ޞިއްޙީ ދާއިރާއިން މަޑުޖެހިފައި ހުރި މަޝްރޫޢުތައް އަލުން ފަށައިގަތުމަށް ދަނީ މަސައްކަތްކުރެވެމުން: ވަޒީރު ނާޒިމް

ޞިއްޙީ ދާއިރާއިން ފޯރުކޮށްދޭ ޚިދުމަތްތަކުގެ ފެންވަރު މަތިކުރުމަށް އެދާއިރާއިން މަޑުޖެހިފައި ހުރި މަޝްރޫޢުތައް އަލުން ފަށައިގަތުމަށް ދަނީ މަސައްކަތް ކުރެވެމުންކަމަށް ޞިއްޙަތާއި ބެހޭ ވަޒީރު ޢަބްދުﷲ ނާޒިމް އިބްރާހިމް ވިދާޅުވެއްޖެއެވެ.

ވަޒީރު ނާޒިމް މިހެން ވިދާޅުވީ ޑރ މުޙައްމަދު މުޢިއްޒުގެ ސަރުކާރުން ޞިއްޙީ ދާއިރާއިން ފުރަތަމަ އެއް އަހަރު ދުވަހު ހޯދަވާފައިވާ ކާމިޔާބީތަކާ ގުޅޭގޮތުން ދައުލަތުގެ ޓީވީގެ "ހަފްތާ 52" ޕްރޮގްރާމުގައި ވާހަކަފުޅުދައްކަވަމުންނެވެ.

ވަޒީރު ނާޒިމް ވިދާޅުވީ ޞިއްޙީ ދާއިރާއިން ފޯރުކޮށްދެވޭ ޚިދުމަތްތަކުގެ ފެންވަރު މަތިކުރުމަށް ކުރެވޭ މަސައްކަތްތަކާ އެކުއެކީ، ހުއްޓިފައި ނުވަތަ މަޑުޖެހިފައި ހުރި މަޝްރޫޢުތައްވެސް އަލުން ހިނގައިގަތުމަށް ކުރަންޖެހޭ މަސައްކަތްތައް ކުރަމުންދާކަމަށެވެ.

“ހަފްތާ52” ޕްރޮގްރާމްގައި ވާހަކަފުޅު ދައްކަވަމުން ވަޒީރު ނާޒިމް ވިދާޅުވީ ރައީސް ޑރ މުޙައްމަދު މުޢިއްޒުގެ ސަރުކާރަށް ބޮޑެތި ގޮންޖެހުންތަކެއް ކުރިމަތިވިނަމަވެސް ޞިއްޙީ ވުޒާރާ ހިމެނޭހެން މިސަރުކާރުން ބޮޑެތި ކާމިޔާބީތަކެއް ހޯދައިފައިވާކަމަށެވެ. 

ވަޒީރު ވިދާޅުވީ، ރައީސް ޑރ. މުޢިއްޒުގެ ސަރުކާރުގެ ޞިއްޙީ ދާއިރާގެ ސިޔާސަތުތައް ބައްޓަންކުރައްވާފައިވަނީ ރާއްޖޭގެ ޞިއްޙީ ނިޒާމަށް މިވަގުތު ހުރި ގޮންޖެހުންތަކަށް ވަރަށް ބޮޑަށް ރިޢާޔަތްކުރެވިގެންކަމަށެވެ. އަދި މިކަމުގެ ނަތީޖާއެއްގެ ގޮތުން މިދާއިރާއިން މިހާތަނަށް ކުރެވުނު މަސައްކަތުން ކުރިއެރުންތަކެއް ލިބިފައިވާކަމަށެވެ.

މި ސަރުކާރުގެ އަމާޒުހުރީ ޞިއްޙީ ނިޒާމަކަކީ ވަށާޖެހޭ ނިޒާމެއްގެ ތެރެއިން އެންމެ ބޮޑެތި އާބާދީތަކުން ފެށިގެން އެންމެ ކުދިކުދި އާބާދީތަކުގައިވެސް ދިރިއުޅޭ ރައްޔިތުންނަށް އެކަށީގެންވާ ފެންވަރު ރަނގަޅު ޚިދުމަތެއް ފޯރުކޮށްދިނުން ކަމަށް ވަޒީރު ނާޒިމް ވިދާޅުވިއެވެ.އެގޮތުން ރީޖަނަލް ހޮސްޕިޓަލްތަކުގެ ޚިދުމަތްތައް ފުޅާކުރުމަށް ކުރެވޭ މަސައްކަތްތަކާއި، އެއަރ އެމްބިއުލާންސްގެ ޚިދުމަތް ތަޢާރަފުކުރުމާއި، ކޮލެޓީ ބޭސް ރާއްޖެއަށް ގެނައުމަށްޓަކާ ކުރަންޖެހޭ މަސައްކަތްތައް ފެށިފައިވާކަން ވަޒީރު ފާހަގަކުރެއްވިއެވެ.

އާސަންދަ ނިޒާމު ހަރުދަނާކުރުމަށް މި ސަރުކާރުން ފަށަށާފައިވާ މަސައްކަތްތަކާއެކު އެ ނިޒާމުގެ ތެރެއިން ހުރި ބާގަނޑުތައް ދެނެގަނެވި، ކުރެވޭ އިސްރާފު ބޮޑުތަނުން ސަލާމަތްކުރެވޭނެކަމަށް ޞިއްޙަތާ ބެހޭ ވަޒީރު ނާޒިމް ވިދާޅުވިއެވެ. އަދި އެ ސަލާމަތްކުރެވޭ ފައިސާ މި ދާއިރާގެ އެހެނިހެން ކަންކަން ކުރިއެރުވުމަށް އިންވެސްޓްކުރުމުގެ ފުރުޞަތު ލިބިގެންދާނެކަމަށް ވަޒީރު ވިދާޅުވިއެވެ.