ޣައްޒާގެ ނަސްލު ނައްތާލުމުގައި ބައިވެރިވި އިސްރާއީލް ސިފައިންނާ ދެކޮޅަށް 28 ގައުމެއްގައި 80 އަށްވުރެ ގިނަ މައްސަލަ ހުށަހަޅައިފި

ޣައްޒާގައި ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ނަސްލު ނައްތާލުމުގެ އަމަލުތަކާއި، ހަނގުރާމައިގެ ކުށްތަކުގައި ބައިވެރިވާ އިސްރާއީލުގެ ސިފައިން ޖަވާބުދާރީ ކުރުވުމަށްޓަކައި 28 ގައުމެއްގައި 80 އަށްވުރެ ގިނަ ޝަކުވާ ހުށަހަޅާފައިވާ ކަމަށް ހިންދު ރަޖަބް ފައުންޑޭޝަން (އެޗް.އާރް.އެފް) އިން ހާމަކޮށްފިއެވެ.

ބެލްޖިއަމްއަށް ނިސްބަތްވާ މި ޖަމިއްޔާއިން ބުނި ގޮތުގައި، 2026 ވަނަ އަހަރުގެ ޖެނުއަރީ މަހުން ފެށިގެން އެކި ގައުމުތަކުގެ ގާނޫނީ އިދާރާތަކަށް މައްސަލަތައް ހުށަހަޅައި، ތަހުގީގުތައް ފަށައި، ކުށްވެރިވާ ސިފައިންނަށް ދަތުރުފަތުރު ކުރުން ހަނިކުރުމުގެ މަސައްކަތް ވަނީ ވަރުގަދަކޮށްފައެވެ. މިގޮތުން ބްރެޒިލް، ޗިލީ، އޮސްޓްރޭލިއާ، ގްރީސް، އިޓަލީ، އެމެރިކާ އަދި ކެނެޑާ ފަދަ ގައުމުތަކުގައި ވަނީ މައްސަލަތައް ފައިލްކޮށްފައެވެ. ހަމައެކަނި 2025 ވަނަ އަހަރުގެ ތެރޭގައި ވެސް 50 އަށްވުރެ ގިނަ މައްސަލަ ވަނީ ހުށަހަޅާފައެވެ.

މި ފައުންޑޭޝަނަށް ނަން ދީފައިވަނީ 2024 ވަނަ އަހަރު އިސްރާއީލުގެ ހަމަލާތަކުގައި ޝަހީދުވި ފަސް އަހަރުގެ ފަލަސްތީނު އަންހެން ކުއްޖެއް ކަމަށްވާ ހިންދު ރަޖަބްގެ ނަމުންނެވެ. އެ ކުއްޖާގެ މަރަކީ ބައިނަލްއަގުވާމީ އިންސާނީ ގާނޫނުތަކާ އިސްރާއީލުން ޚިލާފުވަމުންދާ މިންވަރު ދޭހަކޮށްދޭ ރަމްޒެކެވެ. ފާއިތުވި ދެ އަހަރު ދުވަހު އިސްރާއީލު ސިފައިން ޓިކްޓޮކް އަދި އިންސްޓަގްރާމް ފަދަ ވަސީލަތްތަކުގައި ޣައްޒާއަށް ދޭ ހަމަލާތަކުގެ ވީޑިއޯތައް އާންމުކޮށްފައިވާއިރު، އެޗް.އާރް.އެފް އިން ދަނީ އެ ވީޑިއޯތައް ހެކީގެ ގޮތުގައި ބޭނުންކުރަމުންނެވެ.

އެޗް.އާރް.އެފްގެ ރައީސް ދިޔާބް އަބޫ ޖަހްޖަހް ވިދާޅުވީ، "މީހުން ގަތުލުކޮށް، އެ މަންޒަރު ފިލްމުކޮށް، ދުނިޔެއަށް ދައްކައި، އެކަމަށް އިއުތިރާފުވުމަށްފަހު، އެއްވެސް ކަމެއް ނުވާކަމަށް ހަދާފައި ބްރަސަލްސްގެ ކެފޭއެއްގައި އަހަރެމެންނާ ޖެހިގެން އިށީނދެގެން ނުތިބެވޭނެ" ކަމަށެވެ. 2025 ވަނަ އަހަރުގެ ކުރީކޮޅާ ހަމައަށް އެ ޖަމިއްޔާއިން ވަނީ އިސްރާއީލު ސިފައިން ހިންގާފައިވާ ހަނގުރާމައިގެ ކުށްތަކާ ގުޅޭ 8،000 އަށްވުރެ ގިނަ ހެކި އެއްކޮށްފައެވެ.

މި މަސައްކަތުގެ ތެރެއިން ސައިޕްރަސްގައި ވަނީ ބޮޑު ކާމިޔާބީއެއް ލިބިފައެވެ. އެގައުމުގެ ޕްރޮސެކިއުޓަރުން ވަނީ އިސްރާއީލުގެ ރިޒާވް ސިފައިންގެ މީހަކާ ދެކޮޅަށް ތަހުގީގެއް ފަށާފައެވެ. އޭނާ ޣައްޒާގެ އާންމުންގެ ގެދޮރު އަންދާލާ މަންޒަރު ފެންނަ ވީޑިއޯތައް ހެކީގެ ގޮތުގައި ހުށަހަޅާފައިވެއެވެ. ނަމަވެސް، އިސްރާއީލު ސަރުކާރުގެ އެހީތެރިކަމާއެކު އެ ސިފައިންގެ މީހާ ވަނީ ސައިޕްރަސްއިން ފިލައިގެން ގޮސްފައެވެ. މީގެ އިތުރުން ބްރެޒިލްއަށް ޗުއްޓީއަށް ގޮސް އުޅުނު ސިފައިންގެ މީހަކާ ދެކޮޅަށްވެސް އެ ގައުމުގައި ވަނީ މައްސަލަ ފަށާފައެވެ.