ޚަބަރު
އިޒްރާއިލް ޕާސްޕޯޓު މަނާކުރާ ބިލްގެ މަސައްކަތް ހަލުވިކަމާއެކު ކުރިއަށްދާނެ: ޕީއެންސީ
ޕީއެންސީ އަށް ނިސްބަތްވާ ބައެއް މަޖިލިސް މެމްބަރުން. ފޮޓޯ: ސަން
އިޒްރާއިލް ޕާސްޕޯޓު މަނާކުރާ ބިލްގެ މަސައްކަތް ހަލުވިކަމާއެކު ހުއްޓުމެެއްނެތި ކުރިއަށްދާނެ ކަމަށް ވެރިކަން ކުރާ ޕީޕަލްސް ނޭޝަނަލް ޕާޓީ އިން ބުނެފިއެވެ.
އެޕާޓީ އިން ނެރެފައިވާ ނޫސްބަޔާނެއްގައި ބުނެފައިވަނީ،
އެމްޑީޕީގެ ފަރާތުން ހުށަހެޅި، 'އިސްރާއީލު ޕާސްޕޯޓު މަނާކުރުމުގެ ބިލް އަވަސްކުރުމަށް ބާރު އެޅުމަށް ސަރުކާރަށް ގޮވާލާ ގަރާރު' ބަލައިނުގަތުމަށް ނިންމީ އެކަމުގައި އެމްޑީޕީގެ އަސްލު މަޤްސަދަކީ ރައްޔިތުންގެ މަޖިލީހުގައި އިއްޔެ ކުރަން ހުރި ގިނަ މަސައްކަތުގެ ވަގުތު ބޭކާރުކޮށްލުން ކަމަށްވާތީ ކަމަށެވެ.
އަދި އެއީ އެމްޑީޕީގެ ހެޔޮ ނިޔަތެއް އޮވެގެން ކުރި ކަމެއް ނޫން ކަމަށްވެސް ޕީއެންސީއިން ބުނެފައިވެއެވެ.
މީގެ އިތުރުން ފަލަސްތީނުގެ ހައްޤުގައި ބައިނަލްއަޤްވާމީ މުޖުތަމަޢުގައި އެންމެ ބޮޑު މަސައްކަތެއް ކުރައްވާ އެއް ލީޑަރަކީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒުކަން ފާހަގަކޮށް ޕީއެންސީއިން ބުނެފައިވަނީ، އިޒްރާއިލް ޕާސްޕޯޓު މަނާކުރުމުގެ ބިލުގެ މަސައްކަތް، އެކަމާ ގުޅޭ މާހިރުންގެ ލަފާއާއި އިރުޝާދާ އެކު ކުރިއަށް ގެންގޮސް، ތާވަލާ އެއްގޮތަށް ނިމޭނެ ކަމަށެވެ.
މީގެއިތުރުން އެޕާޓީ އިން ބުނެފައިވަނީ ރައީސް ޑރ މުއިއްޒާއި އެމަނިކުފާނުގެ ސަރުކާރާއި އެޕާޓީ އަބަދުވެސް އޮންނާނީ ފަލަސްޠީނުގެ ރައްޔިތުންނާއި އެކުގައި ކަމަށެވެ. އަދި ފަލަސްޠީނުގެ ރައްޔިތުންގެ ހައްޤުގައި ކުރެވެން އޮތް ހުރިހާ ކަމެއްގެ މަތީގައި ދެމިއޮންނާނެ ކަމަށްވެސް އެޕާޓީއިން ވަނީ ބުނެފައެވެ.
ނޫސްބަޔާން - އިސްރާއީލު ޕާސްޕޯޓު މަނާކުރުމުގެ ބިލުގެ މަސައްކަތް ހުއްޓުމެއް ނެތި ހަލުވިކޮށް ކުރިއަށްދާނެ.#PressRelease#DhiveheengeRaajje #CongressPartyMV pic.twitter.com/tlKQa51BSC
— PNC Secretariat (@pnc_secretariat) November 20, 2024
ޕީއެންސީ އިން މިފަދަ ބަޔާނެއް ނެރެފައިމިވަނީ އިޒްރާއީލް ޕާސްޕޯޓް މަނާކުރުމުގެ ބިލުގެ މަސައްކަތް ކުރިއަށް ނުދާ ކަމަށް ބުނެ އެމްޑީޕީން މިމަހު 12 ވަނަ ދުވަހު ރައްޔިތުންގެ މަޖިލީހަށް ގަރާރެއް ހުށައަޅައި އެގަރާރު ޕީއެންސީގެ މެޖޯރިޓީ އޮންނަ މަޖިލީހުން ބޭރުކޮށްލުމާއި ގުޅިގެން ގިނަ ބަޔަކު ފާޑު ކިޔަމުން ދަނިކޮށްކަން ފާހަގަކޮށްލަން ޖެހެއެވެ.
އެމްޑީޕީގެ ފަރާތުން އެ ގަރާރު މަޖިލީހަށް ހުށަހަޅުއްވާފައިވަނީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމެވެ. ފަލަސްޠީނުގެ ދަރިފަސްކޮޅު ނައްތާލުމަށް އިޒްރާއިލުން ހިންގަމުންދާ ޤަޠުލުޢާންމާ ދެކޮޅަށް އެމްޑީޕީގެ ފަރާތުން ގަލޮޅު ދެކުނު ދާއިރާގެ މެންބަރު މީކާއިލް ނަސީމް ވަނީ ބިލެއް ވެސް ހުށަހަޅުއްވާފަ އެވެ. އެ ބިލު ހުށަހެޅުއްވީ މީގެ ފަސް މަސް ކުރިން 10 ޖޫންގަ އެވެ. އެ ބިލް އަދިވެސް އޮތީ ކޮމިޓީގަ އެވެ.
