ލުބުނާނުގެ ދެކުނަށް އިސްރާއީލް ސިފައިން ވަދެގަންނަމުންދަނިކޮށް ހަތަރު ސިފައިން މަރުވެއްޖެ

ލުބުނާނުގެ ދެކުނަށް އެއްގަމު މަގުން އަރައިގަނެ ހިޒްބުاللهގެ މުޖާހިދުންނާ ކުރިމަތިލަމުންދާ އިސްރާއީލް ސިފައިންގެ ތެރެއިން ހަތަރު މީހަކު މަރުވެފައިވާ ކަމަށް އިސްރާއީލް އަސްކަރިއްޔާއިން އަންގާރަ ދުވަހު ބުނެފިއެވެ.

އިސްރާއީލް އަސްކަރިއްޔާގެ ބަޔާނެއްގައި ބުނެފައިވަނީ އެއް ބެޓޭލިއަނަކަށް ނިސްބަތްވާ ތިން ސިފައިން މަރުވެފައިވަނީ ހަނގުރާމައިގެ މައިދާނުގައި ކަމަށެވެ. މީގެ އިތުރުން ހަމަ އެ ހާދިސާގައި އިތުރު ސިފައިންގެ މީހަކު މަރުވެ، ދެ މީހަކު ޒަޚަމްވެފައިވާ ކަމަށްވެސް އަސްކަރިއްޔާއިން ވަނީ ކަށަވަރުކޮށްދީފައެވެ.

މާރިޗު މަހުގެ 2 ވަނަ ދުވަހުން ފެށިގެން އިސްރާއީލާއި ހިޒްބުاللهއާ ދެމެދު ކުރިއަށްދާ ކުރިމަތިލުންތަކުގައި މިހާތަނަށް އިސްރާއީލުގެ 10 ސިފައިން މަރުވެފައިވާ ކަމަށް ރިޕޯޓުތައް ބުނެއެވެ. ލުބުނާނުގެ ހެލްތު މިނިސްޓްރީގެ ތަފާސްހިސާބުތަކަށް ބަލާއިރު، އިސްރާއީލުން ލުބުނާނަށް ދެމުންދާ ހަމަލާތަކުގައި މިހާތަނަށް 1,200 އަށްވުރެ ގިނަ މީހުން ޝަހީދުވެ، އެއް މިލިއަނަށްވުރެ ގިނަ މީހުން ވަނީ ގެދޮރު ދޫކޮށް ރައްކާތެރި ހިސާބުތަކަށް ބަދަލުވެފައެވެ.

ލުބުނާނުގެ އެކި ސަރަހައްދުތަކަށް ހަމަލާތައް ވަރުގަދަކުރުން
އަންގާރަ ދުވަހު އިސްރާއީލުން ދިން ޑްރޯން ހަމަލާތަކެއްގައި ލުބުނާނުގެ ދެކުނުން ހަތަރު މީހަކު ވަނީ ޝަހީދުވެފައެވެ. ލުބުނާނުގެ ނޭޝަނަލް ނިއުސް އެޖެންސީން ރިޕޯޓުކޮށްފައިވާ ގޮތުގައި، ޓައިރު ކައިރީގައި އޮންނަ އަލް-ވަސީތާ އަލް-ޤާސިމިއްޔާ ސަރަހައްދުގައި ދުއްވާފައި ދިޔަ ކާރަކަށް ދިން ހަމަލާއެއްގައި ދެ މީހަކު ޝަހީދުވިއިރު، ދެރިކީފާ ސަރަހައްދަށް ދިން ހަމަލާއެއްގައި އިތުރު ދެ މީހަކު ވަނީ ޝަހީދުވެފައެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ ލުބުނާނުގެ ދެކުނަށް އަރައިގަނެފައިވާ ސިފައިން އިތުރަށް އެތެރެއަށް ވަދެގަތުމަށް އަމުރުކުރައްވާފައެވެ. ނަތަންޔާހޫ ބޭނުންވަނީ ލިޓާނީ ކޯރާ ހަމައަށް "ބަފަރ ޒޯން" އެއް ހެދުމަށެވެ. އިސްރާއީލުގެ ކަނާތު ފިޔައިގެ ވަޒީރުން ދަނީ ލުބުނާނުގެ ދެކުނުގެ ސަރަހައްދުތައް އިސްރާއީލުގެ ބައެއްގެ ގޮތުގައި ހަމަޖެއްސުމަށް ގޮވާލަމުންނެވެ. މި މަގްސަދުގައި އިސްރާއީލް ސިފައިން ދަނީ ލުބުނާނުގެ ދެކުނުގެ ބްރިޖުތަކާއި ގެދޮރު ސުންނާފަތިކޮށް، އެ ސަރަހައްދު ގައުމުގެ އެހެން ބައިތަކާ ވަކިކުރަމުންނެވެ.

ހިޒްބުاللهގެ ރައްދު
ހިޒްބުاللهގެ ސެކްރެޓަރީ ޖެނެރަލް ނައީމް ޤާސިމް ވިދާޅުވީ، ބާރުގެ ގޮތުން ދެފަރާތުގެ މެދުގައި ހުރި ފަރަގު އެނގޭ ކަމަށާއި، އިސްރާއީލް ސިފައިން ލިޓާނީ ކޯރާ ހަމައަށް ފޯރުމަކީ އެކަށީގެންވާ ކަމެއް ކަމަށެވެ. ނަމަވެސް، އިސްރާއީލަށް އެ ސަރަހައްދުތަކުގެ ކޮންޓްރޯލް ހޯދުމަކީ ފަސޭހަ ކަމަކަށް ނުވާނެ ކަމަށާއި، ހިޒްބުاللهއިން މަސައްކަތް ކުރަމުންދަނީ މިއީ އިސްރާއީލަށް ބޮޑު ގެއްލުމެއް ލިބޭނެ ހަނގުރާމައަކަށް ހެދުމަށް ކަމަށް އޭނާ ވިދާޅުވިއެވެ.

އިސްރާއީލުގެ ދިފާއީ ވަޒީރު އިސްރާއީލް ކާޓްޒް ވިދާޅުވެފައިވަނީ، މިހާރު ކުރިއަށްދާ ހަނގުރާމަ ނިމުމަށްފަހުވެސް ލުބުނާނުގެ ދެކުނުގެ ބޮޑު ސަރަހައްދެއް އިސްރާއީލް ސިފައިންގެ ބާރުގެ ދަށުގައި ބާއްވާނެ ކަމަށެވެ. މިއީ އިސްރާއީލުގެ ބޯޑަރުތަކަށް ބަދަލު ގެނައުމަށް ކުރަމުންދާ މަސައްކަތެއްގެ ގޮތުގައި މަސްރަހު ދިރާސާކުރާ ފަރާތްތަކުން ސިފަކުރެއެވެ.