އިތިއޯޕިއާ މީހުންނަށް ދީފައިވާ ހިމާޔަތް އުވާލުން އެމެރިކާގެ ފަނޑިޔާރަކު ހުއްޓުވައިފި

އެމެރިކާގައި ދިރިއުޅެމުންދާ އިތިއޯޕިއާގެ 5،000 އެއްހާ ރައްޔިތުންނަށް ދީފައިވާ ގާނޫނީ ހިމާޔަތް އުވާލުމަށް ރައީސް ޑޮނަލްޑް ޓްރަމްޕްގެ ސަރުކާރުން ނިންމި ނިންމުމަށް އެމެރިކާގެ ފެޑަރަލް ފަނޑިޔާރަކު ހުރަސް އަޅައިފިއެވެ.

ޑިސްޓްރިކްޓް ފަނޑިޔާރު ބްރަޔަން މާފީ ބުރާސްފަތި ދުވަހު ނެރުއްވި މި އަމުރަކީ، ހުޅަނގުގެ ނޫން ގައުމުތަކުގެ މީހުންނަށް ދީފައިވާ އިމިގްރޭޝަން ހިމާޔަތްތައް އުވާލުމަށް ޓްރަމްޕްގެ ސަރުކާރުން ކުރަމުންދާ މަސައްކަތަށް ކުރިމަތިވި އިތުރު ހީނަރުކަމެކެވެ.

ފަނޑިޔާރު މާފީގެ ނިންމުމުގައި ފާހަގަކުރައްވާފައިވަނީ 'ޓެމްޕަރަރީ ޕްރޮޓެކްޓެޑް ސްޓޭޓަސް' (ޓީ.ޕީ.އެސް) ދިނުމާއި އުވާލުމުގައި ކޮންގްރެސްއިން ކަނޑައަޅާފައިވާ އުސޫލުތަކަށް ރައީސް ޓްރަމްޕް އިހުތިރާމް ކުރައްވާފައި ނުވާ ކަމަށެވެ. "މި މައްސަލައިގެ އަސާސަކީ އަދި އަޅުގަނޑުމެންގެ ދުސްތޫރީ ނިޒާމުގެ އަސާސަކީ ވެސް، ރައީސްގެ އިރާދަ ކޮންގްރެސްގެ ނިންމުންތަކަށްވުރެ ކުރިއަށް ނުނެރެވޭނެ ކަމުގެ އުސޫލު،" ފަނޑިޔާރު ލިޔުއްވާފައިވެއެވެ.

ޓީ.ޕީ.އެސް އަކީ އަމިއްލަ ގައުމުގައި ހިނގަމުންދާ ހަނގުރާމައެއްގެ ސަބަބުން ނުވަތަ ގުދުރަތީ ކާރިސާއެއްގެ ސަބަބުން އެނބުރި ދިއުމަކީ ނުރައްކާތެރި ކަމެއް ކަމަށް ބެލެވޭ ބިދޭސީންނަށް އެމެރިކާގައި މަސައްކަތްކޮށް ދިރިއުޅުމަށް ދެވޭ ހާއްސަ ހުއްދައެކެވެ. ޓްރަމްޕްގެ ސަރުކާރުން ވަނީ 13 ގައުމެއްގެ މީހުންނަށް ދީފައިވާ މި ހިމާޔަތް އުވާލުމަށް މަސައްކަތް ކޮށްފައެވެ.

ފަނޑިޔާރުގެ ނިންމުމުގައި ވިދާޅުވެފައިވަނީ، ޖެނުއަރީ 2025 ގައި ޓްރަމްޕް ސޮއިކުރެއްވި އެގްޒެކެޓިވް އޯޑަރެއްގެ ސަބަބުން، ގައުމުތަކުގެ ހާލަތަށް ބެލުމެއް ނެތި ހިމާޔަތް އުވާލުމުގެ މަގު ފަހިވެފައިވާ ކަމަށެވެ. މިއީ އާންމުކޮށް އަމަލުކުރާ އުސޫލުތަކާ ހިލާފަށް ނިންމާފައިވާ ނިންމުމެއް ކަމަށް ފަނޑިޔާރު ސިފަކުރެއްވިއެވެ.

މި ނިންމުމާ ގުޅިގެން ޑިޕާޓްމަންޓް އޮފް ހޯމްލޭންޑް ސެކިއުރިޓީ (ޑީ.އެޗް.އެސް) ގެ ތަރުޖަމާނު ވިދާޅުވީ، މިއީ އެމެރިކާގެ އިމިގްރޭޝަން ނިޒާމު އިސްލާހުކުރުމަށް ރައީސް ޓްރަމްޕް ކުރައްވާ މަސައްކަތަށް 'ޖުޑީޝަލް އެކްޓިވިސްޓުން' ހުރަސް އެޅި އިތުރު މިސާލެއް ކަމަށެވެ.

އިތިއޯޕިއާގެ ރައްޔިތުންނަށް އެންމެ ފުރަތަމަ ޓީ.ޕީ.އެސް ދީފައިވަނީ 2022 ވަނަ އަހަރު ރައީސް ޖޯ ބައިޑަންގެ ސަރުކާރުގައެވެ. އެއީ އެ ގައުމުގައި ހިނގަމުންދިޔަ ހަނގުރާމައާއި އިންސާނީ ކާރިސާއާ ގުޅިގެންނެވެ. އެމީހުންގެ ހިމާޔަތުގެ މުއްދަތު އެންމެ ފަހުން އިތުރުކޮށްފައިވަނީ 2024 ވަނަ އަހަރުގެ އޭޕްރީލް މަހުގައެވެ.