ކުޑަކުއްޖަކާއެކު ބަދުއަޚްލާޤީ ޢަމަލު ހިންގި މީހަކު ދޫކޮށްލިކަމަށް ބުނާ ޚަބަރަކީ ދޮގު ޚަބަރެއް: ސަރުކާރު

ކުޑަކުއްޖަކާއެކު ބަދުއަޚްލާޤީ ޢަމަލެއް ހިންގައިގެން ޖަލު ޙުކުމް ތަންފީޒުކުރަމުންދާ މީހަކު ރައީސުލްޖުމްހޫރިއްޔާ މަޢާފުދެއްވައިގެން މިނިވަންކުރިކަމަށް ބުނެ ސޯޝަލް މީޑިއާގައި ފަތުރަމުންދަނީ ހަޤީޤަތާ ޚިލާފު ދޮގު ވާހަކަތަކެއްކަމަށް ސަރުކާރުން ވިދާޅުވެއްޖެއެވެ.

ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވީ، މި މައްސަލައިގެ ހަޤީޤަތް މޯލްޑިވްސް ކަރެކްޝަނަލް ސަރވިސްއިން ހާމަކުރައްވާފައިވާ ކަމަށެވެ. ކަރެކްޝަނަލް ސަރވިސްއިން ނެރުއްވި ބަޔާނުގައި ވިދާޅުވެފައިވަނީ، ދޫކޮށްލިކަމަށް ބުނާ ހއ. ހޯރަފުށީ ހާޝިމް އަބޫބަކުރަކީ 2022 ވަނަ އަހަރުން ފެށިގެން ޖަލު ހުކުމެއް ތަންފީޒުކުރަމުންދާ މީހެއްކަމަށެވެ.

ބަޔާނުގައި އިތުރަށް ވިދާޅުވެފައިވަނީ، ހާޝިމްގެ އުނަގަނޑުގެ މައްސަލައެއް ހުރުމާއެކު، އޭނާގެ ސަރޖަރީ ރާއްޖޭގައި ކުރެވެން ނެތްކަމަށް ޑޮކްޓަރުން ލަފާދެއްވުމުން، މި އަހަރުގެ އޯގަސްޓް 5 ވަނަ ދުވަހު ބޭސްފަރުވާއަށް ރާއްޖެއިން ބޭރަށް ފުރުމުގެ ހުއްދަ ދީފައިވާ ކަމަށެވެ. ސެޕްޓެމްބަރު 16 ވަނަ ދުވަހު އޭނާ މާލެ އައުމަށްފަހު، އޭނާގެ ބަލި ޙާލަތު ހުރިގޮތުން ޖަލުގައި ހުރެގެން ފަރުވާ ކުރިއަށް ނުގެންދެވޭނެތީ، ވަގުތީގޮތުން ޙުކުމް ތަންފީޒުކުރުމަށް ގޭބަންދަށް ބަދަލުކޮށްފައިވާ ކަމަށްވެސް ކަރެކްޝަނުން ވިދާޅުވެފައިވެއެވެ.

މި މައްސަލައާ ގުޅިގެން ސޯޝަލް މީޑިއާގައި ދޮގު މަޢުލޫމާތު ފަތުރަމުންދާތީ ސަރުކާރުން މިކަން ސާފުކޮށްދެއްވާފައިވަނީ އިއްޔެއެވެ. ކުޑަކުދިންނަށް ކުރާ އަނިޔާތަކަކީ ސީރިއަސް މައްސަލަތަކެއްގެ ގޮތުގައި ބަލައި، އެފަދަ ކަންކަމަށް އަވަސް ފިޔަވަޅު އެޅުމަށް ކުޑަކުދިންގެ ޢަދުލުގެ ޤާނޫނުން ލާޒިމުކުރާކަން ފާހަގަކޮށްލެވެއެވެ.

ކުޑަކުއްޖަކާއެކު ބަދުއަޚުލާޤީ އަމަލު ހިންގައިގެން ޙުކުމް ތަންފީޒު ކުރަމުންދާ މީހަކު ދޫކޮށްލި ކަމަށްބުނެ، ސޯޝަލް މީޑިއާގެ ބައެއް އެކައުންޓުތަކުން ފަތުރަމުންދަނީ ކަނޑައެޅިގެން ޙަޤީޤަތާ ޚިލާފު ދޮގެއް. އެކަމުގެ ޙަޤީޤަތް މޯލްޑިވްސް ކަރެކްޝަނަލް ސަރވިސްއިން އެވަނީ ހާމަކުރައްވާފައި. pic.twitter.com/lAgo6hzBw8

— Heena Waleed (@MvSpokesperson) November 22, 2024