ގުރައިދޫގެ ހުރިހާ ގޮނޑިއެއް ކޮންގްރެސްއަށް: ސަރުކާރަށް އޮތް ތާއީދު އަނެއްކާވެސް ދައްކާލައިފި

ސަރުކާރު ހިންގާ ކޮންގްރެސް ޕާޓީގެ އެންމެ ތާއީދުބޮޑު ރަށުގެ ގޮތުގައި އޮތް ތ. ގުރައިދޫގައި އިއްޔެ ބޭއްވި ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބުގައި ހުރިހާ ގޮނޑިއެއް ކޮންގްރެސް ޕާޓީން ކާމިޔާބުކޮށްފިއެވެ.

މި ނަތީޖާއާއެކު އެ ރަށުން ވަނީ ސަރުކާރަށް އޮތް އިތުބާރު 100 އިންސައްތަ ކާމިޔާބީއަކުން ހާމަކޮށްފައެވެ.

އިއްޔެގެ އިންތިޚާބުގައި ގުރައިދޫ ކައުންސިލްގެ ރައީސް ކަމަށް އިންތިޚާބުވީ ކޮންގްރެސްގެ ކެންޑިޑޭޓް ތަޢުފީޤް އަލީ އެވެ. އޭނާ މި ގޮނޑި ކާމިޔާބު ކުރީ 668 ވޯޓް ހޯދައިގެންނެވެ. އޭނާއާ ވާދަކުރި އަމިއްލަ ކެންޑިޑޭޓް މުޙައްމަދު ޒަޢީމްއަށް ލިބުނީ 529 ވޯޓެވެ.

ކައުންސިލްގެ އެހެން މަޤާމުތަކަށް ބަލާއިރު، އަންހެނުންނަށް ޚާއްސަ ދެ ގޮނޑިވެސް ކާމިޔާބު ކުރީ ކޮންގްރެސްގެ ދެ ކެންޑިޑޭޓުން ކަމަށްވާ އައިޝަތު ފަރީނާ އާއި ފާތިމަތު ފަތޯނާ އެވެ. ފަރީނާ 806 ވޯޓް ހޯދިއިރު ފަތޯނާ ވަނީ 670 ވޯޓް ހޯދާފައެވެ. މީގެ އިތުރުން ކައުންސިލް މެންބަރު ކަމަށް އިންތިޚާބުވި އަބްދުالله ޔަޝައު އާއި ޝަމީމް އިބްރާހިމަކީ ވެސް ކޮންގްރެސްގެ ކެންޑިޑޭޓުންނެވެ.

ކައުންސިލްގެ އިތުރުން، އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ (ޑަބްލިއުޑީސީ) ފަސް ގޮނޑިވެސް ކާމިޔާބުކުރީ ކޮންގްރެސް ޕާޓީގެ ކެންޑިޑޭޓުންނެވެ. މިއާއެކު، އިއްޔެ އެ ރަށުގައި ބޭއްވި އިންތިޚާބުގެ ޖުމްލަ 10 ގޮނޑިވެސް ވަނީ ވެރިކަންކުރާ ޕާޓީން ކާމިޔާބުކޮށްފައެވެ.

ތ. ގުރައިދޫ އަކީ ރިޔާސީ އިންތިޚާބުގައި ރައީސް ޑރ. މުޙައްމަދު މުޢިއްޒަށް އެންމެ ބޮޑު އަޣްލަބިއްޔަތެއް ދިން ރަށްތަކުގެ ތެރޭގައި ހިމެނޭ ރަށެކެވެ. އަދި އޭގެ ފަހުން ބޭއްވި ރައްޔިތުންގެ މަޖިލީހުގެ އިންތިޚާބުގައި ވެސް އެ ރަށުގެ ރައްޔިތުން ވަނީ ކޮންގްރެސް ޕާޓީގެ ކެންޑިޑޭޓަށް ބޮޑު ތާއީދެއް ދީފައެވެ.