ފަލަސްތީނުގެ ލީޑަރު މަރުވާން ބަރުޣޫތީއަށް އިސްރާއީލުގެ ޖަލުތަކުގައި ބޮޑެތި އަނިޔާތަކެއް ކުރަމުންދާކަމުގެ ކަންބޮޑުވުން ފާޅުކޮށްފި

ފަލަސްތީނުގެ މަގުބޫލު ލީޑަރު މަރުވާން ބަރުޣޫތީއަށް އިސްރާއީލުގެ ޖަލުތަކުގައި ފާއިތުވި ހަފުތާތަކުގައި "ލާއިންސާނީ" އަނިޔާތަކެއް ދެމުންދާ ކަމަށާއި، އޭނާގެ ފުރާނައަށް ނުރައްކާވެފައިވާ ކަމަށް އޭނާގެ ވަކީލު ބުނެފިއެވެ.

2002 ވަނަ އަހަރުން ފެށިގެން އުމުރު ދުވަހުގެ ޖަލު ހުކުމެއް ތަންފީޒު ކުރަމުންދާ އުމުރުން 66 އަހަރުގެ ބަރުޣޫތީއަށް މާޗް އަދި އޭޕްރީލް މަހުގެ ތެރޭގައި ތިން ފަހަރެއްގެ މަތިން ހަމަލާދީފައިވާ ކަމަށް ވަކީލު ބެން މާމަރެއްލީ ވަނީ ހާމަކޮށްފައެވެ.

ވަކީލު މާމަރެއްލީ ބުނި ގޮތުގައި، މިދިޔަ އޭޕްރީލް މަހުގެ 8 ވަނަ ދުވަހު އިސްރާއީލުގެ މެދުތެރޭގައި ހުންނަ ގަނޮޓް ޖަލުގައި ބަރުޣޫތީއަށް ވަރަށް ބޮޑަށް އަނިޔާކޮށް ޒަހަމްކޮށްލާފައިވެއެވެ. މި ހަމަލާގެ ސަބަބުން އޭނާގެ ހަށިގަނޑުން ލޭ އޮހޮރެމުން ދިޔައިރުވެސް، ބޭސްފަރުވާ ކުރުމުގެ ފުރުސަތު އިސްރާއީލުން ދީފައި ނުވާ ކަމަށް ވަކީލު ފާހަގަކުރިއެވެ. މީގެ އިތުރުން މާޗް މަހުގެ 24 ވަނަ ދުވަހު ޖަލު ގާޑުން އޭނާގެ ގޮޅިއަށް ކުއްތާއެއް ވައްދައި، ބަރުޣޫތީ ބިންމަތީގައި ބާއްވައި ކުއްތާލައްވައި ހަމަލާދީފައިވާ ކަމަށްވެސް ރިޕޯޓުތައް ބުނެއެވެ.

ނުރައްކާތެރި ހާލަތެއްގައި އެކަހެރިކޮށްފައި
ބަރުޣޫތީ ހައްޔަރުކުރިތާ 24 އަހަރު ފުރުމާ ދިމާކޮށް "ފްރީ މަރުވާން" ކެމްޕޭނުން ނެރުނު ބަޔާނެއްގައި ބުނެފައިވަނީ، އޭނާ އެކަހެރިކޮށް ބަންދުކޮށްފައި ހުރި ވަގުތުތަކުގައިވެސް އަނިޔާވެރި ހަމަލާތަކެއް ދީފައިވާ ކަމަށެވެ. ވަކީލު މާމަރެއްލީ އޭނާގެ މުވައްކިލާ ބައްދަލުކުރުމަށްފަހު ބުނީ، ބައްދަލުވުމުގެ ހާލަތުވެސް އޮތީ ވަރަށް ދަށްކޮށް ކަމަށާއި، ދެމީހުން ވާހަކަ ދައްކަން ޖެހުނީ ބިއްލޫރިގަނޑެއްގެ ދެފަރާތުގައި ތިބެގެން ހަޅޭއްލަވައިގެން ކަމަށެވެ. ނަމަވެސް، މިފަދަ ދަތި ހާލަތެއްގައިވެސް ބަރުޣޫތީ ހުރީ ސިކުނޑި ސާފުކޮށް، ބޭރު ދުނިޔޭގައި ހިނގާ ކަންކަމަށް ވަރަށް ބޮޑަށް ސަމާލުކަންދީގެން ކަމަށް ވަކީލު ބުންޏެވެ.

ފަލަސްތީނުގެ ނެލްސަން މަންޑޭލާގެ ގޮތުގައި ސިފަކުރެވޭ ބަރުޣޫތީއަކީ ފަލަސްތީނުގެ އެކި ސިޔާސީ ފިކުރުތައް އެއްގަލަކަށް އެރުވުމުގެ ގާބިލުކަން ހުރި، މުސްތަގުބަލުގައި އުފެދޭ ފަލަސްތީނު ދައުލަތެއްގެ މުހިންމު ލީޑަރެއްގެ ގޮތުގައި ބެލެވޭ ބޭފުޅެކެވެ. އޭނާގެ ހާލަތު ދަށްވަމުންދާކަން ފާހަގަކުރަމުން އާއިލާއިން ބުނެފައިވަނީ، ބަނޑުހައިހޫނުކަމާއި ވަރުބަލިކަމުގެ ސަބަބުން އޭނާގެ ސިފައަށް ބޮޑެތި ބަދަލުތަކެއް އައިސްފައިވާ ކަމަށެވެ.

އިސްރާއީލުގެ ހަރުކަށި ސިޔާސަތުތައް
އިސްރާއީލުގެ ހަރުކަށި ނޭޝަނަލް ސެކިއުރިޓީ މިނިސްޓަރު އިތަމާރު ބެން-ގްވީރު ވަނީ މީގެ ކުރިން ޖަލަށް ގޮސް ބަރުޣޫތީއަށް މަލާމާތްކޮށް، އޭނާއަށް ކާމިޔާބު ނުލިބޭނެ ކަމަށް ބުނެ އިންޒާރުދީފައެވެ. އިސްރާއީލާއި ހަމާސްއާ ދެމެދު ހިނގަމުންދާ ހަނގުރާމައިގެ ތެރެއިން އަސީރުން ބަދަލުކުރުމުގެ އެއްބަސްވުންތަކުގައިވެސް، ބަރުޣޫތީ ފަދަ މުހިންމު ލީޑަރުން ދޫކޮށްލުމަށް އިސްރާއީލުން ވަނީ ދެކޮޅު ހަދާފައެވެ.

މީގެ އިތުރުން، އިސްރާއީލުން އަލަށް ފާސްކުރި މަރުގެ އަދަބު ދިނުމުގެ ގާނޫނުގެ ސަބަބުން، ޖަލުތަކުގައި ތިބި ފަލަސްތީނުގެ އަސީރުންނަށް އޮތް ނުރައްކާ އިތުރުވެފައިވާ ކަމަށް އިންސާނީ ހައްގުތަކަށް މަސައްކަތް ކުރާ ޖަމާއަތްތަކުން ބުނެއެވެ. ބަރުޣޫތީއަށް ދެމުންދާ މި ހަމަލާތަކަކީ އޭނާގެ އަޒުމް ބަލިކޮށްލުމަށް ކުރާ ކަމެއްގެ ގޮތުގައި ފަލަސްތީނުގެ ފަރާތްތަކުން ސިފަކުރެއެވެ.