ރާއްޖެ އިސްލާމިކް ފައިނޭންސްގެ ހަބަކަށް ހެދުމަށް ސަރުކާރުން މަސައްކަތްކުރަނީ

ދިވެހިރާއްޖެއަކީ އިސްލާމިކް ފައިނޭންސްގެ ހަބަކަށް ހެދުމަށްޓަކައި ސަރުކާރުން މަސައްކަތްކުރަމުންދާ ކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ. ވަޒީރު މިހެން ވިދާޅުވީ ޕީއެސްއެމް ނިއުސްއިން ގެނެސްދޭ "ހަފްތާ 52" އަށް ދެއްވި ޚާއްސަ އިންޓަވިއުގައެވެ.

މިސަރަހައްދުގެ އިސްލާމިކް ފައިނޭންސް ހަބަކަށް ރާއްޖެ ހެދުމަކީ މިސަރުކާރުގެ މުހިންމު ތަސައްވުރެއް ކަމަށް ވަޒީރު ޒަމީރު ފާހަގަކުރެއްވިއެވެ. މިކަމާ ގުޅޭގޮތުން މާލީ ވުޒާރާގެ ތެރޭގައި ވަކި ޑިޕާޓްމަންޓެއް ހަދާފައިވާ ކދާފައިވާ ކަމަށާއި، އުސޫލުތަކާ އެއްގޮތަށް ޝަރީޢާ އެޑްވައިޒަރީ ކޮމެޓީއެއް ގާއިމްކޮށްފައިވާ ކަމަށްވެސް ވަޒީރު ވިދާޅުވިއެވެ.

މީގެއިތުރުން، އިސްލާމިކް ޓްރެޜަރީ ވަސީލަތްތައް ފުޅާކުރުމަށް މަސައްކަތްކުރަމުންދާ ކަމަށާއި، ސަރުކާރުގެ ފުރަތަމަ ސުކޫކު އިޝޫކުރުމަށްވެސް ތައްޔާރުވަމުންދާ ކަމަށް ވަޒީރު ޒަމީރު ހާމަކުރެއްވިއެވެ. މިގޮތުން، ސީއެމްޑީއޭ އަދި މޯލްޑިވްސް ސްޓޮކް އެކްސްޗޭންޖުން ހުއްދަ ނަގައިގެން، ލިސްޓުކުރާ އަދި ސަރުކާރު ނިސްބަތްވާ ފުރަތަމަ ސުކޫކު އިޝޫކުރުމަށް ތައްޔާރުވެފައިވާ ކަމަށް ވަޒީރު ވިދާޅުވިއެވެ.

އިސްލާމިކް ފައިނޭންސާ ގުޅޭގޮތުން އާންމުންގެ ހޭލުންތެރިކަން އިތުރުކުރުމަށްވެސް މުހިންމު މަސައްކަތްތަކެއް ކުރެވެމުންދާ ކަމަށް ވަޒީރު ޒަމީރު ފާހަގަކުރެއްވިއެވެ. އަދި މިކަމުގެ ނަތީޖާ ކައިރި މުސްތަޤުބަލެއްގައި ފެންނާނެ ކަމަށް އުންމީދުކުރައްވާ ކަމަށްވެސް ވަޒީރު ވިދާޅުވިއެވެ.

މިކަމަކީ ރާއްޖޭގެ އިޤްތިޞާދީ ދާއިރާގައި އިސްލާމީ ޝަރީޢަތާ އެއްގޮތަށް މުޢާމަލާތްތައް ކުރިއަށް ގެންދިއުމަށް އެޅޭ މުހިންމު ފިޔަވަޅެއް ކަމަށް ބެލެވެއެވެ. މިކަމުގެ ސަބަބުން ރާއްޖޭގެ މާލީ ދާއިރާއަށް އިތުރު ކުރިއެރުންތަކެއް ލިބި، ބައިނަލްއަޤްވާމީ ފެންވަރުގައި ރާއްޖޭގެ މަޤާމު އިތުރަށް ވަރުގަދަވެގެންދާނެ ކަމަށް އުންމީދުކުރެވެއެވެ.