ދުންފަތް ކޮންޓްރޯލްކުރުމާބެހޭ ޤާނޫނަށް ޢަމަލުކުރަން ފެށުމާއިއެކު ދުންފަތުގެ ވިޔަފާރިކުރެވޭނީ ލައިސެންސް އޮވެގެން

ދުންފަތް ކޮންޓްރޯލް ކުރުމާބެހޭ ޤާނޫނަށް ޢަމަލުކުރަން ފެށުމާއިއެކު ދުންފަތުގެ ވިޔަފާރިކުރެވޭނީ ސަރުކާރުގެ ކަމާބެހޭ ވުޒާރާއިން ދޫކުރާ ލައިސެންސެއް އޮވެގެން ކަމަށް ޞިއްޙީ ވުޒާރާއިން ބުނެފިއެވެ. 

އެވުޒާރާއިން ނެރެފައިވާ އިޢުލާނެއްގައި ބުނެފައިވަނީ ދުންފަތް ކޮންޓްރޯލް ކުރުމާބެހޭ ޤާނޫނަށް އެއްވަނަ އިސްލާޙް ގެނައުމުގެ ޤާނޫނު އަށް 15 ނޮވެންބަރު 2024 އިން ފެށިގެން ޢަމަލުކުރަން ފެށުމާއެކު ދުންފަތުގެ ބާވަތްތައް ދިވެހިރާއްޖެއަށް އެތެރެކުރާ އަދި ދިވެހިރާއްޖެއިން ބޭރުކުރާ ކޮންމެ ފަރާތަކާ، ދުންފަތުގެ ބާވަތްތައް ގަނޑުކޮށް ނުވަތަ ވަކިވަކިން ދިވެހިރާއްޖޭގައި ވިއްކާ ކޮންމެ ފަރާތެއްގެ ކިބައިގައި، ސަރުކާރުގެ ކަމާބެހޭ އިދާރާއިން ދޫކުރާ ވިޔަފާރިކުރުމުގެ ހުއްދައިގެ އިތުރުން މި ޤާނޫނޫނުގެ ދަށުން ވުޒާރާއިން ދޫކުރާ ޞައްޙަ ލައިސެންސެއް އޮންނަންވާނެކަމަށް ބަޔާންކޮށްފައިވާކަމަށެވެ. 

އަދި މިޤާނޫނާއި ޤާނޫނުގެ ދަށުން ހަދާ ޤަވާއިދުތަކާ ޚިލާފަށް އެއްވެސް ފަރާތަކުން ދުންފަތް ނުވަތަ ދުންފަތުގެ އެއްވެސް ބާވަތެއް ދިވެހިރާއްޖެއަށް އެތެރެކޮށް، ނުވަތަ ދިވެހިރާއްޖެއިން ބޭރުކޮށް، ނުވަތަ ދިވެހިރާއްޖޭގައި ބަހައި، ނުވަތަ ވިއްކައި ހަދައިގެން ނުވާނެކަމަށް ޤާނޫނުގައި ބަޔާންކޮށްފައިވާކަމަށްވެސް އެވުޒާރާއިން ބުނެފައިވެއެވެ.

ނަމަވެސް އިސްވެދެންނެވި ހުއްދަތައް ހޯދުމަށް ލާޒިމްވާނީ މި ޤާނޫނުގައި ބަޔާންކުރާ ފަދައިން މި ހުއްދަތައް ދިނުމުގެ އުސޫލާއި އިޖުރާޢަތުތައް ކަނޑައަޅާ ބަޔާންކުރާ ޤަވާއިދު ޢާންމުކުރުމުން އެ ޤަވާއިދުގައި ކަނޑައަޅާ މުއްދަތެއްގައި ކަމަށްވެސް އެވުޒާރާއިން ބުނެއެވެ. 

ދުންފަތް ކޮންޓްރޯލްކުރުމާބެހޭ ޤާނޫނަށް އަލަށް ގެނެސްފައިވާ އިސްލާޙުގެ ދަށުން ރާއްޖެއިން ބޭރުން އަންނަ 18 އަހަރު ފުރިފައިވާ ފަތުރުވެރިން އަމިއްލަ ބޭނުމަށް ގެންނަ ދުންފަތުގެ ބާވަތްތައް ބަޔާންކޮށްފައިވާ މިންވަރަށްވުރެ އިތުރުވާނަމަ ކަސްޓަމްސްގެ އާންމު ޤަވާއިދުގެ ދަށުން ކަސްޓަމްސްގެ ބެލުމުގެ ދަށުގައި ބެހެއްޓޭނެއެވެ.

އަދި ކަސްޓަމްސްގެ ބެލުމުގެދަށުގައި ބެހެއްޓުމަށްފަހު އަނބުރާ ގެންދަންޖެހޭ މުއްދަތުގެތެރޭގައި ނުގެންގޮސްފިނަމަ މޯލްޑިވްސް ކަސްޓަމްސްއިން އެ ތަކެތި ނައްތާލާނެއެވެ.