ޕާޓީ ބަދަލު ކުރުމުން ގޮނޑި ގެއްލޭގޮތަށް މަޖިލީހަށް ހުށައެޅި އިސްލާޙު ފާސްކޮށްފި

ސިޔާސީ ޕާޓީ ބަދަލުކުރުމުން ރައްޔިތުންގެ މަޖިލީހުގެ ގޮނޑި ގެއްލޭނެ ކަމަށް ކަނޑައެޅުމަށް ޤާނޫނުއަސާސީއަށް ބަދަލު ގެނައުމަށް މަޖިލީހަށް ހުށައެޅި އިސްލާޙު ފާސްކޮށްފިއެވެ. 

ޤާނޫނުއަސާސީއަށް އިސްލާޙު ގެނައުމުގެ ބިލަކީ ވެރިކަންކުރާ ޕީއެންސީގެ ޕީޖީ ގްރޫޕްގެ މެމްބަރު، ހުޅުދޫ ދާއިރާގެ މެންބަރު މުޙައްމަދު ޝާހިދު ހުށަހެޅުއްވި އިސްލާޙެކެވެ.

ރައްޔިތުންގެ މަޖިލީހުގެ މެމްބަރަކު ސިޔާސީ ޕާޓީ ބަދަލުކޮށްފިނަމަ ނުވަތަ އެ މެންބަރަކު ޕާޓީން ވަކިކޮށްފިނަމަ ނުވަތަ އަމިއްލަ މެމްބަރަކު ޕާޓީއަކާއި ގުޅިއްޖެނަމަ މަޖިލީހުގެ މެންބަރުކަން ގެއްލޭގޮތަށް ޤާނޫނުއަސާސީއަށް އިސްލާޙު ގެނައުމަށް ހުށަހެޅި ބިލް ފާސްވީ ވޯޓުގައި ބައިވެރިވެވަޑައިގެންނެވި 91 މެމްބަރުންގެ ތެރެއިން 78 މެމްބަރުންގެ އަޤްލަބިއްޔަތުންނެވެ. ބިލު ފާސްކުރުމަށް ނުފެންނަކަމަށް ވޯޓް ދެއްވީ 13 މެމްބަރެކެވެ.

ޤާނޫނު އަސާސީއަށް ހުށައަޅާފައިވާ އިޞްލާހުގައި ވަނީ ވަކި ސިޔާސީ ޕާޓީއެއްގެ ފަރާތުން ވާދަކޮށްގެން ރައްޔިތުންގެ މަޖިލީހަށް އިންތިޚާބުވުމަށްފަހު އެ މެންބަރަކު ރައްޔިތުންގެ މަޖިލީހަށް އިންތިޚާބުވި ރައްޔިތުންގެ މަޖިލީހުގެ ޢުމުރުގެ ތެރޭގައި އެ މެންބަރަކު ތަމްސީލްކުރާ ސިޔާސީ ޕާޓީން އަމިއްލައަށް ވަކިވެއްޖެނަމަ މަޖިލީހުގެ މެންބަރުކަމުން ވަކިވާނެ ކަމަށެވެ.

 އަދި އަމިއްލަ ގޮތުން ވާދަކޮށްގެން މަޖިލީހަށް އިންތިޚާބުވާ މެންބަރަކު، މަޖިލީހުގެ ދައުރުގެ ތެރޭގައި ސިޔާސީ ޕާޓީއެއްގެ މެންބަރަކަށްވެއްޖެނަމަ މެންބަރުކަމުން ވަކިވާނެކަމަށްވެސް އިސްލާޙުގައި ވަނީ ބަޔާންކޮށްފައެވެ.ޤާނޫނުއަސާސީއަށް ހުށައެޅުނު މިއިސްލާޙަށް ޢަމަލުކުރަން ފަށާނީ ރައީސުލްޖުމްހޫރިއްޔާ މި ބިލް ތަސްދީޤުކުރެއްވުމުންނެވެ.

ރައްޔިތުންގެ މަޖިލީހަށް މިބިލް ހުށައެޅި ބަހުސް ފެށިގެން ދިޔުމާއެކު އިދިކޮޅު އެމްޑީޕީ އިން މަޖިލިސް ކުރާ ގެއާ ކައިރިއަށް އެއްވެ މުޒާހަރާކޮށްފައިވެއެވެ. އަދި އެތަނަށް ޕީއެންސީގެ ބައެއް މެމްބަރުން އެއްވުމާއި ގުޅިގެން މަސްލަޙަތު ގެއްލިގެން ދިޔަކަމަށްވެސް މަޢުލޫމާތުވަނީ ލިބިފައެވެ.