ޒަކާތު ފަންޑުން 1017 މީހަކަށް 9.1 މިލިޔަން ރުފިޔާ އެއްއަަހަރުތެރޭގައި ހަރަދުކޮށްފި

ޒަކާތު ފަންޑުން ބޭސްފަރުވާ ކުރުމަށް އެއްއަހަރުތެރޭގައި މިހާތަނަށް 1000 އަށްވުރެ ގިނަ މީހުންނަށް އެހީ ހަމަޖައްސައިދީފައިވާ ކަމަށް އިސްލާމީ ކަންތައްތަކާ ބެހޭ ވުޒާރާއިން ހާމަކޮށްފިއެވެ. މި މަޢުލޫމާތު ހާމަކުރެއްވީ އެ ވުޒާރާއިން ވޭތުވެދިޔަ 5 އަހަރު ދުވަހު ޒަކާތު ފަންޑުން ބޭސްފަރުވާއަށް ޚަރަދުކުރި މިންވަރު ހާމަކުރެއްވުމާ ގުޅިގެންނެވެ.

އިސްލާމީ ކަންތައްތަކާ ބެހޭ ވުޒާރާއިން ބުނާ ގޮތުގައި، 2019 އަހަރުން ފެށިގެން މިއަހަރުގެ މިހާތަނަށް ޒަކާތު ފަންޑުން ބޭސްފަރުވާގެ ކަންކަމަށް 8000 މީހުންނަށް އެހީ ފޯރުކޮށްދީފައިވެއެވެ. މި މުއްދަތުގައި އެންމެ ގިނައިން އެހީ ފޯރުކޮށްދީފައިވަނީ 2023 ވަނަ އަހަރު ކަމަށާއި، އެ އަހަރު 2379 މީހަކަށް އެހީތެރިކަން ފޯރުކޮށްދީފައިވާ ކަމަށް އެ ވުޒާރާއިން ހާމަކޮށްފައިވެއެވެ.

ޒަކާތު ފަންޑުން ކޮންމެ އަހަރަކުވެސް ބޭސްފަރުވާގެ ކަންކަމަށް އެހީތެރިކަން ފޯރުކޮށްދެމުން އަންނައިރު، އެންމެ ގިނައިން އެހީތެރިކަން ފޯރުކޮށްދެނީ ކެންސަރު ބަލި ތަޙައްމަލު ކުރަމުންދާ މީހުންނަށެވެ. މީގެ އިތުރުން، މިއަހަރު ތެލަސީމިއާ ކުދިންނަށް ބޯންމެރޯ ހެދުމަށްޓަކައި 10 މިލިޔަން ރުފިޔާ އެންސްޕާއާ ހަވާލުކޮށްފައިވާ ކަމަށްވެސް އެ ވުޒާރާއިން ބުނެފައިވެއެވެ.

2019 އިން 2024 ނޮވެންބަރަށް ޒަކާތު ފަންޑުން ބޭސްފަރުވާއަށް އެހީދީފައިވާ މިންވަރު

• 2019ވަނަ އަހަރު: 1289 މީހަކަށް 15.8 މިލިޔަން ރުފިޔާ
  
• 2020ވަނަ އަހަރު: 288 މީހަކަށް 6.2 މިލިޔަން ރުފިޔާ
  
• 2021ވަނަ އަހަރު: 997 މީހަކަށް 11.6 މިލިޔަން ރުފިޔާ
  
• 2022ވަނަ އަހަރު: 2030 މީހަކަށް 21.4 މިލިޔަން ރުފިޔާ
  
• 2023ވަނަ އަހަރު: 2379 މީހަކަށް 20.5 މިލިޔަން ރުފިޔާ
  
• 2024ވަނަ އަހަރު ނޮވެންބަރ: 1017 މީހަކަށް 9.1 މިލިޔަން ރުފިޔާ

އިސްލާމީ ކަންތައްތަކާ ބެހޭ ވުޒާރާއިން ދެއްވާފައިވާ މަޢުލޫމާތުގައިވާ ގޮތުން، 2019 ވަނަ އަހަރުން ފެށިގެން 2024 ވަނަ އަހަރުގެ ނޮވެންބަރު މަހާ ހަމައަށް، ޒަކާތު ފަންޑުން ބޭސްފަރުވާއަށް ޖުމްލަ 84.6 މިލިޔަން ރުފިޔާ ޚަރަދުކޮށްފައިވެއެވެ. އަދި މިއަހަރުގެ ނޮވެންބަރު މަހާ ބަރު މަހާ ހަމައަށް 1017 މީހަކަށް 9.1 މިލިޔަން ރުފިޔާގެ އެހީ ފޯރުކޮށްދީފައިވާ ކަމަށް އެ ވުޒާރާއިން ހާމަކޮށްފައިވެއެވެ.

މީގެއިތުރުން، މުދަލު ޒަކާތާއި ފިޠުރު ޒަކާތުގެ ގޮތުގައި ލިބޭ ފައިސާގެ އަދަދު އިތުރުވަމުންދާކަންވެސް އެ ވުޒާރާއިން ފާހަގަކޮށްފައިވެއެވެ. އެގޮތުން މިއަހަރުގެ އޮކްޓޫބަރު މަހުގެ ނިޔަލަށް މުދަލު ޒަކާތުގެ ގޮތުގައި 88.2 މިލިޔަން ރުފިޔާ ލިބިފައިވާއިރު، ފިޠުރު ޒަކާތުގެ ގޮތުގައި 9.7 މިލިޔަން ރުފިޔާ ލިބިފައިވާކަމަށް އެ ވުޒާރާއިން ބުނެފައިވެއެވެ.