މަޖިލީހުގެ ރުހުން ނެތި ރާއްޖޭގެ އެއްވެސް ސަރަހައްދެއް ޢަސްކަރީ ބޭނުންތަކަށް ނުދެވޭ އިސްލާޙް ފާސްކޮށްފި

ރައްޔިތުންގެ މަޖިލީހުގެ ރުހުން ނެތި ރާއްޖޭގެ އެއްވެސް ސަރަހައްދެއް ޢަސްކަރީ ބޭނުންތަކަށް ނުދެވޭ އިސްލާޙް މަޖިލީހުގެ ބޮޑު އަޤްލަބިއްޔަަތަކުން ފާސްކޮށްފިއެވެ. 

މި އިސްލާޙަކީ ޢަސްކަރީ ތަމްރީނުތަކުގައި ބައިވެރިވުން ފިޔަވައި ރާއްޖެއިން ބޭރުގެ ފަރާތްތަކަށް ރާއްޖޭގެ އެއްވެސް ސަރަޙައްދެއް ޢަސްކަރީ ބޭނުމަށް ބޭނުންކުރުމުގެ ހުއްދަ ދެވޭނީ ރައްޔިތުންގެ މަޖިލީހުގެ އަޣުލަބިއްޔަތުން ފާސްކޮށްގެންކަމަށް ޤާނޫނު އަސާސީއަށް  އިސްލާޙު ގެނައުމަށް ހުށައެޅި އިސްލާޙެކެވެ.

ޤާނޫނުއަސާސީ އިސްލާޙު ގެނައުމުގެ ބިލަކީ ވެރިކަންކުރާ ޕީއެންސީގެ ޕީޖީ ގްރޫޕްގެ މެމްބަރު، ހުޅުދޫ ދާއިރާގެ މެންބަރު މުޙައްމަދު ޝާހިދު ހުށަހެޅުއްވި އިސްލާހެކެވެ. 

މި އިސްލާޙް ފާސްވެފައިވަނީ ވޯޓުގައި ބައިވެރިވެވަޑައިގެންނެވި 91 މެމްބަރުންގެ ތެރެއިން 78 މެމްބަރުންގެ އަޤްލަބިއްޔަތުންނެވެ. ބިލު ފާސްކުރުމަށް ނުފެންނަކަމަށް ވޯޓް ދެއްވީ 13 މެމްބަރެކެވެ.

ސަރުކާރުގެ ފަރާތުން ހުޅުދޫ ދާއިރާގެ މެންބަރު މުޙައްމަދު ޝާހިދު އިޞްލާހު ހުށައެޅުއްވީ ޤާނޫނު އަސާސީގެ 251 ވަނަ މާއްދާގެ (ނ)އަށެވެ. އެ މާއްދާގައި މިހާރު ބަޔާންކުރަނީ ރައްޔިތުންގެ މަޖިލީހުގެ ޖުމްލަ މެންބަރުންގެ އަޤްލަބިއްޔަތުން ފާސްވެގެން މެނުވީ ރާއްޖެއިން ބޭރުގެ ފަރާތްތަކަށް ދިވެހިރާއްޖޭގެ ސަރަޙައްދުގެ އެއްވެސް ބައެއް ޢަސްކަރީ ބޭނުމަކަށް ދީގެން ނުވާނެކަމަށެވެ.

އެ މާއްދާއަށް ސަރުކާރުގެ ފަރާތުން މިހާރު ހުށައަޅާފައިވާ އިޞްލާހުގައި ވަނީ ރައްޔިތުންގެ މަޖިލީހުގެ ޖުމްލަ މެންބަރުންގެ އަޣުލަބިއްޔަތުން ފާސްވެގެން މެނުވީ، އެއްބަސްވުމެއްގެ ދަށުން ނުވަތަ އެނޫންވެސް ގޮތަކަށް، ރާއްޖެއިން ބޭރުގެ ފަރާތްތަކަށް ދިވެހިރާއްޖޭގެ ސަރަހައްދުގެ އެއްވެސް ބައެއް ޢަސްކަރީ ބޭނުނަމަކަށް ބޭނުންކުރުމުގެ ހުއްދަ ދީގެން ނުވާނެކަމަށެވެ. 

އަދި އެއްބަސްވުމެއްގެ ދަށުން ބާއްވާ ޢަސްކަރީ ތަމްރީނުތަކުގައި ބައިވެރިވުން ފިޔަވައި، ރައްޔިތުންގެ މަޖިލީހުގެ ޖުމްލަ މެންބަރުންގެ އަޣުލަބިއްޔަތުން ފާސްވެގެން މެނުވީ، ޢަސްކަރީ ބޭނުމަކަށް ދިވެހިރާއްޖޭގެ ސަރަޙައްދުގައި ބޭރުގެ ސިފައިން އެއްވެސް ސިފައެއްގައި ޢަމަލީގޮތުން ޙަރަކާތްތެރިވުމަށް ހުއްދަ ދީގެން ނުވާނެކަމަށްވެސް ޤާނޫނު އަސާސީއަށް ހުށައެޅުއްވި އިޞްލާހުގައިވެއެވެ.

ރާއްޖެއިން ބޭރުގެ ސިފައިން ހަރަކާތްތެރިވުމާ ގުޅޭ މާއްދާ ހަރުކަށިކުރަން ސަރުކާރުން ހުށައަޅަފައިމިވަނީ، ރާއްޖެއިން ބޭރުގެ ސިފައިން ފޮނުވާލުމަށް ރައީސުލްޖުމްހޫރިއްޔާ ވެވަޑައިގެންފައިވާ ވަޢުދު ފުއްދުމަށް ފަހުއެވެ. ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވަޢުދުފުޅާ އެއްގޮތަށް ރާއްޖޭގެ ތިން ޕްލެޓްފޯމެއްގައި ގާއިމުވެ ތިބި ހުރިހައި އިންޑިއާ ސިފައިން އަނބުރާ ފޮނުވާލައިފައިވަނީ މެއި މަހުގެ 9 ވަނަ ދުވަހުއެވެ.