އަންހެން ވިޔަފާރިވެރިންގެ ވިޔަފާރިތައް ކުރިއެރުވުމަށް ދޫކުރާ “ފަށާ މަދަދު” ލޯނު 60 މީހަކަށް ދޫކޮށްފި

އަންހެން ވިޔަފާރިވެރިން ހިންގާ ވިޔަފާރިތައް ކުރިއެރުވުމަށް ދޫކުރާ “ފަށާ މަދަދު” ލޯނު ސްކީމްގެ ދަށުން 60 މީހަކަށް ދޫކޮށްފިކަމަށް  އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން (އެސްޑީއެފްސީ) އިން ބުނެފިއެވެ. 
"”ފަށާ މަދަދު" ލޯނު ސްކީމަކީ މި ސަރުކާރުން އަންހެން ވިޔަފާރިވެރިންގެ ވިޔަފާރިތައް ކުރިއެރުވުމަށްޓަކައި އިފްތިތާޙްކޮށްފައިވާ 100 މިލިއަން ރުފިޔާގެ ލޯނު ސްކީމެކެވެ. މި ލޯނު ސްކީމް އިފްތިތާޙްކޮށްފައިވަނީ މިއަހަރުގެ ފެބްރުއަރީ މަހުގެ ތެރޭގައެވެ.

އެސްޑީއެފްސީން ބުނެފައިވަނީ، 18 ނޮވެމްބަރ އާއި ހަމައަށް "ފަށާ މަދަދު" ލޯނު 60 މީހަކަށް ދޫކޮށްފައިވާކަމަށެވެ. މީގެތެރޭގައި ޚާއްސަ އެހީއަށް ބޭނުންވާ 4 މީހަކުވެސް ހިމެނޭކަން ފާހަގަކޮށްފައިވެއެވެ. މި ލޯން ސްކީމުގެ %25 ޚާއްޞަ ކުރެވިފައި ވަނީ ޚާއްޞަ އެހީއަށް ބޭނުންވާ އަންހެން ބޭފުޅުންނަށެވެ.

"ފަށާ މަދަދު" ލޯނު ސްކީމްގެ ދަށުން މުޅިއެކު 100 މިލިއަން ރުފިޔާ ދޫކުރަން ނިންމާފައިވާއިރު މިހާތަނަށް އޭގެތެރެއިން %45 ދޫކޮށްފައިވާކަމަށް އެސްޑީއެފްސީން ވަނީ ބުނެފައެވެ.

މި ލޯނު ސްކީމް އިފްތިތާޙްކުރުމުގެ ރަސްމިއްޔާތުގައި އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުޙައްމަދު ސައީދު ވިދާޅުވީ، މިފަދަ ސްކީމްތަކާއެކު އަންހެނުންނަށް ވިޔަފާރީގެ ފުރުޞަތުތައް ފަހިވެގެންދާނެ ކަމަށެވެ. އަދި އެ ފުރުޞަތުގެ ބޭނުން ހިފުމަށް ވަޒީރު ވަނީ އެދިވަޑައިގަންނަވާފައެވެ.

މި ލޯނު ސްކީމްގެ ދަށުން އަހަރަކު 6 އިންސައްތައިގެ އިންޓްރެސްޓާއެކު އަލަށް ވިޔަފާރި ފަށާ ފަރާތްތަކަށް 100،000 ރުފިޔާއާއި 500،000 ރުފިޔާއާ ދެމެދުގެ ޢަދަދަކަށް ލޯނު ނެގޭނެއެވެ.

އަންހެން ވިޔަފާރިވެރިންގެ ވިޔަފާރިތަކަށް ދޫކުރާ “ފަށާ މަދަދު” ލޯނު ދޫކުރުމަކީ ސަރުކާރުގެ ހަފްތާ14 ގެ ވަޢުދުތަކުގެ ތެރޭގައި ހިމަނާފައިވާ ވަޢުދެކެވެ.