ޅ.ނައިފަރު ބިން ހިއްކުމުގެ މަޝްރޫޢުގެ %54 މަސައްކަތް އެމްޓީސީސީން ނިންމާލައިފި

ޅ.ނައިފަރު ބިން ހިއްކުމުގެ މަޝްރޫޢުގެ %54 މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމްޓީސީސީން ނިންމާލައިފި އެވެ.

މި މަޝްރޫޢުގެ ދަށުން، ރަށަށް 44.8 ހެކްޓަރުގެ ބިން އިތުރު ކުރުމަށް ހަމަޖެހިފައިވާއިރު، ބިން ހިއްކުމަށް ވެލި އެޅުމުގެ %54 މަސައްކަތް ނިމިފައިވާކަމަށް އެމްޓީސީސީން ވިދާޅުވެއެވެ.

މި މަޝްރޫއުގެ ދަށުން، 44.80 ހެކްޓަރުގެ ސަރަޙައްދެއްގެ ބިން ހިއްކުމާއި، 1813 މީޓަރުގެ ސަރަޙައްދެއްގައި ރިވެޓްމަންޓް ޖެހުމުގެ މަސައްކަތް ކުރިއަށްދާނެ އެވެ. ހަމަ މިއާއެކު، 474 މީޓަރުގެ ސަރަޙައްދެއްގައި ގްރޮއިން ޖެހުމާއި، 803 މީޓަރުގެ ސަރަޙައްދެއްގައި ބޭރުތޮށިލުމުގެ މަސައްކަތް ވެސް ކުރިއަށްދާނެ ކަމަށް އެމްޓީސީސީން ވަނީ ވިދާޅުވެފައެވެ.

Project Update: Design and build of Land Reclamation and Shore Protection at Lh. Naifaru

Dredging and reclamation works, sand bund works and emergency shore protection works are currently ongoing at the project site.

Follow more updates at: https://t.co/SfVAzkW2pp… pic.twitter.com/W5z7VEUCwK

— MTCC Plc (@MTCCPlc) March 30, 2026

5800 އަށްވުރެ ބޮޑު އާބާދީއެއް އޮތް ނައިފަރުގެ މިހާރުގެ ބޮޑުމިނަކީ 55 ހެކްޓަރެވެ. މީގެކުރިން 2004 ވަނަ އަހަރުވެސް އެރަށުން 16 ހެކްޓަރުގެ ބިން ހިއްކާ، އެ ސަރަޙައްދުގައި ބޯހިޔާވަހިކަމުގެ މަޝްރޫޢުތައް ހިންގާފައިވެއެވެ. ސަރުކާރުގެ އަމާޒަކީ މިހާރު ކުރިއަށްދާ މަޝްރޫޢު ނިމުމުން، ނައިފަރަކީ ސަރަޙައްދީ ފެންވަރުގައި ތަރައްޤީވެފައިވާ، ހުރިހާ ޚިދުމަތްތަކެއް ފުރިހަމަވެފައިވާ އަރބަން ސެންޓަރަކަށް ހެދުމެވެ.

މި މަޝްރޫޢަކީ، 679.03 މިލިއަން ރުފިޔާއަށް 630 ދުވަސްތެރޭ ނިންމުމަށް ދައުލަތުގެ ބަޖެޓުން ޚަރަދުކޮށްގެން  އެމްޓީސީސީއާ ހަވާލުކޮށްފައިވާ މަޝްރޫޢެއްކަން ފާހަގަކޮށްލެވެއެވެ.