގެ ސިޔާސަިޔާސަތުތަކާ ދެކޮޅަށް ވޯޓުދިނުމަށް ނުވަތަ ޚިޔާލު ފާޅުކުރުމަށް ދަތިވެދާނެކަމަށް ބައެއް ފަރާތްތަކުން ވަނީ ކަންބޮޑުވުން ފާޅުކޮށްފައެވެ.

އަނެއްކޮޅުން، މި އިސްލާޙުގެ ސަބަބުން ސިޔާސީ ޕާޓީތަކުގެ ބާރު އިތުރުވެ، މެންބަރުން އެމީހުން ތަމްސީލުކުރާ ޕާޓީގެ އަސާސްތަކާއި ސިޔާސަތުތަކަށް އިޙްތިރާމްކުރާނެކަމަށް އިސްލާޙަށް ތާއީދުކުރާ ފަރާތްތަކުން ބުނެއެވެ. އަދި މިއީ ވޯޓުދޭ ރައްޔިތުންގެ ޙައްޤުތައް ރައްކާތެރިކުރުމަށް އެޅޭ މުހިންމު ފިޔަވަޅެއްކަމަށްވެސް އެފަރާތްތަކުން ދެކެއެވެ.

މި އިސްލާޙު މަޖިލީހުގައި ބަހުސްކުރެވި،  ވޯޓަށް އެހުމުގެ މަރުޙަލާތައް ކުރިއަށްދާނެ ގޮތާއި މުއްދަތު އަދި ވަނީ ކަނޑައެޅިފައެއް ނޫނެވެ. ނަމަވެސް، މި އިސްލާޙަކީ ޤާނޫނުއަސާސީއަށް ގެނެވޭ ބަދަލަކަށްވާތީ، މަޖިލީހުގެ ތިންބައިކުޅަ ދެބައިގެ އަޣުލަބިއްޔަތުން ފާސްވުމަށްފަހު ރައީސުލްޖުމްހޫރިއްޔާގެ ތަޞްދީޤު ލިބެންޖެހޭނެއެވެ.

މި އިސްލާޙާ ގުޅިގެން ސިޔާސީ ޕާޓީތަކާއި މަދަނީ ޖަމްޢިއްޔާތަކުން އެކި ގޮތްގޮތަށް ޚިޔާލު ފާޅުކުރަމުންދާއިރު، ރައްޔިތުންގެ މެދުގައިވެސް މިކަމާ ގުޅޭގޮތުން ޚިޔާލު ތަފާތުވުންތަކެއް އުފެދިފައިވެއެވެ. ކުރިއަށް އޮތް ދުވަސްތަކުގައި މި އިސްލާޙާ ގުޅޭގޮތުން އިތުރު މަޝްވަރާތަކާއި ބަހުސްތައް ކުރިއަށްދާނެކަމަށް ބެލެވެއެވެ.