ސީ-ޓު-އެއަރ ކާގޯގެ ޚިދުމަތަށް ވޯލްޑް ކާގޯ އެއަރލައިން އިތުރުވެއްޖެ

ރާއްޖޭގައި ފޯރުކޮށްދެމުންދާ ސީ-ޓު-އެއަރ ކާގޯގެ ޚިދުމަތަށް އައު އެއަރލައިނެއް އިތުރުވެއްޖެއެވެ. މިފަހަރު މި ޚިދުމަތް ދޭން ފަށާފައިވަނީ މެލޭޝިއާގެ އެއަރލައިނެއް ކަމުގައިވާ ވޯލްޑް ކާގޯ އެއަރލައިނުންނެވެ.

ސީ-ޓު-އެއަރ ކާގޯގެ ޚިދުމަތަކީ، ކަނޑުމަގުން އަންނަ މުދާ، ޓްރާންސިޓުކޮށް ވައިގެ މަގުން ދުނިޔޭގެ އެހެން ގައުމުތަކަށް ފޮނުވުމެވެ. މިއީ ދުނިޔޭގެ ވަރަށް ގިނަ ގައުމުތަކުން ކުރަމުން އަންނަ، އަދި އެގައުމުތަކުގެ އިޤްތިޞާދަށް ބޮޑެތި މަންފާތަކެއް ލިބެމުން އަންނަ މަސައްކަތެކެވެ.

ވޯލްޑް ކާގޯ އެއަރލައިނުން މި ޚިދުމަތް ފެށުމުގެ ގޮތުން ވަނީ ބަންގްލަދޭޝުން ރާއްޖެއަށް ކަނޑު މަގުން ގެނައި އަންނައުނުގެ ބާވަތްތައް ޔޫރަޕްގެ އެކި ޤައުމުތަކަށް ގެންގޮސްފައެވެ.

މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)، މޯލްޑިވްސް ޕޯޓްސް ލިމިޓެޑް (އެމްޕީއެލް) އަދި މޯލްޑިވްސް ކަސްޓަމްސް ސަރވިސް ގުޅިގެން ފޯރުކޮށްދޭ މި ޚިދުމަތް ތަޢާރަފްކުރީ މިއަހަރުގެ މާރޗުމަހުގެ ތެރޭގައެވެ. އަދި ސީ-ޓު-އެއަރ ކާގޯގެ ޚިދުމަތުގެ ފުރަތަމަ ޝިޕްމަންޓް ރާއްޖޭން ފޮނުވީ މިއަހަރުގެ މެއިމަހުގެ ތެރޭގައެވެ. މިހާތަނަށް 12 އެއަރލައިން ވަނީ މި ޚިދުމަތާއި ގުޅިފައެވެ.

މި ޚިދުމަތަކީ ރައީސް ޑރ. މުޙައްމަދު މުޢިއްޒުގެ ވެރިކަމުގައި ރާއްޖޭގެ އިގުތިޞާދު ހަރުދަނާ ކުރެއްވުމަށް ވެރިކަމުގެ ފުރަތަމަ އަހަރު ފެށްޓެވި މަސައްކަތްޕުޅުތަކުގެ ތެރޭ ހިމެނޭ ކަމެކެވެ. އެމްޕީއެލްއިން ބުނާ ގޮތުގައި މި ޚިދުމަތް މިހާރު ބާރު ސްޕީޑްގައި ފުޅާވަމުން އަންނަ އަދި މިހާތަނަށް މި މަސައްކަތުން ރާއްޖޭގެ އިޤްތިސާދަށް 3 މިލިޔަނަށްވުރެ ގިނަ ޑޮލަރު ވަދެފައިވެއެވެ.