އީރާނަށް ނިއުކްލިއާ ހަމަލާއެއް ދޭން އުޅޭކަމަށް ދެކެވޭ ވާހަކަތައް އެމެރިކާއިން ދޮގުކޮށްފި

އީރާނުން އެމެރިކާއާއެކު އެއްބަސްވުމަކަށް އައުމަށް ރައީސް ޑޮނަލްޑް ޓްރަމްޕް ދެއްވާފައިވާ މުހުލަތު ހަމަވާން ކައިރިވެފައިވަނިކޮށް، އެ ގައުމާ ދެކޮޅަށް ނިއުކްލިއާ ހަތިޔާރު ބޭނުންކުރުމުގެ އެއްވެސް ރޭވުމެއް ނެތް ކަމަށް ވައިޓް ހައުސްއިން ބުނެފިއެވެ.

 ވައިޓް ހައުސްއިން މިކަން ހާމަކޮށްފައިވަނީ އީރާނުގެ މުޅި ހަޟާރަތް ނެތިގެން ހިނގައިދާނެ ކަމުގެ އިންޒާރު ޓްރަމްޕް ދެއްވާފައިވާ ދަނޑިވަޅެއްގައެވެ.

ރައީސް ޓްރަމްޕް އޭނާގެ ސޯޝަލް މީޑިއާ ޕްލެޓްފޯމް 'ޓްރުތް ސޯޝަލް' ގައި ވިދާޅުވީ، "މުޅި ހަޟާރަތެއް މިރޭ މަރުވެގެންދާނެ، އަދި ދުވަހަކުވެސް އެނބުރިއެއް ނާންނާނެ" ކަމަށެވެ. ނަމަވެސް އެފަދަ ކަމެއް ވާން ބޭނުންފުޅު ނުވާކަމަށާއި، މިރޭ ވަރަށް އާދަޔާ ހިލާފު ރަނގަޅު ކަމެއްވެސް ހިނގައިދާނެ ކަމަށް އޭނާ ވިދާޅުވިއެވެ. މި އިންޒާރުތަކާ ގުޅިގެން ޓެކްސަސްގެ ކޮންގްރެސް މެންބަރު ޖޯކިން ކާސްޓްރޯ ވަނީ ނިއުކްލިއާ ހަތިޔާރު ބޭނުންކުރުމުގެ ވިސްނުމެއް ނެތްކަން ސާފުކޮށްދިނުމަށް ޓްރަމްޕަށް ގޮވާލައްވާފައެވެ.

އެމެރިކާގެ ނައިބު ރައީސް ޖޭޑީ ވެންސް ވިދާޅުވީ، މިހާތަނަށް ބޭނުންކުރަން ނިންމާފައިނުވާ ވަސީލަތްތައް އެމެރިކާ ސިފައިން ބޭނުންކޮށްފާނެ ކަމަށެވެ. މި ވާހަކައާ ގުޅިގެން ކުރީގެ ނައިބު ރައީސް ކަމަލާ ހަރިސްއާ ގުޅުންހުރި އެކައުންޓަކުން ވަނީ ޓްރަމްޕް ނިއުކްލިއާ ހަތިޔާރު ބޭނުންކުރަން އުޅޭކަމަށް ތުހުމަތުކޮށްފައެވެ. ނަމަވެސް ވައިޓް ހައުސްއިން ވަނީ އެ ތުހުމަތުތައް ހަރުކަށި އިބާރާތުން ދޮގުކޮށްފައެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ވަނީ އެމެރިކާއިން އީރާނުގެ މަދަނީ ވަސީލަތްތަކަށް ހަމަލާދީފިނަމަ، އެމެރިކާއާއި އެ ގައުމުގެ ބައިވެރިންގެ ތެޔޮ ވަސީލަތްތައް އެތައް އަހަރަކަށް ހުއްޓުމަކަށް ގެންނާނެ ކަމަށް ބުނެފައެވެ. އީރާނުގެ ރައީސް މަސްއޫދު ޕެޒެޝްކިއާން ވިދާޅުވީ، އީރާނު ދިފާއުކުރުމަށް 14 މިލިއަނަށްވުރެ ގިނަ މީހުން ހަނގުރާމައަށް ތައްޔާރަށް ތިބި ކަމަށެވެ.

އެމެރިކާއިން މިހާރުވެސް ވަނީ އީރާނުގެ ތެޔޮ އެކްސްޕޯޓްކުރާ މައި މަރުކަޒު ކަމަށްވާ ހާގް އައިލެންޑްގައި ހުރި އަސްކަރީ ވަސީލަތްތަކަށް ހަމަލާދީފައެވެ. ނަމަވެސް ތެޔޮ އުފައްދާ ވަސީލަތްތަކަށް ހަމަލާދީފައި ނުވާކަމަށް ވެންސް ވިދާޅުވިއެވެ. އީރާނުގެ ތެލުގެ 90 އިންސައްތަ އެކްސްޕޯޓް ކުރަނީ މި ރަށުންނެވެ. އެމެރިކާއިން އީރާނަށް ދީފައިވާ މުހުލަތު ހަމަވާނީ އީސްޓަން ޓައިމްއިން މިރޭ 8 ޖަހާއިރުއެވެ.