ވެހިކަލް ގެންގުޅެވޭނެ މުއްދަތު ކަނޑައަޅާ ޚާއްޞަ ނިޒާމެއް ރާއްޖޭގައި ތަޢާރަފުކުރަނީ

ވެހިކަލް ގެންގުޅެވޭނެ މުއްދަތު ކަނޑައަޅާ ޚާއްސަ ނިޒާމެއް ރާއްޖޭގައި ތަޢާރަފްކޮށް އެކުލަވާލުމުގެ މަސައްކަތް ދަތުރުފަތުރާ މަދަނީ އުދުހުންތަކާ ބެހޭ ވުޒާރާއިން ފަށްޓަވައިފިއެވެ. 

މި ނިޒާމަކީ ވެހިކަލްތަކުގެ ޢަދަދު ކޮންޓްރޯލްކުރުމަށް، ކުރިއަރާފައިވާ ޤައުމުތަކުގައި ބޭނުންކުރާ ނިޒާމެކެވެ. ދަތުރުފަތުރާ މަދަނީ އުދުހުންތަކާ ބެހޭ ވުޒާރާއިން އެމަސައްކަތް ފަށާފައިވާކަން ހާމަކުރެއްވީ އަންނަ އަހަރަށް އެވުޒާރާއިން ރާވާފައިވާ މަސައްކަތްތަކާ ގުޅޭގޮތުން ޙިއްސާކޮށްފައިވާ މަޢުލޫމާތުގައެވެ.

ދަތުރުފަތުރާ ބެހޭ ވުޒާރާއިން ހާމަކޮށްފައިވާ ގޮތުގައި މިދިޔަ 5 އަހަރުދުވަހުގެ ތެރޭގައި ރާއްޖޭގައި 69،780 އުޅަނދު ރަޖިސްޓްރީކޮށްފައިވެއެވެ. އޭގެ ތެރެއިން 42،000 އުޅަނދު ރަޖިސްޓްރީކޮށްފައިވަނީ މާލެއަށެވެ. ކަސްޓަމްސްގެ ތަފާސްހިސާބުން ދައްކާގޮތުގައި މިދިޔަ އަހަރު އެކަނި 16000އަށްވުރެ ގިނަ އުޅަނދު އެތެރެކޮށްފައިވެއެވެ.

މިއާއެކު މާލެ ސަރަޙައްދަށް އެއްވެސް ކޮންޓްރޯލެއް ނެތި އުޅަނދު ރެޖިސްޓްރީކުރުމާއި ތޮއްޖެހޭ މައްސަލަ ހައްލުކުރުމަށް ސަރުކާރުން ވަނީ ގިނަ މަސައްކަތްތަކެއް ފައްޓަވާފައެވެ.

އެގޮތުން، މާލޭގެ އިތުރުން ކޮންމެ ރަށެއްގައި އެންމެ ގިނައިން ވެހިކަލް ދުއްވޭ ކެރީންގ ކެޕޭސިޓި ކަނޑައެޅުމުގެ ފަސޭހަ އުސޫލެއް މިއަހަރުގެ މަރޗް މަހު ވަނީ އާއްމުކޮށްފައެވެ.

 ލާމަރުކަޒީ ޤާނޫނު ބުނާގޮތުން ކޮންމެ ސިޓީއެއްގައި ގެންގުޅޭ އުޅަނދުގެ ބާވަތާއި ޢަދަދާއި ޢުމުރު ކަނޑައެޅުމަކީ އެ ކައުންސިލްގެ ޤާނޫނީ ޒިންމާއެކެވެ. މިހާރު ގެނެސްފައިވާ އިސްލާޙުތަކާއެކު، މާލެ ސަރަހައްދުގައި އުޅަނދު ގިނަވެ ތޮއްޖެހުމުގެ މައްސަލައަށް ދާއިމީ ޙައްލެއް ގެނެވޭނެކަމަށް ސަރުކާރުން ބުނެއެވެ.