ވިޔަފާރި / ޚަބަރު
ތިނަދޫގައި ޚާއްޞަ އެހީއަށް ބޭނުންވާ ކުދިންނަށް ފަރުވާދޭ ކްލިނިކެއް ހުޅުވައިފި

ތިނަދޫގައި ހުޅުވުނު ކްލިނިކް ފޮޓޯ:ގާފު
ތިނަދޫ ސިޓީގައި ޚާއްޞަ އެހީއަށް ބޭނުންވާ ކުދިންނަށް ތަފާތު ފަރުވާތައް ދޭ ކްލިނިކެއް ހުޅުވައިފިއެވެ. "ހުވަދޫ ތެރަޕީ ކްލިނިކް" ގެ ނަމުގައި ހުޅުވުނު މި ކްލިނިކް ހުންނަނީ ތިނަދޫ ސިޓީގެ ފަޑިޔާރުމަގުގައި ހުންނަ ކޭވަކު ގޭގައެވެ.
މި ކްލިނިކުން ދޭ ޚިދުމަތްތަކުގެ ތެރޭގައި ކްލިނިކަލް ސައިކޮލޮޖިސްޓް ކޮންސަލްޓޭޝަން،ަލްޓޭޝަން، ސައިކޮލޮޖިކަލް އެސެސްމަންޓް، ބިހޭވިއަރ ތެރަޕީ އަދި ކައުންސެލިންގ ހިމެނެއެވެ. މީގެ އިތުރުން ސައިކޯ ތެރަޕީ، އޮކިޔުޕޭޝަނަލް ތެރަޕީ، އެޑިޔުކޭޝަނަލް ތެރަޕީ އަދި ސްޕީޗް ތެރަޕީގެ ޚިދުމަތްވެސް ލިބެން ހުންނާނެއެވެ. އަދި އެންޒައިޓީއާއި ޑިޕްރެޝަން ފަދަ ނަފްސާނީ ބަލިތަކުގެ ފަރުވާވެސް މި ކްލިނިކުން ލިބޭނެ ކަމަށް ކްލިނިކުން މަޢުލޫމާތު ދީފައިވެއެވެ.
ކްލިނިކުގެ ޚިދުމަތް ހަފުތާއަކު 6 ދުވަހު ލިބެން ހުންނާނެއެވެ. އަދި ޑޮކްޓަރު ރެކޮމެންޑްކުރާ އަދަދަކަށް ތެރަޕީ ސެޝަންތައް ހަމަޖައްސައިދޭނެ ކަމަށްވެސް ކްލިނިކުން ބުނެފައިވެއެވެ. ފަރުވާތައް ކުރިއަށް ގެންދާނީ އެކި ދާއިރާތަކުން ޚާއްޞަވެފައިވާ، މަސައްކަތުގެ ތަޖުރިބާ ލިބިފައިވާ ޑޮކްޓަރުންނެވެ.
ކްލިނިކުގެ ޚިދުމަތް މިހާރު ފަށާފައިވާއިރު، ޚިދުމަތް ދިނުމަށް ހަމަޖެހިފައިވަނީ ހެނދުނު 9:00 އިން ހަވީރު 5:00 އަށެވެ. ޚިދުމަތް ހޯދަން ބޭނުންވާ ފަރާތްތަކަށް 7813030 ނަންބަރަށް ގުޅައިގެން އެޕޮއިންޓްމަންޓް ހެދޭނެ އިންތިޒާމު ހަމަޖައްސާފައިވާ ކަމަށް ކްލިނިކުން މަޢުލޫމާތު ދީފައިވެއެވެ.
މިއީ ހުވަދު އަތޮޅުގައި މިފަދަ ފަރުވާތަކެއް ދިނުމަށް ހުޅުވުނު ފުރަތަމަ ކްލިނިކެވެ. މި ކްލިނިކް ހުޅުވުމާއެކު، ހުވަދު އަތޮޅުގެ ރައްޔިތުންނަށް، ޚާއްޞަކޮށް ޚާއްޞަ އެހީއަށް ބޭނުންވާ ކުދިންނަށް، ފަސޭހަކަމާއެކު ބޭނުންވާ ފަރުވާ ލިބިގަތުމުގެ ފުރުޞަތު ފަހިވެގެން ދާނެއެވެ.