ޕާޓީ ބަދަލުކުރުމުން ގޮނޑިގެއްލޭ އިސްލާޙު ފާސްކުރަން މިއަދު ޚާއްސަ ޖަލްސާއެއް ބާއްވަނީ

ޕާޓީ ބަދަލުކުރުމުން ރައްޔިތުންގެ މަޖިލީހުގެ ގޮނޑިގެއްލޭ އިސްލާޙު ހިމެނޭ އިސްލާޙު ފާސްކުރަން މިއަދު ހަވީރަށް މަޖިލީހުގެ ޖަލްސާއެއް ތާވަލުކޮށްފިއެވެ. 

މިޖަލްސާ ތާވަލު ކޮށްފައިވަނީ މިއަދުގެ ހަވީރުގެ ވަގުތަކަށެވެ.

މެންބަރުންގެ ގޮނޑި ގެއްލޭނެ ހަތަރު ޙާލަތެއް ބަޔާންކޮށް، ޤާނޫނު އަސާސީއަށް ސަރުކާރުގެ ފަރާތުން އިސްލާޙް ހުށަހެޅުއްވީ ޕީއެންސީގެ ޕާލިމަންޓްރީ ގްރޫޕުގެ ޑެޕިއުޓީ ލީޑަރު، ހުޅުދޫ ދާއިރާގެ މެންބަރު މުޙައްމަދު ޝާހިދެވެ.

އެ ބިލު ބަލައިގަތުމަށް ފާސްވީ، މަޖިލީހުގެ 69 މެންބަރުންގެ ވޯޓުންނެވެ. އަދި ދެކޮޅަށް ވޯޓު ދެއްވީ 12 މެންބަރެކެވެ.

އެއާއެކު އެ ބިލުގެ މަސައްކަތް ނިންމަން މުޅި މަޖިލީހުގެ ކޮމިޓީއަށް ފޮނުވުމަށް މަޖިލީހުގެ ނައިބު ރައީސް ދިއްގަރު ދާއިރާގެ މެންބަރު އަޙްމަދު ނާޒިމު ހުށަހެޅުއްވުމުން، ޕީއެންސީގެ ޕާލިމަންޓްރީ ގްރޫޕުގެ ލީޑަރު، އިނގުރައިދޫ ދާއިރާގެ މެންބަރު އިބްރާހިިމް ފަލާޙް ވަނީ އެ ހުށަހެޅުއްވުމަށް ތާއީދު ކުރައްވާފައެވެ.

އެ ހުށަހެޅުން ފާސްވީ 71 މެންބަރުންގެ ވޯޓާ އެކުއެވެ. މި ހުށަހެޅުމާ ދެކޮޅަށްވެސް ވޯޓު ދެއްވީ 12 މެންބަރެކެވެ. 

އެފަހުން މުޅި މަޖިލީހުގެ ކޮމިޓީގެ ބަހުސް މަރުހަލާ ކުރިއަށް ގެންގޮސްފައިވާއިރު، މަޖިލީހުން ވަނީ ހަވީރު 17:30 އަށް އެ އިސްލާޙާ މެދު ކޮމިޓީން ނިންމި ގޮތުގެ ރިޕޯޓާ މެދު ގޮތެއް ނިންމުން ހިމަނައި ޖަލްސާއެއް އެޖެންޑާކޮށްފައެވެ.

ޤާނޫނު އަސާސީއަށް އިސްލާޙެއް ގެނެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ ހަތަރުބައިކުޅަ ތިންބައިގެ އަޣުލަބިއްޔަތުން ފާސްކުރާ ޤާނޫނަކުންނެވެ. އެއީ، 70 މެންބަރުންނެވެ. ސަރުކާރު ހިންގާ ޕީއެންސީގައި މި ވަގުތު އެ އަދަދަށް މެންބަރުން އެބަތިއްބެވިއެވެ.