މަސްވެރިކަމާބެހޭ 25 އަހަރުގެ މާސްޓަރޕްލޭނެއް އެކުލަވައިލަނީ

މަސްވެރިކަމާބެހޭ 25 އަހަރުގެ މާސްޓަރޕްލޭނެއް އެކުލަވައިލުމަށް މަސްވެރިކަމާ ކަނޑުގެ ވަސީލަތްތަކާ ބެހޭ ވުޒާރާއިން ނިންމައިފިއެވެ. 

އެ ވުޒާރާއިން ބުނެފައިވަނީ، ދިވެހި ރާއްޖޭގެ ތަރައްޤީއަށް ކުރެވޭ ކަންކަމަކީ ރޭވިފައިވާ ޕްލޭނެއްގެ ދަށުން ކުރާ ކަންތައްތަކަށް ހެދުމަށްޓަކައި ޤާނޫނަކުން ބާރުލިބޭ ޤައުމީ ތަރައްޤީގެ ވިހި އަހަރުގެ ޕްލޭނެއް އެކުލަވާލުމަކީ ރައީސް ޑރ މުޙައްމަދު މުޢިއްޒުގެ ވަރަށް މުހިންމު ވައުދު ފުޅެއްކަމަށެވެ.

އެގޮތުން، މަސްވެރި ސިނާއަތް ތަރައްޤީކޮށް ސިންދަފާތުކޮށް ކުރިއެރުވުމަށް ކުރާ ކަންތައްތަކަކީ ވެސް ރޭވި ކުރެހިފައިވާ އިސްތިރާޖީ ޕްލޭނެއްގެ ދަށުން ކުރިއަށް ގެންދާ ކަންތައްތަކަށް ހެދުމަށް ޓަކައި މަސްވެރިކަމާއި ކަނޑުތަކުގެ 25 އަހަރުގެ މާސްޓަރ ޕްލޭނެއް އެކުލަވާލުމަށް އެ ނިންމާފައިވާކަމަށް އެވުޒާރާއިން ހާމަކުރެއެވެ.

މި އިސްތިރާޖީ މާސްޓަރ ޕްލޭނުގައި ކުރިއަށް އޮތް 25 އަހަރުގައި މަސްވެރި ސިނާއަތުގެ ވިޝަން އަދި މިޝަންތައް ކަނޑައެޅޭނެކަމަށާއި، ހަމަ އެހެންމެ ކަނޑުތަކުގެ ވަސީލަތް ފުރިހަމައަށް ބޭނުންކޮށް އިގްތިސާދީ ނަފާ އިތުރުކުރުމަށް ލަނޑުދަނޑިތަކެއް ރޭވި އެކަން ހާސިލުކުރުމަށް ކުރާނެ ކަންކަން މި ޕްލޭނުގައި ހިމެނިގެން ދާނެކަމަށް މަސްވެރިކަމާއި ބެހޭ ވުޒާރާއިން ބުނެއެވެ.

އެ ވުޒާރާއިން ބުނީ، މި ކަމަށް ބޭނުންވާ ފައިސާ، ވޯރލްޑް ބޭންކުގެ އެހީގެ ތެރެއިން މިހާރު ހަމަޖެހިފައިވާކަމަށެވެ.