އޭޑީކޭގެ ރަސްމީ އެސްއެމްއެސް ހޭންޑަލުން ސްކޭމް މެސެޖުތަކެއް، ސަމާލުވުމަށް އިލްތިމާސްކޮށްފި

އޭޑީކޭ ހޮސްޕިޓަލްގެ ރަސްމީ އެސްއެމްއެސް ހޭންޑަލުން ސްކޭމް މެސެޖުތަކެއް ފޮނުވަމުންދާތީ އެކަމަށް ސަމާލުވުމަށް އެހޮސްޕިޓަލުން އިލްތިމާސްކޮށްފިއެވެ. 

މިކަމާއި ގުޅިގެން އޭޑީކޭއިން ސޯޝަލް މީޑީއާގައި ހިއްސާކޮށްފައިވާ ޕޯސްޓެއްގައި ބުނެފައިވަނީ އެ ހޮސްޕިޓަލުގެ ރަސްމީ އެސްއެމްއެސް ހޭންޑަލުން ސްކޭމް މެސެޖުތަކެއް ދައުރުކުރަމުން އަންނަކަން އެ ހޮސްޕިޓަލުގެ ސަމާލުކަމަށް އައިސްފައިވާ ކަމަށެވެ.

އަދި އެފަދަ އެއްވެސް އެސްމެސްތަކުން ފޮނުވާ އެއްވެސް ލިންކެއް ނުހުޅުވުމަށާއި އެ އެސްއެމްއެސްތަކަށް ޖަވާބުދިނުމުގެ ގޮތުން ޒާތީ އެއްވެސް މަޢުލޫމާތެއް ހިއްސާ ނުކުރުމަށް އެ ހޮސްޕޮލިޓަލުން ވަނީ އިލްތިމާސްކޮށްފަ އެވެ.

އޭޑީކޭއިން އިތުރަށް ބުނެފައިވަނީ، އެފަދަ އެސްއެމްއެސްތައް ދައުރުކުރަމުންދަނީ އާންމުންގެ ޒާތީ މަޢުލޫމާތުތައް ފޭރިގަތުމަށް ކަމަށެވެ.

އަދި އެފަދަ އެސްއެމްއެސްތަކުގެ ޒަރިއްޔާއިން ލިބޭ މަޢުލޫމާތުތައް އޭޑީކޭގެ ރަސްމީ ނަންބަރަށް ގުޅައިގެން ކަށަވަރުކުރުމަށާ ޕާސްވޯޑް، ބޭންކް އެކައުންޓް ނަންބަރު، ކްރެޑިޓް ކާޑު މައުލޫމާތު ފަދަ އެއްވެސް މައުލޫމާތެއް ހިއްސާނުކުރުމަށްވެސް އެދިފައިވެއެވެ.

ސްކޭމް މެސެޖު މައްސަލަ ހައްލުކުރުމަށް މަސައްކަތް ކުރަމުންދާ ކަމަށް އޭޑިީކޭއިން ބުނެފައިވެއެވެ.

URGENT: SCAM ALERT!

We are aware of a malicious scam message being circulated through our official SMS handle. Please do not click on any links or provide any personal information in response to these messages. pic.twitter.com/MFUWH38BnC

— ADK Hospital (@ADKHospital) November 22, 2024

އަމިއްލަ ކުންފުނިތަކާ ސަރުކާރުގެ ކުންފުނިތަކުގެ ނަމުގައި މިފަދަ މެސެޖުތައް ދޭތެރެ ދޭތެރެއިން ދައުރުކުރަމުންދެއެވެ. މިފަދަ ސްކޭމްތަކަށް ރައްކާތެެރިވުމަށް ކަމާ ބެހޭ އިދާރާތަކުން އަބަދުވެސް ދަނީ އިލްތިމާސްކުރަމުންނެވެ.