އަންނަ އަހަރު އެންމެ ބޮޑު އިސްކަމެއް ދޭނީ މުދައްރިސުންގެ ފަންނީ ޤާބިލުކަން އިތުރުކުރުމަށްކަމަށް: ވަޒީރު ޝަފީޢު

އަންނަ އަހަރު އެންމެ ބޮޑު އިސްކަމެއް ދޭނީ މުދައްރިސުންގެ ފަންނީ ޤާބިލުކަން އިތުރުކުރެއްވުމަށް ކަމަށް ތަޢުލީމީ ވަޒީރު ޑރ އިސްމާޢިލް ޝަފީޢު ވިދާޅުވެއްޖެއެވެ. 

ވަޒީރު ޝަފީޢު މިހެން ވިދާޅުވީ ދައުލަތުގެ ޓީވީގައި ދެއްކެވި ވާހަކަފުޅުގައެވެ. 

ސަރުކާރަށް 52ހަފްތާ ފުރި ހޯދިފައިވާ ކާމިޔާބުތަކާއި މެދު ވާހަކަދެއްކެވުމަށް ކުރިއަށް ގެންދިޔަ ޕްރޮގްރާމްގައި ވާހަކަފުޅު ދައްކަވަމުން ވަޒީރު ޝަފީޢުވަނީ އަންނަ އަހަރު އެ ވުޒާރާއިން އިސްކަންދީގެ ކުރިއަށް ގެންދިޔުމަށް ނިންމާފައިވާ ބައެއް ކަންކަން ހިއްސާކުރައްވައިފައެވެ. އެގޮތުން ވަޒީރު ވިދާޅުވީ، އަންނަ އަހަރު އެންމެ ބޮޑު އިސްކަމެއްދެއްވާނީ މުދައްރިސުންގެ ފަންނީ ޤާބިލުކަން އިތުރުކުރުމަށްކަމަށެވެ.

 މިކަން ކުރުމަށްޓަކައި ރާއްޖޭގެ އެކި ސަރަޙައްދުތަކުގައި "އެޑިޔުކޭޝަން ސެންޓަރ ފޯ އެކްސެލެންސް" ގެ ނަމުގައި ސެންޓަރުތައް ޤާއިމްކުރުމަށް ނިންމާފައިވާކަން ވަޒީރު ފާހަގަކުރެއްވިއެވެ.ވަޒީރު ވިދާޅުވީ އެ ސެންޓަރުތަކުން މުދައްރިސުންނަށް ބޭނުންވާ ޕްރޮފެޝަނަލް ޑިވެލޮޕްމަންޓާއި ޕްރިންސިޕަލުންނަށް ބޭނުންވާ ޕްރޮފެޝަނަލް ޑިވެލޮޕްމަންޓް ފޯރުކޮށްދެވޭނެ ކަމަށެވެ. އަދި ސްކޫލް އިވެލުއޭޝަންގެ މަސައްކަތްތައް މިހާރަށްވުރެ ހަރުދަނާވެގެންދާނެ ކަމަށް ތަޢުލީމީ ވަޒީރު ޑރ ޝަފީޢު ވިދާޅުވިއެވެ.

މީގެ އިތުރުން ވަޒީރު ވަނީ ސްކޫލްތައް އޭސީ ކުރުމަށް މިހާރު ފަށާފައިވާ މަޝްރޫޢުވެސް ބަޖެޓްގެ ތެރެއިން އަންނަ އަހަރު ގިނަ ސްކޫލްތަކެއްގައި ކުރިއަށްދާނެކަން ފާހަގަކުރައްވާފައެވެ.

 އަދި ދަރިވަރުން ކިޔެވުމަށް ބޭނުންކުރާ ޓެކްސްޓް ފޮތްތައްވެސް އަންނަ އަހަރު ޑިޖިޓަލައިޒް ކުރުމުގެ މަސައްކަތްތަކާއި މި ދާއިރާގެ ހިންގުން ހަރުދަނާ ކުރުމަށް ކުރަންޖެހޭ މަސައްކަތައްވެސް ޚާއްސަ އިސްކަމެއް ދީގެން ކުރައްވާނެކަމަށް ވަޒީރު އިސްމާއިލް ޝަފީޢު ވިދާޅުވިއެވެ.

ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ވަޢުދުފުޅާ އެއްގޮތަށް ދިވެހި މުދައްރިސުން އިތުރުކުރުމަށްޓަކައި ޤައުމީ ޕްރޮގްރާމއެއް މިދިޔަ މަހު ވަނީ ފަށާފައެވެ. މި ޕްރޮގްރާމްގެ ދަށުން އަހަރަކު 150 މުދައްރިސުން ތަމްރީންކުރުމަށް ވަނީ އަމާޒު ހިފާފައެވެ.