ޤާނޫނާއި ގަވާޢިދުގެ ތެރެއިން ނޫންގޮތަކަށް އެއްގަމު އުޅަނދު ރަޖިސްޓަރީކުރުން ހުއްޓުވުނު- ޓްރާންސްޕޯރޓް

ޤާނޫނާއި ގަވާއިދުގެ ތެރެއިން ނޫންގޮތަކަށް އެއްގަމު އުޅަނދު ރަޖިސްޓަރީކުރުން  ނިމުމަކަށް ގެނެވިފައިވާކަމަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ވިދާޅުވެއްޖެއެވެ.

52 ހަފްތާގެ ކާމިޔާބީތައް ހިއްސާ ކުރައްވާ، އެ ވުޒާރާއިން ވިދާޅުވީ، ގަރާޖުގެ ޞައްޚަކަން ކަށަވަރުކުރުމުގެ މުހިންމު މަސައްކަތްވެސް މިނިސްޓްރީން ވަނީ ފަށާފައިވާކަމަށެވެ. އަދި މިއީ ހަތަރު ފުރޮޅުލީ އުޅަނދު ރަޖިސްޓަރީ ކުރުމުގައި ޤާނޫނާއި ގަވާއިދުގެ ތެރެއިން މިނިސްޓްރީގެ ޒިންމާ އަދާކުރުމަށާއި އަދި އުސޫލުން ބޭރުން ރަޖިސްޓަރީ ވަމުންދިޔަ ދިޔުން ނިމުމަކަށް ގެނައުމުގެ މަޤުސަދުގައި ކުރައްވާ ކަމެއްކަމަށް ވިދާޅުވިއެވެ.

މިނިސްޓްރީން ވިދާޅުވީ ތަފާސްހިސާބުތަކުން ދައްކާގޮތުގައި، މި ގެނެވުނު ބަދަލުގެ ނަތީޖާއެއްގެ ގޮތުން 2023 ވަނަ އަހަރާ އަޅާބަލާއިރު 2024 ވަނަ އަހަރު (އޮކްޓޫބަރު 31 އާ ހަމައަށް) މާލޭ ސަރަޙައްދަށް ރަޖިސްޓަރީ ކުރެވުނު ހަތަރު ފުރޮޅުލީ އުޅަނދު ރަޖިސްޓަރީކުރުމުގެ ނިސްބަތް 74.1 އިންސައްތައަށ ދަށްކުރެވިފައިވާ ކަމަށެވެ. މީގެ އިތުރުން، ދެފުރޮޅުލީ އުޅަނދު ރަޖިސްޓަރީކުރުމުގެ ނިސްބަތްވެސް %8.1 ވަނީ މަދުކުރެވުފައިވާ ކަމަށާއި މި ފިޔަވަޅުތަކުގެ ސަބަބުން މާލެ ސަރަހައްދަށް އެއްގަމު އުޅަނދު އިތުރުވަމުން ދިޔަ މިންވަރު ވަނީ ވަރަށް ބޮޑުތަނުން ދަށްވެގެން ގޮސްފައިކަން ފާހަގަކުރެއްވިއެވެ. މި ފިޔަވަޅުތަކަކީ މާލޭގެ ޓްރެފިކް ޙާލަތު ރަނގަޅުކުރުމަށް އެޅުނު މުހިންމު ފިޔަވަޅެކެވެ.